Eski Siperstisyon Diriz U Lavi?

PARTU dan lemond dimunn krwar dan bann siperstisyon. Defwa ena dimunn ki panse ki sa bann siperstisyon la ena gran valer parski zot form parti dan kiltir ki zot bann anset finn lese. Uswa kitfwa zot pa konsider sa bann kitsoz la vremem inportan ek interesan dan lavi. Dan bann gran peyi ki devlope, dimunn pa konsider bann siperstisyon kuma enn kitsoz serye. Dan lezot plas, par egzanp an Afrique, bann siperstisyon kapav byin danzere pu lavi bann dimunn.

Buku kiltir Afrikin baze lor siperstisyon. Sinema, bann program radyo, ek gran-gran liv ki finn fer an Afrique suvan koz lor siperstisyon ek bann kitsoz sirnatirel, kuma mazik, ladorasyon bann anset, ek bann portboner. Kifer eski dimunn inflyanse sa kantite la par bann siperstisyon? Kot bann siperstisyon la sorti?

Ki Ena Deryer Bann Siperstisyon?

Buku siperstisyon finn arive egziste parski dimunn per nam bann dimunn mor uswa ninport ki lespri. Dimunn interpret bann kitsoz ki arive kuma bann zefor ki sa bann lespri la pe fer pu rant an kontak avek dimunn vivan par mwayin enn menas, enn warning, uswa enn rekonpans.

Bann siperstisyon byin asosye usi ar gerizon ek medsinn. Pu laplipar dimunn ki dan bann peyi an devlopman, medsinn modern byin ser ek suvan li pa posib gayn sa. Donk, buku turn zot ver bann kutim bann anset, spiritis, ek bann siperstisyon pu rod gerizon uswa pu rod bann mwayin pu evit tom malad. Zot santi zot pli rilax ankor kan zot al get enn treter ki konn zot bann kutim olye zot al get enn dokter lopital. Donk bann siperstisyon pe kontiyn ogmante.

Bann tradisyon ki sorti dan siperstisyon fer krwar ki maladi ek bann aksidan pa sinpleman arive par sans, me se bann lafors ki dan lemond spirityel ki deryer sa. Bann treter kapav fer nu krwar ki ena enn kitsoz ki truble sa anset ki’nn mor la. Uswa bann sorsye kapav dir ki enn kikenn finn zet sor lor enn viktim par mwayin enn lot treter ki an konpetisyon avek li. Akoz samem li finn gayn enn maladi uswa aksidan finn ariv li.

Ena tu kalite siperstisyon atraver lemond, ek zot finn fane partu, sa depann lor tradisyon lokal, bann zistwar, ek bann sirkonstans. Me dapre krwayans popiler, bizin kalme enn kikenn uswa enn kitsoz ki sorti dan lemond spirityel invizib.

Eski Bann Siperstisyon Danzere Uswa Non?

Pu laplipar fami, nesans bann zimo li enn levennman spesyal ek extraordiner. Me, bann dimunn siperstisye kapav interpret sa levennman la kuma enn siyn. Dan sertin rezyon dan lwes Afrique, buku konsider sa kuma nesans bann bondye, ek zot ador bann zimo la. Si enn uswa tulede zimo arive mor, fami la bizin fer bann ti stati bann zimo la, ek ofer sa bann zidol la manze. Parkont dan bann lezot landrwa, dimunn konsider nesans bann zimo kuma enn malediksyon, opwin ki sertin paran tuy omwin enn ladan. Kifer? Zot krwar ki si tulede viv, enn zur zot pu tuy zot mama ek zot papa.

Bann legzanp kumsa montre ki mem si ena bann siperstisyon ki paret atiran ek inosan, lezot kapav byin danzere—nu kapav mem perdi nu lavi. Avek enn move linterpretasyon, enn levennman ki pa fer ditor kapav transforme pu vinn enn zafer danzere.

Wi, an realite, siperstisyon li enn krwayans, kumadir enn relizyon. Kan nu pran an konsiderasyon bann laspe danzere ki siperstisyon ena, li bon nu demann nu: Kisannla pe profit krwayans ek pratik siperstisyon?

Kot Bann Siperstisyon Sorti?

Malgre ki bann prev montre Satan egziste, sertin dimunn zordi ena tandans pu refiz krwar ki li ek so bann move lespri egziste. Me, dan lepok lager, si enn kikenn refiz rekonet legzistans enn lennmi danzere sa pu kapav amenn li ver enn katastrof. Sa kapav vre dan enn lalit kont bann kreatir spirityel ki buku pli siperyer ki nu, parski lapot Pol ti ekrir: “Nu bizin lit . . . kont bann move lespri.”—Efezyin 6:12.

Mem si nu pa kapav truv zot, bann move lespri vremem egziste. Labib rakonte ki enn lespri invizib ti servi enn serpan, parey kuma enn kikenn ki koz dan so vant ek fer krwar ki se maryonet ki pe koze. Kumsa mem li’nn koz avek Ev premye fam, ek li’nn pus li pu dezobeir Bondye. (Zenez 3:1-5) Labib idantifye sa lespri la kuma “serpan orizinel, sa kikenn ki apel Dyab ek Satan, ki pe anbet later antye.” (Revelasyon 12:9) Satan, ti reysi anbet bann lezot anz pu fer zot revolte. (Zid 6) Sa bann move anz la ti vinn bann demon, bann lennmi Bondye.

Zezi ti tir demon lor bann dimunn, ek so bann disip usi ti fer parey kuma li. (Mark 1:34; Akt 16:18) Sa bann lespri la pa bann anset mor sa, parski bann mor “pa konn nanyin ditu.” (Eklezyast 9:5) Okontrer, zot bann anz rebel ki Satan ti anbete. Fode pa nu konsider gayn kontak avek zot uswa sumet ar zot linflyans kuma enn sinp zafer. Parski zot anvi devor nu, parey kuma zot sef, Satan. (1 Pyer 5:8) Zot lintansyon se deturn nu ar sel lespwar pu limanite—Rwayom Bondye.

Labib revel enn parmi bann metod ki Satan ek so bann demon servi: “Satan pe kontiyn transform limem kuma enn anz lalimyer.” (2 Korintyin 11:14) Satan ule fer nu krwar ki li kapav fer nu viv pli byin. Donk, enn kikenn kapav paret pe gayn sertin lavantaz tanporer grasa bann lespri move. Me zot pa kapav ofer bann solisyon permanan. (2 Pyer 2:4) Zot pa kapav donn personn lavi pu tuletan ek byinto zot pu detrir. (Romin 16:20) Nu Kreater tusel ki donn vre boner ek lavi pu tuletan. Li tusel ki kapav donn nu enn pli bon proteksyon posib kont bann lafors move lespri.—Zak 4:7.

Bondye pa dakor kan nu rod led atraver bann pratik spiritis. (Deteronom 18:10-12; 2 Lerwa 21:6) Bann dimunn ki fer sa zot pe frekant lennmi, zot pe met zot dan kote bann ki azir kuma tret anver Bondye! Kan u get oroskop, u al get enn treter, uswa u gayn zafer ar ninport ki pratik siperstisyon, ondire u pe permet bann lespri move diriz u bann desizyon dan lavi. Li kumadir u pe vinn ansam avek zot pu rebel kont Bondye.

Proteksyon Kont Movezer— Eski Li Posib?

Ade,a enn misye ki res Niger, ti pe etidye Labib avek enn pyonye Temwin Zeova. Ade ti explike kifer li ti ena enn proteksyon kont movezer dan so labutik. Li ti dir: “Ena buku lennmi.” Sa kikenn ki ti pe etidye Labib avek Ade la ti montre li ki kapav fer selman Zeova konfyans pu gayn enn vre proteksyon. Li ti lir Psom 34:7 ar Ade, sa verse la dir: “Anz Zeova pe kanpe otur bann ki ena lakrint pu Li, ek Li sap zot.” Alafin Ade ti dir: “Si Zeova vremem kapav protez mwa, alor mo pu tir mo portboner.” Azordi, anviron 20 an apre, li enn ansyin ek an mem tan enn pyonye. Okenn so bann lennmi pa finn fer li ditor.

Labib montre ki letan ek bann levennman ki nu pa atann ariv ar nu tu, ki nu siperstisye uswa non. (Eklezyast 9:11) Me Zeova zame pa teste nu avek bann move kitsoz. (Zak 1:13) Nu’nn erit pese ar Adan ala kifer ena lamor ek linperfeksyon. (Romin 5:12) Ek detanzantan tu dimunn tom malad ek nu fer erer ki kapav fer nu konn bann maler. Akoz sa nu pa kapav dir ki bann move lespri responsab tu maladi uswa tu problem ki nu gayne. Sa kalite krwayans la kapav fer nu tante pu rod kalme sa bann lespri la par ninport ki mwayin.b Kan nu malad, nu bizin rod swin medikal ki bizin, non pa konsey ar Satan ki “enn manter ek papa mansonz.” (Zan 8:44) Dan sertin peyi siperstisyon ki finn erite ar bann anset ena enn gran linflyans lor lavi bann dimunn. Me bann statistik montre ki sa bann dimunn la pa viv pli lontan uswa zot pena enn pli bon lavi ki bann dimunn ki viv dan lezot peyi. Donk, li kler ki nu pa gayn okenn lavantaz dan domenn lasante kan nu siperstisye.

Bondye pli pwisan ki ninport ki move lespri, ek Li interese ar nu byinet. “Lizye Zeova lor bann ki drwat, ek so zorey ekut zot bann siplikasyon.” (1 Pyer 3:12) Nu bizin priy Li pu gayn proteksyon ek sazes. (Proverb 15:29; 18:10) Fer enn zefor pu konpran so Parol Sakre, Labib. Enn konesans egzak lor Labib samem pli bon proteksyon ki nu kapav gayne. Sa pu permet nu rekonet kifer bann move kitsoz ariv nu ek kuma pu gayn faver Bondye Tu-Pwisan.

Bann Benediksyon Ki Konesans Bondye Amene

Konesans egzak lor Zeova ek lor so proze, li kontrer ar linyorans ek siperstisyon. Me samem lakle pu gayn vre proteksyon. Nu kapav truv sa dan ka Jean, enn misye ki res Bénin. Bann siperstisyon ti byin anrasine dan so fami. Dapre bann kutim ki bann dimunn dan so tribi ti ena, enn madam ki fek donn nesans enn ti garson ti bizin res pandan nef zur dan enn ti kabann ki fer zis pu sa. Si li ti gayn enn tifi, li ti bizin res anferme dan kabann la pandan set zur.

An 1975, fam Jean ti gayn enn zoli ti garson, ki zot ti apel Marc. Jean ek so fam pa ti anvi ena nanyin afer avek bann lespri move. Me eski zot ti pu les lakrint ek presyon fer zot swiv siperstisyon ek fer mama la res dan kabann? Non. Zot ti rezet sa siperstisyon la.—Romin 6:16; 2 Korintyin 6:14, 15.

Eski fami Jean ti gayn kit problem? Plizir lane finn pase, ek asterla Marc serviter ministeryel dan kongregasyon lokal bann Temwin Zeova. Zot fami antye kontan ki zot pa ti permet siperstisyon inflyans zot lavi ek met zot byinet spirityel an danze.—1 Korintyin 10:21, 22.

Bann vre Kretyin bizin rezet tu bann pratik siperstisyon dan zot lavi ek aksepte lalimyer spirityel ki Kreater, Zeova, ek so Garson, Zezi Kris ofer. Lerla zot kapav ena enn lespri trankil parski zot kone ki zot pe fer seki drwat devan lizye Bondye.—Zan 8:32.

[Not anba paz]

[Lankadre/Zimaz lor paz 5]

Detrwa Siperstisyon Ki Popiler dan Lemond

• De baget ki tini drwat dan enn bol diri, anons lamor

• Get enn ibu an plin lizur amenn malsans

• Enn labuzi ki teyn pandan enn seremoni vedir ki bann move lespri pa lwin

• Les enn parasol tonbe anba vedir ki pu ena enn krim dan lakaz

• Poz enn sapo lor lili amenn malsans

• Son bann laklos pus bann demon

• Teyn tu bann labuzi enn sel kut lor enn gato laniverser vedir ki seki sa dimunn la finn demande pu arive

• Apiy enn balye ar lili permet bann move lespri ki dan sa balye la zet enn sor lor lili la

• Enn sat nwar travers devan u, amenn malsans

• Enn furset ki tonbe vedir ki enn misye pu vinn vizit u

• Foto enn lelefan amenn lasans si met li vizavi laport

• Enn fer-a-seval lor laport amenn lasans

• Enn sertenn lalyann ki file ar lakaz, protez kont movezer

• Pas anba enn lesel amenn malsans

• Kas enn laglas vedir pu ena 7 an malsans

• Les dipwav tonbe vedir u pu ena enn dezakor avek u pli bon kamarad

• Les disel tonbe amenn malsans amwin ki u pran enn tipe u zet par deryer u zepol gos

• Si u les enn fotey ki balanse, balanse san ki ena enn dimunn ki asiz ladan, u pe invit bann demon pu vinn asiz lor la

• Les bann sulye anba lao amenn malsans

• Kan enn kikenn mor, bizin les bann lafnet uver pu ki nam la ale

[Lankadre lor paz 4]

Libere Ar Bann Linflyans Siperstisyon

Bann Temwin Zeova ti pe prese dan enn kartye an Sud Afrique. Zot ti tap enn laport ek enn madam finn sorti. Madam la ti’nn met enn gran Sangoma, enn linz ki bann sorsye mete. Zot ti anvi ale, me madam la ti insiste pu zot prezant zot mesaz. Enn parmi bann Temwin la ti lir Deteronom 18:10-12 pu montre li seki Bondye panse lor bann pratik spiritis. Sorsye la ti ekut mesaz la ek li ti aksepte enn letid Labib. Li ti dir ki, si letid Labib resi pruv li ki travay kuma enn Sangoma li kont volonte Zeova, li pu aret fer sa.

Apre ki li’nn etidye sapit 10 dan liv Vous pouvez vivre éternellement sur une terre qui deviendra un paradis avek led Labib, li ti bril tu so trale lobze ki ti ena enn rapor avek sorselri ek li ti kumans asiste bann reynion Lasal DiRwayom. Anplis, li’nn marye sivil avek so mari mem si zot ti’nn separe depi 17 an. Asterla, zot tulede bann Temwin Zeova ki finn angaz zot avek Zeova ek zot batize.

[Zimaz lor paz 4]

Enn “Sangoma” zet bann lezo pu sey dir kifer sa dimunn ki’nn vinn get li la finn gayn problem

[Zimaz lor paz 6]

Konesans egzak lor Bondye fer nu gayn vre proteksyon ek boner