Kouma Zeova Ed Nou pou Andire?

1. Kifer nou bien bizin andire, ek kisann-la ki kapav ed nou? (1 Pier 5:10)

NOU pe viv dan bann dernie zour, akoz sa nou bien bizin andire. Sertin parmi nou bann frer ek ser ena enn maladi kronik. Ena lezot ki pe bien soufer parski enn kikenn ki zot kontan inn mor. Ek ena lezot osi ki pe bizin fer fas ar persekision, ki li ar bann manb zot fami ouswa ar gouvernman. (Mat. 10:18, 36, 37) Me ninport ki difikilte ki to pe gagne, to kapav sir ki Zeova pou ed twa pou andire.—Lir 1 Pier 5:10.

2. Kouma bann Kretien gagn lafors pou andire?

² Andire vedir kontign res fidel ar Zeova ek kontign servi Li avek lazwa mem kan nou gagn bann difikilte, kan nou gagn persekision, ouswa kan nou gagn tantasion pou fer enn pese. Pou nou reisi andire, nou bizin osi gard lespwar ki nou sitiasion pou ameliore apre. Ninport ki difikilte nou gagne, nou reisi andir sa parski Zeova donn nou “sa pwisans ki plis ki seki normal la.” (2 Kor. 4:7) San so led, nou pa kapav andir bann difikilte. Dan sa lartik-la, nou pou koz lor kat dispozision ki Zeova inn pran pou ed nou pou andire. Nou pou trouve osi kouma nou kapav gagn bann bienfe ar sakenn parmi sa bann dispozision-la.

LAPRIYER

3. Kifer lapriyer se enn kitsoz extraordiner?

³ Pou ki nou kapav andir nou bann difikilte, Zeova inn fer enn kitsoz extraordiner. Mem si nou inparfe, Li’nn donn nou posibilite pou koz avek Li, ek Li ekout nou kan nou fer sa. (Ebre 4:16) Reflesi lor la: Nou kapav priye Zeova ninport ki ler ek koz avek Li lor ninport ki kitsoz. Ninport kotsa nou ete ek ninport ki lang nou koze, Li tann nou. Li mem tann nou kan nou tousel ouswa kan nou dan prizon. (Zonas 2:1, 2; Zist. 16:25, 26) Mem kan nou bien trakase ek ki nou pa kone kouma nou pou dir Zeova seki nou resanti, Li konpran seki nou anvi dir Li. (Rom. 8:26, 27) Wi, lapriyer se vremem enn kitsoz extraordiner!

4. Kan nou priye Zeova pou ki Li ed nou pou andire, kifer nou kapav dir ki sa li an-akor avek so volonte?

⁴ Dan so Parol Labib, Zeova dir nou ki “tou kitsoz ki nou demande an-akor avek so volonte, li ekout nou.” (1 Zan 5:14) Eski nou kapav demann Zeova pou ed nou pou andir nou bann difikilte? Wi, parski sa li an-akor avek so volonte. Kouma nou konn sa? Nou konn sa parski Zeova dir ki kan nou andir nou bann difikilte ek ki nou res fidel anver Li, Li kapav reponn Satan, “sa kikenn ki pe insilte [li] la.” (Prov. 27:11) Anplis, Labib dir ki Zeova anvi “montre so lafors pou bann dimounn ki pe servi Li avek tou zot leker.” (2 Kro. 16:9) Akoz sa, nou kapav sir ki Zeova anvi ed nou pou andire ek ki Li pou osi donn nou lafors pou ki nou reisi andire.—Iza. 30:18; 41:10; Lik 11:13.

5. Kouma lapriyer kapav donn nou lape lespri? (Izai 26:3)

⁵ Labib dir ki kan nou priye Zeova, “lape Bondie ki depas tou seki nou kapav konpran pou protez [nou] leker ek [nou] lespri.” (Fil. 4:7) Reflesi lor la: Kan bann dimounn ki pa servi Zeova gagn bann difikilte, zot esey tou kalite metod pou ki zot kapav gagn lape lespri, setadir pou ki zot kapav res kalm ek bliye zot bann problem. Par exanp, sertin dimounn fer bann meditasion pou ki zot kapav devid zot latet. Selman, sa li bien danzere parski kan enn kikenn fer sa bann kitsoz-la, li pe donn bann demon lokazion pou inflians li. (Konpar ar Matie 12:43-45.) Parkont, kan nou priye Zeova, lape ki Li donn nou, li pli siperyer ki ninport ki form lape ki enn kikenn kapav gagne par bann meditasion. Kan nou priye Zeova, sa montre ki nou fer Li foul konfians, ek lerla Li donn nou “lape ki dire pou touletan.” (Lir Izai 26:3.) Enn fason ki Zeova donn nou sa lape-la, se kan Li ed nou pou rapel bann verse Labib ki kapav rekonfort nou. Sa bann verse-la pou kalme nou leker ek nou lespri, parski zot pou rapel nou ki Zeova bien kontan nou ek ki Li anvi ed nou.—Ps. 62:1, 2.

6. Pou ki to kapav gagn maximum bienfe kan to priye Zeova, ki to bizin fer? (Get zimaz osi.)

⁶ Seki to bizin fer. Kan to gagn enn difikilte, dir Zeova seki to resanti. “Zet [to] fardo lor Zeova,” ek priye Li pou ki Li donn twa so lape. (Ps. 55:22) Demann Li pou donn twa sazes ki to bizin pou ki to kapav fer fas ar to difikilte. (Prov. 2:10, 11) Kan to pe sipliy Zeova pou ki Li ed twa pou andire, pa bliye remersie Li osi. (Fil. 4:6) Sak zour, esey trouve kouma Li pe ed twa pou andire, ek remersie Li pou so led ek pou bann bon kitsoz ki Li pe fer pou twa. Fode zame ki to les to bann difikilte anpes twa trouv tou bann kitsoz ki Zeova pe deza fer pou twa.—Ps. 16:5, 6.

LABIB

7. Kouma Labib kapav ed nou pou andire?

⁷ Zeova inn donn nou so Parol Labib pou ed nou pou andire. Dan Labib, ena boukou verse ki montre ki Zeova pou vremem ed nou. Par exanp, Matie 6:8 dir: “Zot Papa kone seki zot bizin avan mem ki zot demann li.” Se Zezi ki ti dir sa bann parol-la, ek Zezi konn Zeova pli bien ki ninport kisann-la. Alor, nou kapav sir ki kan nou pe soufer, Zeova kone seki nou bizin ek Li pou ed nou. Dan Labib, ena boukou zoli verse ki montre nou ki Zeova pou donn nou lafors ki nou bizin pou andir nou bann difikilte.—Ps. 94:19.

8. (a) Sit enn prinsip Labib ki kapav ed nou pou andire. (b) Ki kitsoz kapav ed nou pou rapel bann prinsip Labib?

⁸ Bann prinsip ki ena dan Labib kapav ed nou pou andire. Sa bann prinsip-la kapav donn nou sazes ki nou bizin pou nou pran bann bon desizion. (Prov. 2:6, 7) Par exanp, Labib ankouraz nou pou aret trakase pou seki kapav arive dan lavenir ek pou kont lor Zeova sak zour. (Mat. 6:34) Si nou pran labitid pou lir Labib sak zour ek pou reflesi lor la, li pou pli fasil pou nou rapel bann konsey ouswa bann prinsip kan nou pou bizin pran bann desizion ouswa kan nou pou gagn bann difikilte.

9. Kouma bann zistwar ki ena dan Labib kapav fer nou ena plis konfians ki Zeova pou ed nou?

⁹ Dan Labib, ena osi zistwar bann dimounn ki parey kouma nou ti fer Zeova konfians, ek Zeova ti ed zot. (Ebre 11:32-34; Zak 5:17) Kan nou reflesi lor kouma Zeova inn ed zot, sa pou ogmant nou konfians ki Zeova pou ed nou osi. Zeova “li nou plas kot nou al kasiet ek nou lafors, li pre pou ed nou kan nou dan problem.” (Ps. 46:1) Anplis, kan nou trouve kouma sa bann serviter Zeova la ti ena lafwa dan Li ek ti kontign servi Li kan zot ti gagn bann difikilte, sa pou ankouraz nou pou fer parey kouma zot.—Zak 5:10, 11.

10. Pou ki to kapav gagn maximum bienfe ar Labib, ki to bizin fer?

¹⁰ Seki to bizin fer. Lir Labib toulezour ek fer enn lalis bann verse ki kapav ed twa. Boukou frer ek ser inn trouve ki kan zot fer zot text dizour dan gramatin, se enn bon fason pou zot koumans zot lazourne avek enn verse ki ankourazan. Se seki ti ed Mariea kan li ti bizin okip so bann paran. So papa ek so mama toule-de ti gagn enn kanser anmemtan, ek zot pa ti res boukou letan pou viv. Marie dir: “Toule gramatin mo ti fer mo text dizour ek mo ti reflesi boukou lor seki sa ti aprann mwa. Sa ti ed mwa toulezour pou mo mazinn Zeova ek bann zoli kitsoz ki Li ansegn mwa dan Labib, olie ki mo mazinn zis bann problem ki mo ti ena.”—Ps. 61:2.

NOU BANN FRER EK SER

11. Kouma sa ankouraz nou kan nou kone ki pa zis nou tousel ki pe gagn bann difikilte?

¹¹ Zeova inn donn nou bann frer ek ser ki dan lemond antie, ek zot kapav ed nou pou nou andir nou bann difikilte. Kan nou rapel “ki tou [nou] bann frer dan lemond pe pas par sa bann mem kalite soufrans la,” sa kapav ed nou pou nou pa santi nou tousel. (1 Pier 5:9) Nou bann frer ek ser pe pas par bann mem difikilte ki nou ek zot pe reisi res fidel ar Zeova. Sa montre ki nou osi nou kapav andire!—Zist. 14:22.

12. Kouma nou bann frer ek ser kapav ed nou, ek ki nou nou kapav fer pou zot? (2 Korintien 1:3, 4)

¹² Par zot bann parol ek zot bann aksion, nou bann frer ek ser kapav ankouraz nou pou andir nou bann difikilte. Se seki bann frer ek ser ti fer pou lapot Pol. Dan bann let ki li ti ekrir, Pol mansionn nom bann frer ek ser ki ti ed li kan li ti anprizone dan enn lakaz, ek li ti remersie zot. Sa bann frer ek ser la ti ankouraz Pol, zot ti rekonfort li, ek zot ti donn li seki li ti bizin. (Fil. 2:25, 29, 30; Kol. 4:10, 11) Azordi osi, nou bann frer ek ser kapav rekonfort nou ek ed nou pou andir nou bann difikilte, ek nou osi nou kapav ed zot kan zot bizin led.—Lir 2 Korintien 1:3, 4.

13. Ki kitsoz ti ed Maya pou andire?

¹³ Anou get lexanp Maya. An 2020, lapolis dan Larisi ti fer enn lafouy dan so lakaz. Apre sa, parski Maya ti partaz so bann krwayans ar lezot, li ti bizin al devan lakour. Maya explike kouma bann frer ek ser ti bien ankouraz li dan sa bann moman bien difisil la. Li dir. “Dan sa moman-la, mo ti bien fatige, mo ti trakase, ek mo ti bien tris. Me mo bann frer ek ser ti telefonn mwa, zot ti avoy mwa bann mesaz, ek zot ti ekrir mwa bann let pou dir mwa ki kantite zot ti kontan mwa. Mo ti kone ki mo bann frer ek ser ti kontan mwa ek ki zot ti mo fami, me depi 2020, mo’nn santi sa pli bien ankor.”

14. Kan nou gagn bann difikilte, ki bienfe nou kapav gagne gras-a nou bann frer ek ser? (Get zimaz osi.)

¹⁴ Seki to bizin fer. Kan to pe pas par enn sitiasion difisil, koz sa ar to bann frer ek ser, ek pas letan avek zot. Fode pa to ezite pou rod led bann ansien. Bann ansien zot “kouma enn plas kot kapav al kasiet kont divan, enn proteksion kont gro lapli.” (Iza. 32:2) Pa bliye ki to bann frer ek ser osi pe bizin fer fas ar bann difikilte. Alor, kan to ed enn kikenn ki bizin led, to pou santi twa zwaye ek sa kapav ed twa pou andir to bann difikilte.—Zist. 20:35.

NOU LESPERANS

15. Kouma Zezi ti reisi andire gras-a so lesperans, ek kouma nou lesperans kapav ed nou azordi? (Ebre 12:2)

¹⁵ Zeova inn donn nou enn lesperans; Li’nn fer nou bann promes ki pou vremem realize. (Rom. 15:13) Ek sa kapav ed nou pou andire ziska lafin. Zezi ti reisi andir moman pli difisil dan so lavi gras-a lesperans ki Zeova ti donn li. (Lir Ebre 12:2.) Zezi ti kone ki si li ti res fidel ar Zeova, li ti pou montre ki tou seki Satan ti dir lor Zeova ti fos ek ki Zeova merite gagn laglwar. Li ti kone osi ki li ti pou al zwenn so Papa dan lesiel, ek ki avek letan, li ti pou vinn Lerwa ek li ti pou regne ansam ar bann 144,000. Dan mem fason, nou osi nou kone ki nou ena lesperans pou viv dan lemond nouvo, ek sa kapav ed nou pou andir ninport ki difikilte ki nou gagne azordi.

16. Kouma Anna ti reisi andire gras-a so lesperans, ek ki leson to kapav aprann ar seki li ti dir?

¹⁶ Anou gete kouma Anna, enn ser ki res Larisi, inn reisi andir so bann difikilte gras-a so lesperans. Kan lapolis ti aret so misie ek ti met li dan prizon an-atandan ki li pas devan lakour, Anna ti dir: “Souvan mo ti reflesi lor nou zoli lesperans konsernan lavenir ek mo ti priye Zeova lor la. Sa ti ed mwa pou mo pa tro dekouraze. Mo kone ki pou ena bann bon kitsoz ki pou vini apre sa bann leprev-la. Zeova pou gagn laviktwar lor so bann lennmi ek Li pou rekonpans nou.”

17. Kouma nou kapav montre ki nou bien rekonesan anver Zeova pou sa zoli lesperans ki Li’nn donn nou la? (Get zimaz osi.)

¹⁷ Seki to bizin fer. Pran letan pou reflesi lor zoli lavenir ki Zeova inn promet twa. Mazine kouma to lavi pou ete kan to pou dan lemond nouvo avek tou to bann kamarad ek to bann fami, ek kouma zot pou ere. Kan to fer sa, ninport ki difikilte ki to gagne azordi pou paret “tanporer ek leze.” (2 Kor. 4:17) Fer to maximum osi pou partaz bann promes Zeova ar lezot. Sa bann dimounn-la pa servi Zeova, alor sey mazine ki kantite zot lavi difisil! Zot ena boukou problem ek zot pa konn bann kitsoz extraordiner ki Zeova inn promet zot. Si to zis dir zot de-trwa kitsoz lor bann promes Zeova, kitfwa sa kapav ankouraz zot pou konn plis lor Zeova ek lor bann bon kitsoz ki so Rwayom pou fer.

18. Kifer nou sir ki Zeova pou tini so bann promes?

¹⁸ Apre ki li ti reisi andir plizir difikilte, Zob ti dir Zeova: “Aster-la, mo kone ki to kapav fer tou kitsoz, ek pena nanye ki to anvi fer ki inposib pou twa.” (Zob 42:2) Zob ti konpran ki nanye pa kapav anpes Zeova realiz So proze. Kan nou rapel ki Zeova tini so bann promes ek ki Li pou tir tou nou bann problem, sa kapav donn nou lafors pou andire. Anou pran enn lexanp pou explik sa. Fer koumadir enn madam ki bien malad, li bien dekouraze parski li’nn al get plizir dokter me personn pa’nn reisi geri li. Me apre, li gagn enn bon dokter ki dir li ki kitsoz pe rann li malad ek osi kouma li pou ed li pou ki li geri. Deswit kouma dokter-la dir li sa, sa rann li ere, mem si li kone ki sa pou pran inpe letan avan ki li geri. Aster-la, li kapav andir so maladi, parski li kone ki li ena enn zoli lavenir devan li. Li ena lespwar ki li pou geri. Dan mem fason, nou sir ki Zeova pou tini so promes pou fer later vinn enn Paradi. Alor, sa kapav ed nou pou kontign andire.

19. Ki nou bizin fer pou ki nou reisi andire?

¹⁹ Kouma nou’nn trouve dan sa lartik-la, Zeova ed nou pou andir nou bann difikilte gras-a lapriyer, Labib, nou bann frer ek ser, ek nou lesperans. Si nou fer nou maximum pou servi tou sa bann dispozision ki Zeova inn donn nou la, Li pou kapav ed nou pou fer fas ar ninport ki difikilte ki nou pe gagne aster-la. Lerla, nou pou kapav kontign andire ziska ki lemond Satan ek tou nou soufrans disparet net!—Fil. 4:13.