Eski Prezize Inn Kontaminn Ou?

Bann dimounn kapav ena bann prezize pa zis anver bann dimounn ki ena enn lot nasionalite, ras, tribi, ouswa lang, me osi anver bann dimounn ki ena enn lot relizion, sex, ouswa nivo sosial. Sertin ziz lezot dan enn fason negatif akoz zot laz, zot ledikasion, zot andikap, ouswa zot laparans fizik. Me pourtan, pou sa bann dimounn-la zot pena okenn prezize.

Eski ou’nn kontamine par sa viris-la? Laplipar parmi nou kapav rekonet kan lezot ena bann prezize. Me li difisil pou trouve ki noumem nou ena bann prezize. Laverite se, ki nou tou nou ena inpe sa viris-la dan nou. David Williams, enn profeser sosiolozi, dir ki kan bann dimounn ena bann panse negatif lor enn group dimounn ek ki apre zot zwenn enn dimounn dan sa group-la “zot pou tret sa dimounn-la dan enn lot fason, san ki zot realize ki zot inn fer sa.”

Par exanp, enn misie ki apel Jovica, res dan bann pei Balkan, kot ena enn ti group dimounn ki boukou pa kontan. Li dir: “Mo ti panse ki bann ki ti dan sa group-la pa ti kapav bann bon dimounn. Me pou mwa sa pa ti bann prezize, sa ti zis enn realite.”

Boukou gouvernman finn met bann lalwa pou lit kont rasism ek lezot prezize. Me kanmem sa, ankor ena bann prezize. Kifer? Parski sa bann lalwa-la kondann zis bann aksion ki enn dimounn fer, me zot pa kapav kontrol seki li panse ek resanti. Ek se dan lespri ek leker enn dimounn ki bann prezize koumanse. Eski savedir ki sa lalit kont prezize la, se enn lalit ki nou’nn fini perdi? Eski ena enn remed kont prezize?