Kestion Bann Lekter

Ki “lide” Zeova pou met dan leker bann gouvernman biento?

Konsernan koumansman gran soufrans, Revelasion 17:16, 17 dir: “Sa dis korn ki to ti trouve la ek bebet sovaz la, zot pou ena laenn pou sa prostitie-la ek zot pou pran tou seki li ena ek zot pou met li touni; zot pou manz so laser ek zot pou bril li net dan dife. Parski Bondie ti met so lide dan zot leker pou ki zot realiz sa, wi, pou realiz zot sel lide kan zot donn bebet sovaz la zot rwayom.” Avan, dan nou bann piblikasion, nou ti explike ki “lide” ki Zeova ti pou met dan leker bann gouvernman, se pou detrir fos relizion.

Selman, nou’nn bizin sanz fason ki nou ti pe konpran sa verse-la. “Lide” ki Zeova pou met dan leker bann gouvernman se pou “donn bebet sovaz la zot rwayom.” Pou nou konpran kouma sa pou realize, anou reflesi lor de-trwa kestion.

Lor kisann-la sa profesi-la pe koze? “Prostitie-la” se “Gran Babilonn,” lanpir mondial fos relizion. “Bebet sovaz kouler rouz vif” la reprezant l’Organisation des Nations unies. Ti kree sa lorganizasion-la an 1919 pou ki li fer an-sort ki ena lape dan lemond, ek sa lepok-la, li ti apel Société des Nations. (Rev. 17:3-5) ‘Sa dis korn-la’ reprezant tou bann gouvernman ki soutenir bebet sovaz la.

Ki relasion ena ant prostitie-la ek bebet sovaz kouler rouz vif la? Prostitie-la pe ‘asiz’ lor bebet sovaz la, savedir ki li pe soutenir li ek li pe esey kontrol li.

Ki pou ariv sa prostitie-la? Bebet sovaz la ek sa dis korn-la pou telman “ena laenn pou sa prostitie-la,” ki zot pou pran tou seki li ena ek zot pou montre tou dimounn ki kantite li move. Apre sa, zot pou detrir li, parey kouma Zeova ti predir. (Rev. 17:1; 18:8) Lerla, tou bann fos relizion pou nepli existe. Selman, avan ki sa arive, Zeova pou fer bann gouvernman fer enn kitsoz ki zame pa’nn arive dan listwar.

Ki kitsoz Zeova pou fer bann gouvernman fer? Li pou met “so lide” dan leker sa dis korn-la, setadir Li pou fer zot donn “zot pouvwar ek zot lotorite” sa bebet sovaz kouler rouz vif la, setadir l’Organisation des Nations unies. (Rev. 17:13) Savedir ki se pa lide bann gouvernman pou donn zot pouvwar ek zot lotorite sa bebet sovaz la. Sa profesi-la montre ki se Zeova ki pou inflians zot pou fer sa. (Prov. 21:1; konpar ar Izai 44:28.) Ek kan zot pou fer sa, zot pa pou fer sa tigit-tigit. Sa pou arive enn sel kout! Lerla, bebet sovaz la pou detrir tou bann fos relizion.

Ki kitsoz kapav arive biento? Fode pa nou atann ki, dan linformasion, nou tann dir ki bann gouvernman tigit-tigit pe plis soutenir l’Organisation des Nations unies. Parkont, seki nou kapav atann se ki enn sel kout, Zeova pou fer tou bann gouvernman donn zot pouvwar l’Organisation des Nations unies. Ek kan sa pou arive, nou pou kone ki gran soufrans pre pou koumanse. Me an-atandan, “anou res lor nou gard ek gard nou bon sans” parski biento, bann kitsoz pou sanze san ki nou atann!—1 Tes. 5:6.