Bann jeune ki pé brillé couma bann flambeau
1. Couma eski la Bible montré ki dimoune ti pou remark bann chrétien, ek couma sa bann parole-la applik pou bann jeune chrétien zordi?
1 Jésus ti dire so bann disciple: “Zot-mem la lumiere le monde.” (Mat. 5:14, 16) Tou dimoune ti pou remark zot pareil couma remark enn la-ville ki dan enn hauteur ek ki pé brillé dan soleil. Zordi, beaucoup jeune chrétien pé “brillé dan le monde couma bann flambeau” grace a zot conduite droite ek temoignage ki zot donné avek zèle.—Phil. 2:15; Mal. 3:18.
2. Couma eski ou kapav laisse ou la-lumiere brillé dan lekol grace a ou conduite?
2 Dan bann activité toulé-jour: Enn fason ki ou kapav surtout brillé couma enn flambeau, c’est par ou conduite ek fason ki ou habillé ek coiffé avek modestie. (1 Cor. 4:9; 1 Tim. 2:9) Kan bann zeleve ek bann professeur trouvé ki ou conduite different, certain kapav attiré par la verité a cause ou bon conduite, ek sa kapav donne ou enn l’occasion pou partage bann verité ki ena dan la Bible. (1 Pierre 2:12; 3:1, 2) Kitfois li pa facile pou ena enn bon conduite, mais Jéhovah pou donne ou enn quantité benediction.—1 Pierre 3:16, 17; 4:14.
3. Cite certain fason ki ou kapav donne temoignage ar ou bann professeur ek bann camarade dan ou classe.
3 Certain jeune inn profite bann discussion ki ena dan classe lor bann sujet couma la drogue, l’evolution, ek l’histoire pou faire konn zot bann conviction personnel ki basé lor la Bible. Lezot finn gagne l’occasion pou reponn bann question lor zot croyance kan bann professeur inn aborde bann sujet ki concerne bann croyance religieux. Beaucoup professeur finn impressionné par courage sa bann jeune-la. Pou faire lezot interessé avek bon nouvel, ou kapav aussi lire bann publication dan l’heure break ou-soit laisse zot dan bann place kot lezot pou trouve sa.
4. Cite certain l’avantage ki gagné kan donne temoignage dan lekol?
4 Kan ou laisse ou la-lumiere brillé dan lekol, sa fortifié ou la-foi ek ou pou senti-ou fiere pou servi Jéhovah. (Jér. 9:24) Sa aussi servi couma enn protection. Enn soeur dire: “Enn l’avantage ki mo gagné kan mo koz lor mo bann croyance, c’est ki bann zeleve pa rod mette pression lor moi pou mo faire bann kitsoz ki pa en harmonie avek seki la Bible dire.”
5. (a) Couma certain jeune pé faire plus dan predication? (b) Mais ou, ki ou bann l’objectif spirituel?
5 Faire plus dan predication: Enn lot fason ki bann jeune pé brillé couma bann flambeau, c’est kan zot faire plus dan predication. Kan li ti fini college, enn frere ti demenagé pou al servi kot ti bizin plus proclamateur. Li ti al dan enn ti congregation kot ti ena enn sel ancien. Li ti ecrire enn camarade: “Ici, mo pé passe par bann pli bon moment mo la-vie. Li tellement bon pou preché! Nou koz apepré 20 minute devant chaque la-porte parski bann dimoune envie ecoute tou seki nou ena pou dire.” Li ti ajouté: “Mo zis souhaité ki tou bann jeune faire enn l’experience coumsa, ek ressenti seki mo ressenti. Pena nanyin ki pli bon ki servi Jéhovah avek tou seki nou ena.”
6. Kifer ou fiere sa bann jeune ki dan ou congregation-la?
6 Nou bien fiere nou bann jeune ki pé brillé dan le monde couma bann flambeau! (1 Thess. 2:20) Kan ou servi Jéhovah avek tou ou leker, ou nâme, ou l’esprit, ek ou la-force, ou pou recolté “cent fois plus asterla-mem . . . ek dan le monde ki pé vini, la vie eternel.”—Marc 10:29, 30; 12:30.