“Briye Kuma Bann Lalimyer Ki Ekler Lezot”
1 Dan sa lemond ki dan teneb lor plan spirityel ek moral la, ena apepre sis milyon adorater vre Bondye Zeova ki pe “briye kuma bann lalimyer ki ekler lezot” dan 243 peyi lor later antye. (Fil. 2:15) Akoz sa, bann dimunn remark nu byin. Kuma eski nu reflekte sa lalimyer laverite ki ena buku valer ek ki sorti kot Zeova la?—2 Kor. 3:18.
2 Nu Bann Aksyon: Bann dimunn pa tarde pu remark nu kondwit. (1 Pyer 2:12) Enn madam ti remarke ki so koleg, ki ti enn Temwin, ti byin zanti ek ti kontan ed lezot. Li pa ti ena enn langaz ki sal ni li ti kas enn riye kan lezot pe rakont bann dyok malprop. Kan lezot ti servi bann mo grosye pu sey provok sa Temwin la, li ti res kalm. Me an mem tan li ti res ferm pu seki drwat. Ki lefe sa finn ena lor sa madam la? Li dir: “Mo ti telman inpresyone par so kondwit ki mo finn kumans poz bann kestyon lor Labib. Mo finn kumans etidye Parol Bondye ek plitar mo finn batize.” Li azute: “Se so kondwit ki finn pus mwa pu egzaminn krwayans bann Temwin Zeova.”
3 Bann dimunn remark byin bann Temwin Zeova. Zot remark nu bon latitid anver lotorite, kuma nu konsider bann pratik sa lemond la ek nu bon fason koze. Akoz sa, zot konsider nu kuma bann dimunn ki viv an akor avek bann prinsip Labib ki byin siperyer. Sa bann bon aksyon la donn Zeova laglwar ek atir lezot ver so ladorasyon.
4 Nu Bann Parol: Byinsir, bann ki truv nu bon kondwit kitfwa pa kone kifer nu diferan ar lezot, amwin nu koz ar zot ek nu explik zot nu bann krwayans. Eski u bann koleg travay uswa u bann kamarad lekol, kone ki u enn Temwin Zeova? Eski u rod bann lokazyon pu sanz enn sinp konversasyon an enn lokazyon pu rann enn temwaynaz? Eski u byin deside pu fer ‘u lalimyer briye devan bann zom’ sak fwa ki u gayn lokazyon?—Mat. 5:14-16.
5 Si nu’le ranpli nu misyon antan ki bann lalimyer ki ekler lezot, nu bizin ena enn lespri sakrifis. Si nu ena enn lespri sakrifis, nu pa pu tro kas nu latet ar bann kitsoz ki pa vremem inportan. Ek sa pu permet nu fer maximem dan laktivite predikasyon ek fer bann disip. Nu pa bliye ki se enn travay ki kapav sap lavi bann dimunn.—2 Kor. 12:15.
6 Anu kontinye briye kuma bann lalimyer ki ekler lezot par nu bann parol ek nu bann aksyon. Si nu fer sa, sa kapav pus lezot pu zwenn ansam avek nu pu donn Zeova laglwar.