Bann l’ennemi touye Jésus Christ

APRÉ ki Jésus finn preché ek enseigné pendant trois an et demi, li ti koné ki la fin so la vie lor la terre ti pé approché. Bann chef religieux juif ti pé faire complot pou touye li, parski zot ti peur pangar certain parmi le peuple revolté, parski zot ti croire ki li ti enn prophete. Entre-temps, Satan ti influence enn parmi bann 12 zapotre Jésus—Juda Iscariote—pou vinn enn traite. Bann chef religieux ti offert Juda 30 piece l’argent pou ki li trahir Jésus.

Pendant so dernier la-nuit, Jésus ti reuni ensam avant so bann zapotre pou celebré Pâque. Apré ki li ti faire Juda allé, li ti etabli enn nouveau celebration, Mémorial so la mort. Li ti prend enn di-pain, ti faire enn la priere, ek li ti passe sa di-pain-la ar so 11 zapotre ki ti encore la. Li ti dire: “Sa represente mo lekor ki pou bizin donné en sacrifice pou zot. Contigne faire sa en mo memoire.” Li ti faire pareil avek enn coupe di-vin, ek li ti dire: “Sa coupe-la represente nouveau l’alliance ki existé grace a mo di-sang.”—Luc 22:19, 20.

Jésus ti ena beaucoup kitsoz pou dire so bann zapotre sa soir-la. Li ti donne zot enn nouveau commandement—ki zot montré enn l’amour sincere sakenn pou so camarade. Li ti dire: “Par sa tou dimoune pou koné ki zot mo bann disciple, si zot ena l’amour entre zot.” (Jean 13:34, 35) Li ti encourage zot pou pa laisse zot leker troublé par bann l’evenement difficile ki ti pou deroulé. Jésus ti prié avek sincerité pou zot. Zot ti chante bann cantik ensam ek pendant la nuit zot ti al dan jardin Gethsémané.

Dan jardin Gethsémané, Jésus ti a genou ek ti devide so leker dan la priere. Enn ti moment apré, enn la foule soldat avek zot zarme, bann pretre ek lezot ti vinn arrete li. Judas ti vinn pré ar Jésus ek ti embrasse li pou montré kisannla ki ti Jésus. A mesure ki bann soldat ti pé attache Jésus, so bann zapotre ti sauvé.

Jésus ti deboute devant la cour supreme juif, li ti dire ki li-mem Garson Bondié. La cour ti dire ki li coupable parski li’nn blasphemé ek ti condamne li a mort. Apré sa ti amenn Jésus devant gouverneur romain, Ponce Pilate. Mem si li ti trouvé ki Jésus ti innocent ek ki li pa ti commette okenn crime, li ti livré Jésus ar la foule ki ti pé criyé pou demann so la mort.

Ti amenn Jésus Golgotha, kot bann soldat romain ti couloute li lor enn poteau. Alors ki ti pé faire enn grand li-jour, par mirak partout ti faire noir. Plitar sa l’apré midi-la, Jésus ti mort, ek ti ena enn grand tremblement de terre. Ti mette so lekor dan enn tombe ki ti faire dan enn roche. Ek jour apré, bann pretre ti ferme tombe-la ek ti mette bann garde devant so l’entrée. Eski Jésus ti pou reste dan sa tombe-la? Non. Pli grand mirak ki jamais finn existé ti pou arrivé.

—Basé lor Matthieu chapitre 26 ek 27; Marc chapitre 14 ek 15; Luc chapitre 22 ek 23; Jean chapitre 12 ziska chapitre 19.