LESON 10

Kouma Renion Bann Temwin Zeova Kapav Ed Ou?

Version Inprime

Eski ou’nn deza asiste enn renion bann Temwin Zeova? Kitfwa ou inpe per pou asiste ou premie renion. Kitfwa ou pe demann oumem: ‘Ki pase dan sa bann renion-la? Kifer zot inportan? Kifer mo bizin asiste sa bann renion-la?’ Dan sa leson-la, ou pou aprann ki kan ou zwenn bann lezot dimounn dan bann renion, sa pou ed ou personelman ek sa pou ed ou pou vinn pli pros avek Bondie.

1. Kifer bann Temwin Zeova zwenn ansam?

Enn ekrivin Labib explike kifer li bien inportan ki nou zwenn ansam: “Dan bann gran lasanble mo pou loue LESEGNER.” (Psom 26:12) Dan mem fason, bann Temwin Zeova kontan pou zwenn ansam. Partou dan lemond, zot zwenn ansam sak semenn pou loue Bondie, pou sant bann kantik, ek pou priye. De-trwa fwa dan lane, zot osi asiste bann gran rasanbleman pou ador Bondie.

2. Ki ou pou aprann dan nou bann renion?

Nou bann renion baze lor Labib. Nou explik seki ena dan Labib ‘dan enn fason bien kler ek nou fer konpran so sans.’ (Lir Neemi 8:8.) Kan ou pou asiste bann renion, ou pou aprann konn Zeova ek so bann zoli kalite. Plis ou pou aprann ki kantite Li kontan ou, plis ou pou vinn pros avek Li. Ou pou osi aprann kouma Li kapav ed ou pou ena enn lavi ki ena enn sans.—Izai 48:17, 18.

3. Kouma bann dimounn ki ou pou zwenn dan nou bann renion kapav ed ou?

Zeova demann nou pou gete ‘kouma nou kapav ankouraz nou kamarad pou ena lamour ek pou fer dibien ek pou pa abandonn nou lasanble.’ (Ebre 10:24, 25) Dan nou bann renion, ou pou zwenn bann dimounn ki vremem gagn traka zot kamarad, ek ki parey kouma ou, interese pou aprann plis lor Bondie. Ou pou tann zot partaz bann panse bien ankourazan lor Labib. (Lir Romin 1:11, 12.) Ou pou osi kapav koz avek bann lezot dimounn ki’nn reisi sirmont zot bann problem. Sa se zis de-trwa parmi bann rezon kifer Zeova anvi ki nou zwenn ansam regilierman!

ANOU GET INPE PLIS

Dekouver kouma bann renion bann Temwin Zeova pase, ek kifer li vo lapenn ki nou fer zefor pou asiste sa bann renion-la.

4. Renion Bann Temwin Zeova

Bann premie Kretien ti zwenn ansam regilierman pou ador Zeova. (Romin 16:3-5) Lir Kolosien 3:16, NW, ek apre sa, get sa kestion-la ansam:

Kouma bann premie Kretien ti ador Zeova?

Azordi, bann Temwin Zeova osi zwenn ansam regilierman pou ador Zeova. Pou kone ki pase dan bann renion, zwe VIDEO-la. Apre sa, get zimaz ki montre kouma enn renion pase, ek get sa bann kestion-la ansam:

VIDEO: Ki Pase dan Lasal Bann Temwin Zeova? (2:12)

Ki pwin komin ena ant seki pase dan nou bann renion ek seki ou’nn lir dan Kolosien 3:16, NW?
Ki kitsoz atir ou dan video-la ouswa dan zimaz-la?

Lir 2 Korintien 9:7, ek apre sa, get sa kestion-la ansam:

Kifer bann Temwin Zeova zot renion gratis?

Ansam avek ou ansegnan, gete lor ki nou pou koze dan prosin renion.

Ki parti dan renion paret pli interesan ouswa pli itil pou ou?

Eski ou ti kone?

Lor jw.org, ou pou trouve kotsa ek kan nou fer nou bann renion partou dan lemond.

Zimaz: Bann zimaz ki montre ki pe pase avan, pandan, ek apre nou bann renion. Nou trouv sa dan bann zimaz A, B, C ek D.

A. Enn misie Temwin Zeova lor lestrad; li pe fer enn diskour ki baze lor Labib dan enn renion.

Dan nou bann renion ena bann diskour, bann video, ek bann formasion pou prese ek ansegne. Nou bann renion koumanse ek fini avek enn kantik ek enn lapriyer
Ena bann parti dan nou bann renion kot lasistans kapav partisipe
Nou kontan pou akeyir tou dimounn: bann fami, bann selibater, bann dimounn ki aze, ek bann zanfan
Lantre gratis. Bann Temwin Zeova pa pas laket

5. Nou bizin fer zefor pou asiste renion

Anou get lexanp fami Zezi. Zot ti bizin mars anviron 100 kilomet depi Nazaret ziska Zerizalem, pou asiste enn levennman ki ti ena sak lane, ek anplis dan sa bann rezion-la ti ena bann montagn. Lir Lik 2:39-42, ek apre sa, get sa bann kestion-la ansam:

Eski ou panse ki li ti fasil pou al Zerizalem?
Ki kitsoz kapav anpes ou pou asiste bann renion? Ek kouma ou kapav sirmont sa bann difikilte-la?
Eski ou panse ki li vo lapenn ki ou fer sa bann zefor-la? Kifer?

Zimaz: Zozef, Mari, Zezi, ek enn frer Zezi pe prepar zot pou fer enn long vwayaz. 1. Zozef pe met bann sak lor enn bourik, Mari pe ramas manze. 2. Enn map ki montre larout depi Nazaret ziska Zerizalem.

Labib dir ki li bien inportan ki nou zwenn ansam pou ador Bondie. Lir Ebre 10:24, 25, ek apre sa, get sa kestion-la ansam:

Kifer nou bizin asiste bann renion regilierman ansam?

SERTIN DIMOUNN DIR: “To pa bizin zwenn avek lezot pou ador Bondie. To kapav lir to Labib lakaz.”

Ki verse ouswa ki lexanp ki ena dan Labib montre nou seki Zeova anvi?

SEKI NOU’NN APRANN

Asiste bann renion pou ed ou pou aprann plis lor Zeova, pou fer ou lamitie avek Li vinn pli for, ek pou ador Li ansam avek lezot dimounn.

Eski Ou Rapel?

Kifer Zeova ankouraz nou pou zwenn ansam?
Ki ou pou aprann dan nou bann renion?
Eski ou panse ki bann renion kapav ed ou dan enn lot fason ankor?

Dat ki’nn fini sa leson-la:

Mo Lobzektif

Asiste bann renion ek aprann konn bann dimounn ki mo pou zwenn laba.

Lezot lobzektif:

Mo bann lezot lobzektif

DEKOUVER

Eski ou per pou asiste bann renion? Gete kouma enn misie ki ti ena sa santiman-la ti aprann pou kontan bann renion.

Zame Nou Pa Pou Bliye Sa Lakey-La (4:16)

Enn misie ti kontan bann renion ek ti fer boukou zefor pou asiste sa bann renion-la.

Mo Ti Extra Kontan Bann Renion! (4:33)

Dekouver seki lezot dimounn panse lor bann renion.

“Kifer Mo Bizin Asiste Bann Renion?” (Lartik lor jw.org)

Aprann kouma lavi enn misie ki ti dan enn group bien violan finn sanze kan li’nn asiste enn renion bann Temwin Zeova.

« Je ne sortais jamais sans mon arme » (Latour Degard, 1^e Ziliet 2014, an Franse)