Enn Esanz Lankurazman Spesyal
1 Pena enn zur ki pase kot lafwa lepep Zeova pa pas dan leprev. Pwiski Dyab kone ki li res enn tigit letan mem, li pe lans enn dernye latak pu kas nu fidelite anver Zeova. (Rev. 12:12) Li inportan ki nu “kontiyn gayn puvwar dan Senyer ek dan pwisans so lafors” pu ki nu “kapav reziste dan zur move ek, apre ki [nu] finn fer tu kitsoz byin, [nu] tini ferm.”—Efe. 6:10, 13.
2 Reyni ansam avek nu bann konpaynon dan lafwa li enn laranzman ki Zeova finn fer pu ed nu pu gayn lafors. Lapot Pol ti konpran linportans ki sa ena. Li ti anvi res avek so bann frer Kretyin pu ki zot kapav “ankuraze ansam” ek “vinn ferm.” (Rom. 1:11, 12, not.) Pu nu gayn lafors pu fer volonte Bondye, Kolez Santral finn pran bann dispozisyon avek lamur pu donn nu lokazyon pu profit enn esanz lankurazman dan prosin Lasanble Distrik “Bann Proklamater Rwayom Ki Zele.”
3 U Bizin Prezan pu U Tir Profi: Fixe lobzektif pu u prezan tuletrwa zur. ‘Numem nu pu tir profi’ si nu ariv avan premye kantik ek nu res ziska nu dir avek tu nu leker “Amenn” dan lapriyer final. (Izai 48:17, 18) Buku pu bizin aranz zot program travay byin an avans pu ki zot gayn letan lib pu asiste tuletrwa zur. Li vre ki li pa tuzur fasil pu demann u patron konze, me nu ena lasirans ki Zeova pu ed nu pu fer so volonte. (1 Zan 5:14, 15) Si nu pankor fer li, se asterla mem ki nu bizin kumans ekonomiz larzan pu pey transpor ek pran tu bann prekosyon neseser, olye nu dir nu gete kuma nu pu fer. Nu kapav sir ki Zeova pu beni nu bann zefor pu asiste tuletrwa zur.—Pro. 10:22.
4 Atann Lankurazman Avek Inpasyans: Eski u’nn deza kit enn lasanble Distrik avek sa bann parol la: “Sa mem pli meyer lasanble ki mo’nn kapav asiste!” Kifer eski u’nn finn ena sa santiman la? Parski antan ki bann dimunn inparfe, avek letan nu kapav fatige ek santi ki nu bizin lankurazman spirityel. (Izai 40:30) Enn ser ti explike: “Sa sistem la pe minn mwa, me bann lasanble ed mwa pu rekonsantre lor mo pozisyon spirityel; zot donn mwa lafors spirityel ki mo bizin. Kumadir lankurazman la vinn dan ler ki mo plis bizin li.” Sirman u’si, u’nn gayn bann mem santiman, pa vre?
5 Nu gayn lankurazman ki bizin pa zis atraver bann diskur ek bann intervyu, me usi atraver bann lezot partikilarite nu bann lasanble ki anrisi nu spirityelman. Enn frer ti fer sa komanter la: “Se laplikasyon kler ek pratik bann prinsip Labib ki mo vremem apresye [dan lasanble]. Byinsir, bann dram zot byin itil pu montre kuma nu kapav tir profi ar bann legzanp lontan, bon ek move tulede. Mo tuzur atann avek inpasyans bann nuvo piblikasyon ki pu paret, ek mo kontiyn apresye zot mem lontan apre ki mo’nn return kot mwa.”
6 Bann lasanble zot enn laranzman inportan ki Zeova finn fer dan sa bann “letan kritik pu fer fas” la. (2 Tim. 3:1) Zot ed nu pu ekut konsey Bondye: “Res eveye, tini ferm dan lafwa, azir kuma bann zom, vinn for.” (1 Kor. 16:13) Donk, anu determine pu asiste sak sesyon ek profit an abondans esanz lankurazman dan nu Lasanble Distrik “Bann Proklamater Rwayom Ki Zele!”
[Lankadre lor paz 3]
Organiz U pu Asiste Tuletrwa Zur
■ Demann konze dan travay.
■ Kumans ekonomiz larzan pu u transpor.
■ Pran tu bann prekosyon neseser.