Sazes Bondye Pli Siperyer!
1 Ena dimunn panse ki bann Temwin Jéhovah ti bizin konsantre zot zefor plis pu ed bann dimunn fer fas ar zot problem. Si zot pans kumsa, se parski zot pankor konpran valer nu predikasyon. Li parey kuma lapot Paul ti ekrir: “Kan koz poteau de supplice avek bann ki pe al detrir, pu zot se enn koze bet; me pu bann ki pe al sape, se pwisans Bondye.” (1 Cor. 1:18) Wi vremem, nu kone ki nu minister Kretyin, sa mem travay pli inportan ki pe fer lor later zordi.
2 Dimunn Pe Kapav Viv Pli Byin Depi Asterla Mem: Zefor ki bann imin inn fer pu rezud problem limanite pa’nn donn gran soz. Lalwa pa’nn kapav anpes krim ogmante. Malgre bann lakor ki finn siyne ek bann grup ki la pu gard lape, lager pe kontiyne. Bann program led sosyal pa’nn reysi anlev la povrete. (Ps. 146:3, 4; Jér. 8:9) Parkont, mesaz Rwayom Bondye finn transform lavi plizir milyon dimunn. Sa finn ed zot pu sanz zot personalite pu fer Bondye plezir. (Rom. 12:2; Col. 3:9, 10) Kumsa, depi asterla mem zot pe viv pli byin.—1 Tim. 4:8.
3 Enn Lavenir Sir: Wi, grasa sazes Bondye nu pe kapav fer fas ar bann problem ki nu gayne dan lavi. Me pa fini, sazes Bondye permet nu asir usi nu lavenir. (Ps. 119:105) Li fer nu evit bann zefor initil pu rod sanz sa lemond-la. (Eccl. 1:15; Rom. 8:20) Kumsa nu pa gaspiy nu legzistans pu purswiv bann lobzektif ki dan vid. Ek nu rekonesan anver Bondye pu sa. Plito, nu konsantre nu zefor lor promes sir ki Jéhovah inn fer pu etabli “nuvo lesyel ek nuvo later” kot pu ena la zistis. Kan zur zizman Jéhovah arive, bann dimunn juste pu truve ki zot ti ena rezon met zot konfyans an Jéhovah.—2 Pierre 3:10-13; Ps. 37:34.
4 Sazes Bondye kapav pa paret pratik pu bann ki avegle par sazes sa lemond-la. (1 Cor. 1:21; 2:6-8) Me nu bizin admet kanmem, ki se selman sazes Bondye ki kapav fer nu konn vre boner. Akoz sa, nu kontiyne proklam mesaz Bondye partu lor later parski Bondye “tusel ki saz.”—Rom. 16:27.