Anons Mesaz Rwayom
1 “Mo bizin anons labonn nuvel lor Rwayom Bondye, parski se akoz sa mem ki finn avoy mwa.” (Lik 4:43) Par sa bann parol la, Zezi ti idantifye tem so predikasyon—Rwayom Bondye. Zordi usi mesaz ki nu anonse li baze lor Rwayom Bondye. Dayer sa mem ki Matye 24:14 ti anonse: “Ek sa bonn nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin pu vini.” Ki bann laverite bann dimunn bizin tande lor Rwayom Bondye?
2 Rwayom Bondye pe reyne asterla dan lesyel ek byinto li pu tir tu bann guvernman imin pu ki li, li dirize. Finn fini pus Satan depi dan lesyel, ek sa sistem kot nu pe viv la finn rant dan so bann dernye zur. (Rev. 12:10,12) Sa vye move lemond Satan la pu detrir net, parkont Rwayom Bondye zame pu detrir. Li pu tuletan egziste.—Dan. 2:44; Ebre 12:28.
3 Rwayom Bondye pu donn tu bann dimunn obeisan tu bon kitsoz ki zot anvi. Li pu tir sufrans ki ena akoz lager, krim, povrete, ek dimunn pu nepli fer dominer. (Psom 46:8, 9; 72:12-14) Tu dimunn pu gayn manze an abondans. (Psom 72:16; Izai 25:6) Maladi ek tu bann andikap pu zis enn vye suvenir. (Izai 33:24; 35:5, 6) Amezir ki limanite progrese pu vinn parfe, later pu vinn enn paradi, ek bann dimunn pu res ansam dan linite.—Izai 11:6-9.
4 Nu montre ki nu anvi viv anba Rwayom Bondye par manyer ki nu viv depi asterla mem. Mesaz Rwayom bizin ena enn linflyans lor tu nu lavi, lor nu bann lobzektif ek nu bann priyorite. Par egzanp mem si nu bizin donn nu fami seki li bizin pu li viv, nu pa kapav les bann kitsoz materyel tuf bann lintere Rwayom. (Mat. 13:22; 1 Tim. 5:8) Nu bizin plito obeir lord Zezi: “Donk, avan tu kitsoz kontiyn rod rwayom ek so lazistis, ek tu sa bann lezot kitsoz la [bann kitsoz materyel ki neseser pu viv], zot pu gayne apre.”—Mat. 6:33.
5 Pwiski li ankor letan, li irzan ki bann dimunn tann mesaz Rwayom ek met li an pratik. Anu ed zot pu fer sa ‘kan nu rezonn avek zot ek konvink zot konsernan Rwayom Bondye.’—Akt 19:8.