Kontant U ar Seki U Ena
1 Labib ankuraz nu pu donn nu fami seki li bizin lor plan materyel, me fode pa ki sa vinn lobzektif prinsipal dan nu lavi. Bann kitsoz spirityel bizin vinn an premye. (Mat. 6:33; 1 Tim. 5:8) Truv lekilib ki bizin li enn defi dan sa “bann letan kritik ek difisil pu siporte” la. (2 Tim. 3:1) Ki pu ed nu fer sa?
2 Adopte Pwindevi Labib: Parol Bondye averti nu ki rod rises kapav koz nu larwinn spirityel. (Ekl. 5:10; Mat. 13:22; 1 Tim. 6:9, 10) Dan sa peryod kritik la, li pu enn katastrof pu ninport kisannla parmi nu pu tro kas latet avek travay profann uswa bann lintere finansye ki nu met bann aktivite spirityel—bann reynion, letid, ek predikasyon—dezyem plas dan nu lavi. (Lik 21:34-36) Parkont, Labib donn sa konsey la: “Si nu ena manze ek linz, nu pu kontant nu ar sa mem.”—1 Tim. 6:7, 8.
3 Sa pa vedir ki demann bann Kretyin viv volonterman dan povrete. Me sa konsey la ed nu pu rekonet ki nu bann bezwin materyel ete—manze, linz, ek enn lakaz konvenab pu nu reste. Si nu ena bann nesesite lavi, fode pa nu kontiyn tuletan rod gayn plis kitsoz ek pli bon kalite kitsoz. Kan nu pe pans pu aste enn kitsoz uswa pu pran enn lot travay, nu bizin demann numem, ‘Eski sa vremem neseser?’ Sa pu ed nu pu swiv sa konsey inspire la: “Fode ki dan zot manyer viv pena lamur pu larzan, alor ki zot kontant zot ar seki zot ena asterla.”—Ebre 13:5.
4 Si nu kont lor Zeova, Li pu beni nu. (Pro. 3:5, 6) Mem si nu bizin travay dir pu gayn seki nu bizin sak zur, fode pa nu santre nu lavi lor sa bann kitsoz la. Ki nu ena tigit uswa buku, nu kont lor Zeova pu satisfer nu bann bezwin. (Fil. 4:11-13) So rezilta: nu zwir kontantman ek buku lezot benediksyon ki Bondye done.
5 Imit Lafwa Lezot: Enn paran ki ti pe elve so tifi tusel dan semin laverite ti sinplifye so lavi tigit par tigit. Malgre ki li ti zwir konfor so lakaz, li ti demenaze pu al res dan enn pli tipti lakaz ek plitar dan enn lapartman. Sa ti permet li diminye bann ler so travay profann pu ki li kapav pas plis letan dan minister. Apre ki so tifi finn grandi ek marye, mama la ti pran so retret avan ler, mem si sa ti vedir diminye so bann reveni. Asterla nu ser dan so setyem lane pyonye permanan ek li pa regret bann sakrifis materyel ki li’nn bizin fer pu met bann lintere Rwayom an premye dan so lavi.
6 Enn ansyin ek so fam finn pyonye pandan plizir lane alor ki zot ti pe elve trwa zanfan. Antan ki enn fami, zot ti aprann pu kontant zot pu satisfer zot bann bezwin plito ki satisfer zot bann dezir. Frer la dir: “Nu’nn bizin amenn enn lavi pli sinp. Mem si nu’nn pas par bann moman difisil, Zeova finn tultan donn nu seki nu bizin. . . . Kan mo truv mo fami met bann lintere spirityel an premye kumsa, mo ena santiman ki tu pe pas kuma bizin, ek ki mo lavi enn sikse.” So fam azute: “Kan mo truv [mo mari] okipe avek bann kitsoz spirityel, mo resanti enn profon satisfaksyon.” Bann zanfan usi kontan ki zot paran ti deside pu servi Zeova aplintan.
7 Pu tu bann ki swazir sa kalite semin latasman ar Bondye la olye zot rod bann kitsoz materyel, Labib promet enn kantite benediksyon asterla ek dan lavenir.—1 Tim. 4:8.