Faire zeffort pou preche avek bann missié
1. Ki besoin urgent ena a cause la predication?
1 Pendant sa bann dernier jour ki nou pé vive-la, travail predication la bonne nouvelle lor Royaume Bondié pé contigne augmenté. A cause sa, nou bien bizin bann zom spirituel ki qualifié, pou prend la tête. (Marc 4:30-32; Actes 20:28; 1 Tim. 3:1-13) Selman, dan certain l’endroit ena moins missié ki madame ki pé accepté message lor Royaume Bondié. Dan certain culture, bann zom laisse zot femme prend responsabilité pou donne zot zenfant enn education religieux. Couma nou kapav encourage pli beaucoup missié pou zot conscient zot bann besoin spirituel ek pou vinn ensam avek nou dan vrai l’adoration?
2. Ki bon resultat Paul ek Pierre finn gagné kan zot ti faire zeffort pou rann temoignage avek bann missié?
2 Faire zeffort pou joinde bann missié: Kan enn chef de famille accepté la verité, souvent li influence lezot dan so famille pou vinn ensam ar li dan vrai l’adoration. Par exemple, kan Paul ek Silas ti dan prison, zot ti rann temoignage enn gardien prison. Sa missié-la ek tou so famille ti prend bapteme. (Actes 16:25-34) Plitar kan Paul ti preche dan Corinthe, “Crispus, president synagogue ti vinn enn croyant dan le Seigneur, ek tou so famille aussi.” (Actes 18:8) Jéhovah ti servi Pierre pou rann temoignage Corneille, enn officier dan l’armée ki ti “enn zom ki ti attaché avek Bondié ek ki ti ena la crainte pou Bondié.” Corneille, ensam avek so bann famille ek so bann camarade proche ti prend bapteme.—Actes 10:1-48.
3. Pareil couma Philippe, avek kisannla ou kapav donne temoignage?
3 Rann temoignage avek bann zom “ki ena enn grand position” kapav ena bann l’effet ki nou pa attann. (1 Tim. 2:1, 2) Par exemple, ange Jéhovah ti conseil Philippe pou koz avek “enn zom ki ti ena pouvoir,” ki ti responsable tou bann tresor la reine l’Éthiopie. Philippe ti tann sa missié-la “lire fort livre prophete Isaïe” ek Philippe ti explik li la bonne nouvelle concernant Jésus. Sa Éthiopien-la ti vinn enn disciple ek li parette ki li ti partage la bonne nouvelle pendant ki li ti pé voyagé pou al dan so pays. Kitfois li’nn rann temoignage ar la reine ek bann ki ti travail avek la reine—bann dimoune ki kitfois pa ti pou ena beaucoup l’occasion pou tann la bonne nouvelle.—Actes 8:26-39.
4. Couma nou kapav donne bann missié plus l’occasion pou tann la bonne nouvelle?
4 Couma pou contacté pli beaucoup missié: Parski souvent bann missié dan zot travail pendant la journée, eski ou kapav modifié ou programme pou passe plus le temps dan ministere dan tantot, dan week-end ou-soit pendant bann congé publik? Kan ou rann temoignage regulierement dan bann territoire commercial, sa pou donne ou plus l’occasion pou donne temoignage bann missié ki souvent pa kot zot. Dan zot travail, bann frere kapav faire enn zeffort pou donne temoignage informel avek bann missié. Dan nou predication porte en porte, surtout dan bann territoire ki souvent nou travail, bann frere parfois kapav demandé pou koz avek chef la famille.
5. Ki enn soeur bizin faire si li joinde enn missié ki interessé ar message lor Royaume Bondié?
5 Si enn soeur inn rann temoignage avek enn missié ek si sa missié-la accepté, fodé pa ki sa soeur-la al visite sa missié-la tousel. Li kapav amenn so mari ou-soit enn lot proclamateur (enn frere ou-soit enn soeur) avek li. A mesure ki missié-la progressé, en general li pli bon ki enn frere qualifié faire so l’etude.
6. Couma nou kapav imite l’apotre Paul pou kapav “gagne plus dimoune possible”?
6 Choisir bann sujet ki pou interesse bann missié: L’apotre Paul ti prend compte so l’auditoire ek ti adapté so l’introduction pou ki li kapav “gagne plus dimoune possible.” (1 Cor. 9:19-23) Nou aussi pareil, nou bizin rod bann sujet ki pou interesse bann missié ki nou pou joinde ek nou prepare-nou pou sa. Par exemple, bann missié souvent tracassé par bann probleme economik ek politik, ou-soit couma pou prend soin ek veille securité zot famille. Zot kapav aussi interessé par bann question couma, eski la vie ena enn sens, l’avenir la terre, ek kifer Bondié permette la souffrance. Si nou servi nou bon jugement kan nou aborde bann dimoune, zot pou ecoute pli bien message lor Royaume Bondié.—Prov. 16:23.
7. Couma nou tou dan congregation kapav ena enn l’effet positif lor bann mari ki pa Témoin, mais ki assisté enn reunion?
7 Prend l’initiative pou aide bann mari ki pena mem croyance ki nou: Alors ki c’est surtout bon conduite nou bann soeur ki souvent ena enn l’influence lor zot mari ki pa Témoin, bann membre la congregation kapav aussi ena enn l’effet positif lor sa bann mari-la. (1 Pierre 3:1-4) Kan enn mari ki pa Témoin vinn reunion avek so femme, l’accueil amical ki lezot dan congregation faire li kapav donne enn grand temoignage. So presence kitfois montré ki li ena enn certain l’interet pou la verité, ek kitfois li kapav accepté enn l’etude la Bible.
8. Couma bann frere kapav faire zeffort pou aide bann mari ki pa trop interessé ar la verité?
8 De lot coté, certain mari au commencement pa trop interessé avek la Bible, mais kitfois zot pou interessé pou discute lor la Bible avek enn frere avek ki zot senti-zot a l’aise. Bann frere dan enn congregation inn faire enn zeffort special pou visite de temps en temps, enn famille ki divisé lor plan religieux. Sa bann frere-la ti discute avek mari-la lor bann kitsoz ki zot ti koné ti interesse li. Finalement sa finn tourne lor bann conversation spirituel, ek asterla li enn frere baptisé. Dan enn lot cas, enn frere ti aide enn mari ki pa Témoin pou faire enn barrage autour so lakaz. Grace a sa l’interet personnel-la, enn l’etude la Bible finn commencé. (Gal. 6:10; Phil. 2:4) Frere, kifer ou pa faire zeffort pou preche avek enn ou-soit plusieurs sa bann mari ki pa Témoin-la?
9. Ki resultat formation bann frere kapav amené?
9 Form zot pou l’avenir: Bann zom ki accepté message Royaume Bondié ek ki qualifié-zot pou gagne bann responsabilité dan service Jéhovah kapav vinn “bann zom [ki] couma bann don,” setadir bann ancien ki servi zot capacité ek zot la force pou servi bann serviteur Jéhovah dan bann congregation. (Éph. 4:8; Ps. 68:18) Volontairement ek avek zele, sa bann zom-la prend soin troupeau Bondié dan la congregation. (1 Pierre 5:2, 3) Sa bann zom-la vinn vrai-mem enn benediction pou tou nou bann frere!
10. Couma beaucoup inn profite zeffort ki Ananias ti faire pou aide Paul?
10 Par exemple, Saul ti vinn “enn zapotre pou bann nation,” mem si avant li ti persecute bann chretien. (Rom. 11:13) Au commencement, Ananias pa ti trop envie preche avek Saul a cause sa. Selman, Ananias ti suive direction nou Seigneur ek ti koz avek sa zom ki plitar ti vinn l’apotre Paul-la. Pendant plusieurs l’année, bann millier dimoune ti tire profit ar ministere Paul, ek bann million lezot dimoune pé contigne tire profit ar so bann lettre inspiré ki ena dan Parole Bondié.—Actes 9:3-19; 2 Tim. 3:16, 17.
11. Kifer nou bizin faire tou changement necessaire pou donne temoignage ar bann missié?
11 Alors, anou faire tou changement necessaire pou releve sa defi pou preche avek bann missié-la. Kan nou poursuive sa l’objectif-la, nou kapav sur ki nou pou gagne benediction Jéhovah pou bann zeffort ki nou faire pou faire so volonté ek pou prend soin bann l’interet Royaume Bondié.