Jésus vivant!

TROISIEME jour apré la mort Jésus, certain madame ki ti so bann disciple, ti decouvert ki ti roule sa roche ki ti ferme l’entré so tombe-la, a coté. Bann garde ti’nn vinn coumadir bann zom mort ek tombe-la ti vide!

Deux ange ti apparette. Enn ti dire: “Zot pé rod Jésus ki sorti Nazareth. . . . [Bondié] finn releve li.” (Marc 16:6) Sans perdi le temps, sa bann madame-la ti galopé pou al dire sa bann zapotre. Lor la route, zot ti joinde Jésus. Li ti dire zot: “Pa bizin peur! Allé, al raconte sa mo bann frere, pou ki zot kapav al en Galilée; ek la-bas zot pou trouve moi.”—Matthieu 28:10.

Plitar sa jour-la, deux disciple ti sorti Jérusalem ek ti pé marché pou al dan village Emmaüs. Enn etranger ti vinn joinde zot ek ti demann zot lor ki kitsoz zot ti pé kozé. En realité, sa etranger-la ti Jésus ki ti ressuscité, ek ki ti apparette ar zot, mais zot pa ti reconette li desuite. Avek bann figure triste zot ti reponn ki zot ti pé koz lor Jésus. Sa etranger-la ti commence explik bann kitsoz ki ena enn rapport avek le Messie ki ena dan tou bann l’Ecriture. En realité, Jésus ti’nn accompli bann prophetie concernant le Messie dan tou ti detail.a Kan bann disciple ti realisé ki sa etranger-la ti Jésus ki ti’nn ressuscité en tant ki enn l’esprit, Jésus ti disparette.

Sa deux disciple-la desuite ti retourne Jérusalem. La-bas zot ti trouve bann zapotre ensam dan enn la chambre kot la porte ti fermé a clé. Alors, ki sa deux-la ti pé raconte seki ti’nn arrive zot, Jésus ti apparette. So bann disciple ti tellement etonné ki zot pa ti pé rod croire! Jésus ti demandé: “Kifer ena bann doute dan zot leker?” “Finn ecrire ki Christ pou souffert ek ki troisieme jour li pou ressuscité parmi bann mort.”—Luc 24:38, 46.

Pendant 40 jour apré so resurrection, Jésus ti apparette ar so bann disciple dan different l’occasion. Enn lot fois, li ti apparette ar plus ki 500 disciple! Kitfois c’est la kot li ti donne zot sa travail important-la: “Allé ek faire bann disciple parmi bann dimoune dan tou bann nation, . . . enseigne zot pou suive tou bann commandement ki mo’nn donne zot. Ek, guetté! Mo avek zot toulé-jour ziska la fin sa systeme-la.”—Matthieu 28:19, 20.

Dernier fois ki li ti joinde so 11 zapotre fidele, Jésus ti promette: “Zot pou gagne pouvoir kan l’esprit saint pou vinn lor zot, ek zot pou vinn mo bann temoin . . . ziska dan region pli loin lor la terre.” (Actes 1:8) Apré sa Jésus ti monte dan le ciel, ek enn nuage ti empeche zot trouve li a mesure ki li ti pé monte dan le ciel.

—Basé lor Matthieu chapitre 28; Marc chapitre 16; Luc chapitre 24; Jean chapitre 20 ek 21; 1 Corinthiens 15:5, 6.