Montre Lamour

Kifer?

Parski bann prezize pa disparet enn kout koumsa. Parey kouma sa demann letan ek zefor pou fer enn viris disparet, pou bann prezize osi li parey, sa pou demann letan ek zefor. Ki ou kapav fer pou tir prezize dan ou leker?

Prinsip Labib

Zimaz: 1. Enn misie Aziatik pe tini laport pou enn misie nwar ki pe sarye kafe. 2. Sa mem misie nwar la pe partaz kafe avek so bann koleg travay, parmi ena enn madam Indien, ki lor lot zimaz-la.

“Abiy zot ar lamour, parski li enn kitsoz parfe ki soud nou tou ansam.”—KOLOSIEN 3:14, NW.

Ki savedir? Bann dimounn vinn pli pros, kan zot fer bann bon aksion pou lezot. Ou pou ena mwins tandans pou ena bann prezize si ou montre plis lamour anver lezot. Kan ou aprann pou plis kontan bann dimounn, sa pou ed ou pou lit kont bann santiman negatif ki ou ena anver zot.

Seki Ou Kapav Fer

Zimaz: 1. Enn madam Indien pe ed enn madam Blan ki aze pou mont leskalie avek so bann komision. 2. Sa mem vie madam Blan la pe amenn biskwi pou so vwazin, ki sa misie Aziatik dan lot zimaz la.

Reflesi lor bann kitsoz presi ki ou kapav fer pou montre lamour anver bann dimounn lor ki ou ena bann prezize. Li pa neseser fer bann gran-gran kitsoz. Esey aplik enn ouswa plizir parmi sa bann sigzesion-la:

Sak ti aksion ki ou fer pou montre lamour, pou elwagn ou ar bann prezize

Montre bann bon manier anver bann dimounn sa group-la, kan ou tini laport pou zot ouswa kan ou donn zot ou plas dan bann transpor piblik.
Koumans enn ti konversasion avek zot, mem si zot pa koz bien ou lang.
Montre pasians kan zot azir dan enn fason ki ou pa konpran.
Si zot pe koz lor zot bann problem, montre konpasion.