Met Nou dan Plas Lezot

Kifer?

Parski si nou plis konsantre lor bann diferans ki ena ant lezot ek nou, nou kapav krwar ki sa bann diferans-la se bann defo. Lerla, sa kapav fer nou ena bann prezize anver bann dimounn ki diferan ar nou. Enn fwa ki nou trouv lezot dan enn move fason, li pou vinn difisil pou met nou dan zot plas. Ek sa kapav enn sign ki nou ena enn problem ki pli grav, setadir ki nou ena bann prezize.

Prinsip Labib

“Partaz lazwa avek bann ki dan lazwa, partaz lapenn avek bann ki dan lapenn.”​—ROMIN 12:15.

Ki savedir? Nou kapav explik sa prinsip-la dan de-trwa mo: met nou dan plas lezot. Alor nou pou kapav resanti seki lezot resanti.

Kouma kan Nou Met Nou dan Plas Lezot sa Kapav Ed Nou?

Kan nou met nou dan plas lezot, nou realize ki kantite nou parey kouma zot. Kitfwa nou pou dekouver ki zot reazir parey kouma nou ek ki zot ena mem santiman ki nou. Kan nou met nou dan plas lezot, sa pou ed nou pou trouve ki tou dimounn parey, ek sa ninport ki so ras, so ran sosial, so kiltir, ouswa so ledikasion. Plis nou konsantre nou lor lide ki zot parey kouma nou, mwins nou pou ena tandans pou ziz zot.

Kan nou fer sa, sa pou ed nou osi pou ena respe pou lezot. Anne-Marie, enn Senegalez, ti mepriz bann dimounn ki ti ena enn nivo sosial ki pli ba ki li. Me kan li’nn met li dan plas lezot, li’nn trouve ki sa inn ed li boukou. Li dir: “Kan mo’nn trouve ki kantite bann dimounn ki ena sa nivo sosial-la ti pe soufer, mo’nn demann momem ki mo ti pou resanti si mo ti dan zot plas. Gras-a sa, mo ti koumans realize ki mo pa ti pli siperyer ki sa bann dimounn-la. Mo pa ti fer nanye ki ti fer mwa vinn pli bon ki zot.” Wi, si nou fer zefor pou konpran bann problem ki lezot gagne, nou pou ena plis tandans pou konpran zot, olie ki nou kritik zot.

Seki Ou Kapav Fer

Si ou trouv sertin dimounn dan enn fason negatif, esey trouv bann pwin komin ki ou ena avek zot. Par exanp, mazine ki zot resanti

• kan zot pe pran enn repa avek zot fami

• apre enn long zourne travay

• kan zot pe pas letan avek zot bann kamarad

• kan zot pe ekout bann lamizik ki zot kontan

Apre sa, esey imazinn ou dan zot sitiasion. Demann oumem:

• ‘Kouma mo ti pou reazir si kikenn fer mwa resanti ki mo pena valer?’

• ‘Ki mo ti pou resanti si lezot ti ziz mwa avan mem ki zot aprann konn mwa?’

• ‘Si mo ti form parti zot group, kouma mo ti pou anvi ki lezot tret mwa?’