Bann Anges Pé Aide Nou
1 “Guetté! Mo avec zot toulé-jours ziska la fin sa système-la.” C’est enn grand l’encouragement pou bann ki pé suivre commandement Jésus pou ‘al prêché ek faire bann disciples’! (Mat. 28:18-20) Enn façon important ki Jésus “avec” bann vrai Chrétiens, c’est kan li aide zot par moyen so bann anges. (Mat. 13:36-43) Oui, c’est vrémem enn grand la joie pou annonce la “bonne nouvelle éternelle” en harmonie avec sa bann fidèle créatures spirituel-la!—Rév. 14:6, 7.
2 Dans Nou Ministère: La Bible dire nou ki Jéhovah envoye bann anges “pou servi bann ki pou gagne la délivrance.” (Héb. 1:14) Au premier siècle, bann anges ti joué enn grand rôle dans la prédication. Zot ti dirige bann disciples Jésus vers bann dimoune sincère. (Actes 8:26) Zordi aussi, bann serviteurs Bondié trouvé couma bann anges pé contigne dirige zot. Dans beaucoup l’occasion, bann dimoune, finn dire ki zot ti pé prié pou gagne l’aide kan enn Témoin finn tape zot la porte. Ensemble avec bann anges, nou vrémem content kan nou trouve bann dimoune montré l’intérêt pou la bonne nouvelle!—Luc 15:10.
3 Devant l’Opposition: Daniel ek so trois compagnons Hébreux, l’apôtre Pierre, ek beaucoup lézot serviteurs encore, ki finn konn bann grand l’épreuves, finn trouvé couma Jéhovah finn protège zot par moyen bann anges “bien puissant.” (Ps. 103:20; Dan. 3:28; 6:21, 22; Actes 12:11) Parfois li arrivé ki nou senti nou impuissant devant l’opposition. Mais lerla nou kapav gagne courage kan nou rappelle l’experience serviteur Elisha. Li ti aprann ki “bann ki ar nou, zot plus nombreux ki bann ki ar zot.” (2 Rois 6:15-17) Mem si bann opposants servi la force pou sépare nou avec nou bann frères Chrétiens, fodé pa nou découragé. Parole Bondié donne nou sa l’assurance-la: “Ange Jéhovah pé veille lor bann ki ena la crainte pou Li.”—Ps. 34:7.
4 Bientôt, bann l’armée anges pou sorti ek zot pou enlève tou l’opposition contre domination Jésus Christ. (Rév. 19:11, 14, 15) Pendant ki nou pé atann sa jour-la, anou contigne glorifié Jéhovah avec courage, confiant ki nou éna soutien total l’armée bann anges ki dirigé par Jésus Christ.—1 Pierre 3:22.