LARTIK LETID 40
KANTIK 30 Mo Bondie, Mo Kamarad, ek Mo Papa
Zeova “Geri Bann Dimounn Ki Ena enn Gran Sagrin dan Zot Leker”
“Li geri bann dimounn ki ena enn gran sagrin dan zot leker, ek Li met enn bandaz kot zot ena douler.”—PS. 147:3.
PWIN PRINSIPAL
Zeova vremem gagn traka bann ki pe soufer akoz zot lasante emosionel. Dan sa lartik-la, nou pou trouve kouma Li rekonfort bann ki ena enn gran sagrin, ek nou pou trouve osi kouma Li kapav servi nou pou rekonfort lezot.
1. Kouma Zeova trouv so bann serviter?
ZEOVA trouv tou bann difikilte ki so bann serviter gagne. Li kone kan zot ere ek kan zot sagrin. (Ps. 37:18) Ek Li bien fier kan Li trouv nou pe fer nou maximum pou servi Li mem si nou pe soufer lor plan emosionel. Anplis, Li bien anvi soutenir nou ek rekonfort nou.
2. Ki Zeova fer pou bann “ki ena enn gran sagrin dan zot leker,” ek ki nou bizin fer pou ki Li pran nou swin?
2 Kan enn kikenn ena enn gran sagrin dan so leker, Psom 147:3 dir ki Zeova “met enn bandaz” lor la. Sa verse-la dekrir kouma Zeova pran swin bann ki pe soufer akoz zot lasante emosionel. Me ki nou bizin fer pou ki Zeova pran nou swin? Anou get enn lexanp. Enn bon dokter pou fer tou seki li kapav pou ed enn kikenn ki’nn blese. Selman, pou ki sa dimounn-la geri, li pou bizin swiv bann konsey ki dokter-la donn li. Dan sa lartik-la, nou pou trouv bann konsey ki Zeova done pou bann ki pe soufer lor plan emosionel, ek nou pou trouve kouma nou kapav swiv sa bann konsey-la.
ZEOVA FER NOU KONE KI NOU ENA BOUKOU VALER POU LI
3. Kifer sertin panse ki zot pena valer?
3 Malerezman, boukou dimounn azordi nepli ena lamour pou zot kamarad. Akoz sa, zot azir dan enn move fason anver lezot, ek zot fer lezot santi ki zot pena valer. Enn ser ki apel Helena dir: “Mo’nn grandi dan enn fami kot pa ti ena lamour. Mo papa ti bien violan, ek toulezour li ti rapel nou ki nou ti bann lamone zete.” Parey kouma Helen, kitfwa twa osi lezot inn maltret twa, zot inn kritik twa, ouswa zot inn fer twa santi ki to pena valer. Ek akoz sa, kitfwa to trouv sa difisil pou krwar ki enn kikenn kapav vremem kontan twa ek gagn to traka.
4. Dapre Psom 34:18, ki Zeova resanti pou bann dimounn ki zot leker inn kase, ek ki promes Li fer zot?
4 Me mem si lezot inn tret twa dan enn move fason, to kapav sir ki Zeova kontan twa ek ki to ena valer pou Li. Zeova “pre ar bann dimounn ki zot leker inn kase.” (Lir Psom 34:18.) Alor, si to panse ki to pena valer, rapel ki Zeova inn trouv bann zoli kalite ki to ena, ek ki Li’nn atir twa ver Li, pou ki to kapav vinn pros ar Li. (Zan 6:44) Zeova bien kontan twa. Akoz sa, Li touletan pre pou ed twa.
5. Ki nou kapav aprann ar fason ki Zezi ti tret bann dimounn ki ti panse zot pena valer?
5 Nou kapav konpran santiman ki Zeova ena pou nou gras-a lexanp Zezi. Kan Zezi ti lor later, li ti bien zanti anver bann dimounn ki ti panse zot pena valer akoz fason ki lezot ti tret zot. (Mat. 9:9-12) Par exanp, kan enn madam ki ti ena enn maladi bien grav ti tous linz Zezi dan lespwar ki li geri, Zezi ti rekonfort li ek ti felisit li pou so lafwa. (Mark 5:25-34) Zezi imit bann kalite so Papa dan enn fason parfe. (Zan 14:9) Akoz sa, to kapav sir ki to ena valer pou Zeova ek ki Li trouv to bann zoli kalite, kouma par exanp to lafwa ek to lamour pou Li.
6. Ki to kapav fer si to panse ki to pena valer?
6 Sak fwa ki to ena santiman ki to pena valer, ki to kapav fer? Lir bann verse Labib ki pou montre twa ki to ena valer pou Zeova ek pran letan pou reflesi lor la.b (Ps. 94:19) Fode pa to konpar twa ar lezot, ek fode pa to konsantre twa lor bann kitsoz ki to pa kapav fer. Zeova Li rezonab ek Li pa atann ki to fer plis ki seki to kapav fer. (Ps. 103:13, 14) Si dan lepase enn kikenn inn agres twa fizikman, emosionelman, ouswa sexielman, fode pa to panse ki se to fot. Pa bliye ki Zeova pou ziz bann dimounn ki azir dan enn move fason ek ki Li ed bann viktim. (1 Pier 3:12) Sandra ti bien soufer kan li ti tipti parski bann dimounn ti maltret li. Li dir: “Mo priye Zeova souvan ek mo demann Li pou ed mwa pou trouv momem parey kouma Li Li trouv mwa.”
7. Kouma bann sitiasion ki nou’nn viv dan lepase kapav ed nou dan nou servis pou Zeova?
7 Zeova kapav servi twa pou ed lezot. Par exanp, Li’nn donn twa loner pou travay ansam avek Li dan predikasion. (1 Kor. 3:9) Akoz bann sitiasion ki to’nn viv, to kapav konpran lezot ek resanti seki zot resanti. Alor, to kapav fer boukou pou ed zot. Helen, ki nou ti mansione taler-la, ti gagn led ki li ti bizin, ek aster-la se li ki pe ed lezot. Li dir: “Avan, mo ti panse ki mo pena valer. Me gras-a Zeova, mo santi ki lezot kontan mwa, ek Zeova servi mwa pou ed lezot. Azordi, Helen ere ek li pe servi kouma pionie permanan.
ZEOVA ANVI KI NOU AKSEPTE SO PARDON
8. Dan Izai 1:18, ki kitsoz Zeova ankouraz nou pou fer?
8 Sertin serviter Zeova ankor bien trakase pou bann pese ki zot inn fer dan lepase. Selman, fode pa nou bliye ki Zeova bien kontan nou ek ki Li’nn donn laranson pou ki nou kapav gagn pardon nou bann pese. Li anvi ki nou aksepte sa kado-la! Li fer nou konpran ki, si nou “remet bann kitsoz an-ord”c avek Li, Li pou pardonn nou bann pese net. (Lir Izai 1:18.) Nou bien rekonesan ki nou Papa Zeova bliye bann pese ki nou’nn fer dan lepase, pa vre! Selman, zame Li pa bliye bann bon kitsoz ki nou fer.—Ps. 103:9, 12; Ebre 6:10.
9. Kifer fode pa nou res konsantre lor bann pese ki nou’nn fer dan lepase?
9 Si to latet fatige akoz bann pese ki to’nn fer dan lepase, konsantre twa lor seki to pe fer aster-la ek osi lor seki to pou kapav fer dan lavenir. Anou get lexanp lapot Pol. Pol ti regrete parski li ti persekit bann Kretien. Selman, li ti kone ki Zeova ti pardonn li. (1 Tim. 1:12-15) Eski Pol ti res konsantre lor bann pese ki li ti fer dan lepase? Non. Li pa ti res konsantre lor la, parey kouma li pa ti res konsantre lor tou seki li ti fer pou li vinn enn Farizien. (Fil. 3:4-8, 13-15) Olie sa, Pol ti kontign fer so maximum dan predikasion ek li ti res konsantre lor lavenir. Parey kouma Pol, nou pa kapav sanz lepase. Me azordi, nou ena gran loner pou servi Zeova ek pou fer Li plezir, ek nou kapav osi reflesi lor bann zoli promes ki Li’nn fer nou konsernan lavenir.
10. Si dan lepase nou’nn fer bann kitsoz ki’nn fer lezot ditor, ki nou kapav fer?
10 Eski to trakase parski bann kitsoz ki to’nn fer dan lepase inn fer lezot ditor. Ki kitsoz kapav ed twa? Fer tou seki to kapav pou aranz sitiasion-la. To kapav koumans par al demann dimounn-la pardon. (2 Kor. 7:11) To kapav osi demann Zeova pou ed bann ki to’nn fer ditor. Li kapav ed twa ek ed bann-la osi pou ki zot kontign servi Li ek ki zot santi zot anpe.
11. Ki nou kapav aprann ar lexanp Zonas? (Get osi lor kouvertir.)
11 Aprann ar bann erer ki to’nn fer dan lepase, ek les Zeova servi twa kouma Li Li anvi. Anou get lexanp Zonas. Olie ki li ekout Zeova ek ki li al Niniv, Zonas ti al dan lot direksion. Zeova ti koriz li ek Zonas ti aprann ar so erer. (Zonas 1:1-4, 15-17; 2:7-10) Zeova pa ti abandonn Zonas, ek Li ti donn li enn lot lokazion pou al Niniv. Sann fwa-la, Zonas ti obeir deswit. Li pa ti les erer ki li ti fer dan lepase, anpes li aksepte mision ki Zeova ti donn li.—Zonas 3:1-3.
Apre ki Zeova ti sap Zonas depi vant enn gro pwason, Zeova ti redir li al Niniv pou anons So mesaz (Get paragraf 11)
ZEOVA SERVI SO LESPRI SIN POU REKONFORT NOU
12. Kan nou gagn enn maler, kouma Zeova donn nou so lape? (Filipien 4:6, 7)
12 Kan nou gagn enn maler, sa fer nou bien soufer. Me Zeova servi so lespri sin pou rekonfort nou. Anou get lexanp Ron ek Carol. Malerezman, zot garson ti swiside. Zot dir: “Nou’nn gagn bann leprev dan nou lavi, me sa leprev-la ti pli gran leprev ki nou’nn gagne. Plizir nwit nou pa ti reisi dormi, alor nou ti priye Zeova ek nou ti santi ki Li ti donn nou lape ki mansione dan Filipien 4:6, 7.” (Lir.) Si twa osi to ena enn gran sagrin dan to leker akoz enn leprev ki to’nn gagne, devid to leker ar Zeova. To kapav koz avek Li kantite fwa to anvi. (Ps. 86:3; 88:1) Demann Li so lespri sin regilierman. To kapav sir ki Li pou touletan ekout to lapriyer.—Lik 11:9-13.
13. Kouma lespri sin kapav ed nou pou kontign servi Zeova avek fidelite? (Efezien 3:16)
13 Eski to santi twa abat net akoz enn leprev ki to’nn gagne? Lespri sin kapav donn twa lafors pou to kontign servi Zeova avek fidelite. (Lir Efezien 3:16.) Anou get lexanp enn ser ki apel Flora. Li ek so misie ti pe servi kouma misioner. Malerezman, so misie ti tronp li ek zot ti divorse. Flora dir: “Mo ti santi mwa abat net parski li ti trayir mwa. Mo ti nepli ena lafors. Mo ti dir Zeova donn mwa so lespri sin pou ki mo kapav kontign persevere. Zeova ti ed mwa pou mo geri ek pou mo fer fas ar enn sitiasion ki mo ti panse zame mo pa pou kapav sirmonte.” Sa leprev-la inn fer Flora ena plis konfians an Zeova. Li sir ki Zeova pou kontign soutenir li dan ninport ki leprev ki li gagne. Flora dir ki bann parol Psom 119:32 dekrir bien kouma Zeova inn ed li. Sa verse-la dir: “Mo pou swiv semin to bann komannman parski to finn fer enn plas pou zot dan mo leker.”
14. Kouma nou kapav les lespri sin Bondie ed nou?
14 Apre ki to’nn demann Zeova so lespri sin, ki to bizin fer? Fer bann kitsoz ki pou fer twa gagn plis lespri sin Bondie. Par exanp, asiste bann renion ek sorti predikasion. Lir to Labib toulezour; sa pou ed twa pou konpran fason panse Zeova. (Fil. 4:8, 9) Kan to lir Labib, reflesi lor lexanp bann personaz Biblik ki’nn gagn bann leprev ek lor kouma Zeova inn ed zot pou andire. Sandra, ki nou ti mansione taler-la, ti gagn bann gran leprev enn deryer lot. Li dir: “Zistwar Zozef ti bien ankouraz mwa, parski li pa ti les bann leprev ek bann linzistis ki li ti gagne, afekte so lamitie ar Zeova.”—Zen. 39:21-23.
ZEOVA SERVI NOU BANN FRER EK SER POU REKONFORT NOU
15. Kisann-la kapav rekonfort nou, ek kouma zot kapav fer sa? (Get zimaz osi.)
15 Kan nou pe soufer, nou bann frer ek ser kapav vinn “enn gran sours rekonfor” pou nou. (Kol. 4:11) Enn fason ki Zeova montre nou so lamour se atraver nou bann frer ek ser. Zot kapav rekonfort nou kan zot pran letan pou ekout nou ek kan zot konpran nou santiman. Parfwa, mem si zot pa dir nanye, zot prezans mem li ase. Zot kapav osi partaz bann verse Labib ankourazan avek nou, ouswa priye Zeova ansam avek nou.d (Rom. 15:4) Parfwa, enn frer ouswa enn ser kapav rapel nou kouma Zeova trouv nou sitiasion, ek sa kapav ed nou pou kontign andire. Nou bann frer ek ser kapav osi ed nou dan enn fason pratik. Par exanp, zot kapav kwi enn manze pou nou.
Bann bon kamarad ki kontan Zeova pou rekonfort twa ek soutenir twa (Get paragraf 15)
16. Ki nou bizin fer pou ki lezot soutenir nou?
16 Si nou anvi ki nou bann frer ek ser soutenir nou, parfwa nou bizin demann zot zot led. Nou bann frer ek ser kontan nou ek zot anvi ed nou. (Prov. 17:17) Selman, kitfwa zot pa kone seki nou resanti ouswa seki nou bizin. (Prov. 14:10) Si to pe soufer akoz to lasante emosionel, pa ezite pou partaz to santiman avek enn kamarad ki ena matirite. Fer li kone kouma li kapav ed twa. To kapav osi ouver to leker ar enn-de ansien avek ki to santi twa alez. Sertin ser inn gagn rekonfor kan zot inn koz ar bann lezot ser ki ena matirite.
17. Ki difikilte kapav anpes nou gagn lankourazman ar lezot, ek kouma nou kapav sirmont sa?
17 Pa res dan to kwin; pas letan ar to bann frer ek ser. Parfwa, nou kapav santi nou telman abat ki nou nepli anvi pas letan avek lezot. Ek parfwa, nou bann frer ek ser pa konpran nou sitiasion, ouswa zot kapav dir nou enn kitsoz ki bles nou. (Zak 3:2) Selman, fode pa to les sa bann difikilte-la anpes twa pas letan ar to bann frer ek ser, parski Zeova kapav servi zot pou ankouraz twa. Enn ansien ki apel Gavin, ek ki gagn depresion, dir: “Ena fwa, koz avek bann kamarad ouswa pas letan avek zot, samem dernie kitsoz ki mo anvi fer.” Selman, Gavin fer zefor pou frekant so bann frer ek ser, ek bien souvan, li santi li pli bien apre sa. Enn ser ki apel Amy dir: “Akoz bann sitiasion ki mo’nn viv, mo trouv sa difisil pou fer lezot konfians. Me tigit-tigit, mo pe aprann pou kontan mo bann frer ek ser ek pou fer zot konfians parey kouma Zeova. Anplis, mo kone ki sa fer Zeova plezir, alor sa rann mwa ere.”
ZEOVA SO BANN PROMES KAPAV REKONFORT NOU
18. Ki pou arive biento, ek ki nou kapav fer depi aster-la mem?
18 Biento, Zeova pou tir tou nou bann leprev ek tou nou bann sagrin. (Rev. 21:3, 4) Sa lepok-la, bann kitsoz ki ti pe fer nou soufer ‘pa pou enn pwa lor nou leker.’ (Iza. 65:17) Kouma nou’nn trouve dan sa lartik-la, depi aster-la mem Zeova ‘met enn bandaz kot nou ena douler.’ Alor, fer tou seki to kapav pou aksepte led ek rekonfor ki Zeova donn twa, ek fode zame to panse ki Li pa ‘gagn to traka’!—1 Pier 5:7.
KANTIK 7 Zeova, Nou Lafors
a Finn sanz sertin nom dan sa lartik-la.
b Get lankadre “To Ena Valer pou Zeova.”
c Pou “remet bann kitsoz an-ord” avek Zeova, nou bizin montre ki nou’nn vremem repanti. Nou fer sa kan nou demann Li pardon pou nou bann pese ek ki nou fer bann sanzman dan nou lavi. Si nou’nn fer enn pese grav, nou bizin rod led bann ansien.—Zak 5:14, 15.