Eski ou lizié simple?
1. Ki sa vedir ena enn ‘lizié simple’?
1 Seki ou lizié guetté ena enn l’influence lor ou bann action. Alors, sa bann parole Jésus-la bien adapté: “Alors, si to lizié li simple, to lekor entier pou dan la lumiere”! (Mat. 6:22) Kan nou lizié li “simple” lor plan spirituel, li concentré lor enn sel l’objectif—faire volonté Bondié. Nou mette Royaume Bondié en premier ek nou pa distraire par bann kitsoz materiel ou-soit bann l’activité inutile, ki empeche nou accompli nou ministere.
2. Ki kapav fausse nou fason pensé, mais ki kapav aide nou?
2 Nou bizin examine nou-mem personnellement: Nou fason pensé lor seki nou bizin kapav faussé par seki bann publicité faire nou croire nou bizin ou-soit par seki lezot ena. Avant ki nou decide pou faire ou-soit pou acheté enn kitsoz ki pou demann nou beaucoup le temps, kass ek la force, li bon ki nou “calcule depense” kan nou demann nou-mem: ‘Eski sa pou ameliore mo service pou Jéhovah ou-soit li pou enn obstacle pou mo service?’ (Luc 14:28; Phil. 1:9-11) Li sage aussi ki de temps en temps nou guetté couma nou kapav simplifié encore plus nou la vie pou faire plus dan nou ministere.—2 Cor. 13:5; Éph. 5:10.
3. Ki nou aprann ar enn soeur ki’nn faire bann changement pou simplifié so la vie?
3 Kan enn soeur ti commence faire pionnier permanent, li ti decide pou garde so travail a plein temps mem si enn travail a mi-temps ti pou permette li gagne assez kass pou vive. Finalement li ti tire sa conclusion-la: “Personne pa kapav travail couma enn esclave pou deux maitre. Mo ti bizin sacrifié mo bann desir pou mo gagne seki mo bizin. Mo ti realisé ki bann kitsoz materiel zot pa dure longtemps ek zot demodé vite ek moi mo ti pé fatigue moi pou gagne sa bann kitsoz-la.” So situation ti’nn permette li faire bann changement pou simplifié so la vie ek pou change travail, ek sa ti permette li pou contigne so service pionnier.
4. Kifer li urgent ki nou garde enn lizié simple dan nou lepok?
4 La fin bien pré, a cause sa, li pli important encore ki nou garde enn lizié simple. Chaque jour ki passé rapproche nou ar la fin sa systeme-la ek ar commencement le monde nouveau ki Bondié pou faire. (1 Cor. 7:29, 31) Kan nou concentré lor travail predication, nou kapav sauve nou-mem ek tou bann ki ecoute nou.—1 Tim. 4:16.