Amelior To Bann Lapriyer

1. Ki kitsoz Zeova invit so bann serviter pou fer? (Get zimaz osi.)

KAN nou bizin bann konsey, ouswa nou bizin rekonfor, ar kisann-la nou kapav gagn sa? Nou konn repons sa kestion-la, pa vre! Nou kone ki nou kapav priye nou Bondie Zeova. An realite, Zeova invit nou pou priye Li. Li anvi ki nou ‘priye Li touletan.’ (1 Tes. 5:17) Nou kapav priye Li ninport kan nou anvi, pou demann Li so led dan ninport ki domenn nou lavi. (Prov. 3:5, 6) Zeova nou Bondie, Li bien zenere, ek Li ankouraz nou pou priye Li kantite fwa ki nou anvi.

2. Ki nou pou examine dan sa lartik-la?

² Lapriyer ena boukou valer pou nou. Selman, avek tou seki nou ena pou fer, kitfwa nou gagn difikilte pou trouv letan pou priye. Ek kitfwa nou trouve osi ki nou bizin amelior nou bann lapriyer. Erezman ki Labib donn bann bon konsey dan sa bann domenn-la. Dan sa lartik-la, nou pou examinn lexanp Zezi ek nou pou gete kouma nou kapav trouv letan pou priye. Nou pou gete osi kouma nou kapav amelior nou bann lapriyer gras-a sink kitsoz bien inportan.

ZEZI TI TROUV LETAN POU PRIYE

3. Ki Zezi ti kone konsernan lapriyer?

³ Zezi ti kone ki nou bann lapriyer ena boukou valer pou Zeova. Avan ki li vinn lor later, li ti trouve kouma so Papa reponn lapriyer bann zom ek bann fam ki fidel. Par exanp, Zezi ti avek so Papa kan Li ti reponn lapriyer Ann, David, Eliya, ek lezot ankor. (1 Sam. 1:10, 11, 20; 1 Ler. 19:4-6; Ps. 32:5) Nou konpran kifer Zezi ti ansegn so bann disip pou priye souvan ek pou ena konfians ki Zeova pou ekout zot lapriyer!​—Mat. 7:7-11.

4. Ki nou kapav aprann ar lexanp Zezi?

⁴ Zezi inn donn nou enn zoli lexanp konsernan lapriyer. Toutlong so minister, li ti priye Zeova souvan. Zezi ti bien okipe, ek souvan ti ena boukou dimounn avek li. Akoz sa, li ti bizin trouv letan pou priye. (Mark 6:31, 45, 46) Li ti lev boner gramatin pou ki li kapav tousel pou priye. (Mark 1:35) Ek enn fwa, avan ki li ti pran enn desizion inportan, li ti priye enn lanwit. (Lik 6:12, 13) Lanwit avan so lamor, zis avan ki li terminn mision ki so Papa ti donn li, Zezi ti priye Zeova plizir fwa. Li ti kontign priye so Papa mem dan sa moman bien difisil-la.​—Mat. 26:39, 42, 44.

5. Kouma nou kapav swiv lexanp Zezi kan nou priye?

⁵ Lexanp Zezi montre nou ki nou bizin trouv letan pou priye, mem si nou bien okipe. Parey kouma Zezi, nou bizin rod enn moman pou priye. Kitfwa nou kapav lev inpe pli boner gramatin, ouswa al dormi inpe pli tar aswar. Kan nou fer sa, nou montre Zeova ki lapriyer ena valer pou nou. Enn ser ki apel Lynne, rapel ki kantite li ti rekonesan kan li ti aprann ki li kapav priye Zeova. Li dir: “Kan mo ti aprann ki mo kapav koz ar Zeova ninport kan, sa ti ed mwa pou trouv Li kouma enn bon Kamarad, ek akoz sa, mo ti anvi amelior mo bann lapriyer.” Sirman nou osi nou ena mem santiman ki Lynne! Aster-la, anou get sink kitsoz bien inportan ki nou kapav mansione dan nou lapriyer.

SINK KITSOZ INPORTAN KI NOU KAPAV MANSIONE DAN NOU LAPRIYER

6. Dapre Revelasion 4:10, 11, ki kitsoz Zeova merite?

⁶ Loue Zeova. Dan enn vizion extraordiner, Zan ti trouv 24 ansien dan lesiel pe ador Zeova. Zot ti pe loue Zeova parski zot ti kone ki Li merite gagn “laglwar, loner ek pwisans.” (Lir Revelasion 4:10, 11.) Bann anz fidel osi ena boukou rezon pou loue Zeova. Zot dan lesiel avek Li ek zot inn aprann konn Li bien. Zot trouv bann kalite Zeova dan tou seki Li fer. Ek kan zot trouve kouma Zeova azir, sa pous zot pou loue Li.​—Zob 38:4-7.

7. Pou ki kitsoz nou kapav loue Zeova?

⁷ Nou osi nou bizin loue Zeova dan nou lapriyer. Nou fer sa kan nou dir Li kifer nou kontan Li ek respekte Li. Kan to lir ek etidie Labib, esey trouv bann kalite ki Zeova ena ek ki to vremem apresie. (Zob 37:23; Rom. 11:33) Apre sa, dir Zeova seki to resanti pou sa bann zoli kalite-la. Nou kapav osi loue Zeova parski Li ed nou ek Li ed tou nou bann frer ek ser. Zeova pe touletan protez nou ek pran nou swin.​—1 Sam. 1:27; 2:1, 2.

8. Sit sertin rezon kifer nou bizin remersie Zeova. (1 Tesalonisien 5:18)

⁸ Remersie Zeova. Nou ena boukou rezon pou remersie Zeova. (Lir 1 Tesalonisien 5:18.) Nou kapav remersie Li pou tou bann bon kitsoz ki nou ena. Apre tou, se Li ki donn nou tou sa bann bon kitsoz-la. (Zak 1:17) Par exanp, nou kapav remersie Li pou nou zoli planet later ek pou tou bann kitsoz extraordiner ki Li’nn kree. Nou kapav osi remersie Li pou lavi ki Li’nn donn nou, pou nou fami, pou nou bann kamarad, ek pou nou zoli lesperans. Ek nou anvi remersie Zeova osi parski nou kapav ena enn bon lamitie avek Li.

9. Kifer nou bizin fer zefor pou ena rekonesans pou Zeova?

⁹ Nou bizin pran letan ek fer zefor pou reflesi lor bann kitsoz ki motiv nou pou ena rekonesans pou Zeova. Kifer? Parski nou pe viv dan enn lemond ki bien ingra. Olie ki bann dimounn montre zot rekonesans pou seki zot ena, zot plis interese ar seki zot kapav gagne. Si nou osi nou ena sa fason panse-la, nou pou ena tandans pou priye Zeova zis pou demann Li bann kitsoz ki nou bizin. Pou ki sa pa arive, nou bizin kontign montre nou rekonesans pou tou seki Zeova fer pou nou.​—Lik 6:45.

10. Kouma enn ser ti reisi andire parski li ti rekonesan anver Zeova? (Get zimaz osi.)

¹⁰ Kan nou rekonesan anver Zeova, sa kapav ed nou pou andir bann difikilte. Anou get lexanp enn ser ki apel Kyung-sook. Nou kapav trouv so lexanp dan Latour Degard 15 Zanvie 2015. Kyung-sook ti ena enn kanser poumon bien grav. Li dir: “Sa maladi-la inn zet mwa anba. Mo ti ena linpresion ki mo’nn perdi tou, mo ti bien per.” Ki kitsoz ti ed Kyung-sook pou andir so sitiasion? Li dir ki toule aswar, avan ki li al dormi, li ti al lor lakaz ek li ti priye Zeova bien for. Li ti remersie Zeova pou sink kitsoz li ti rekonesan sa zour-la. Sa ti ed li pou li mwin trakase, ek sa ti ankouraz li pou li montre so lamour pou Zeova. Li ti trouve kouma Zeova ed So bann serviter ki fidel kan zot gagn bann difikilte, ek li ti konpran ki dan lavi, ena pli boukou benediksion ki difikilte. Parey kouma Kyung-sook, nou ena boukou rezon pou remersie Zeova, mem si nou pe gagn bann difikilte. Kan nou priye Zeova ek ki nou montre Li nou rekonesans, sa kapav ed nou pou andire ek pou res kalm.

11. Kifer bann disip Zezi ti bizin ena kouraz apre ki Zezi ti mont dan lesiel?

¹¹ Demann Zeova kouraz pou prese. Zis avan ki li mont dan lesiel, Zezi ti rapel so bann disip ki zot ti pou bizin rann enn temwaniaz lor li “dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8; Lik 24:46-48) Me inpe letan apre, bann sef relizie zwif ti aret Pier ek Zan ek ti amenn zot devan lakour siprem zwif. Zot ti donn sa bann zom fidel la lord pou aret prese ek zot ti mem menas zot. (Zist. 4:18, 21) Ki kitsoz Pier ek Zan ti fer?

12. Dapre Zistwar Bann Zapot 4:29, 31, ki bann disip ti fer?

¹² Kan bann sef relizie zwif ti menas zot, Pier ek Zan ti dir: “Zize zotmem, si li bon devan lizie Bondie ki nou ekout zot olie Bondie. Me nou, nou pa kapav aret koz lor bann kitsoz ki nou’nn trouve ek tande.” (Zist. 4:19, 20) Kan bann-la ti liber Pier ek Zan, bann disip ti priye Zeova pou ki zot kapav kontign fer so volonte. Zot ti dir Zeova: “Ed to bann esklav pou kontign koz lor to parol avek boukou kouraz.” Zeova ti reponn zot lapriyer.​—Lir Zistwar Bann Zapot 4:29, 31.

13. Ki nou kapav aprann ar lexanp Jin-hyuk?

¹³ Nou kapav swiv lexanp bann disip kan nou kontign prese mem si bann gouvernman demann nou pou arete. Anou get lexanp Jin-hyuk, enn frer ki ti al dan prizon parski li pa ti fer servis militer. Dan prizon, li ti gagn responsabilite pou okip sertin prizonie ki ti an izolman. Selman, li pa ti gagn drwa koz ar zot lor Labib. Li ti zis kapav koz ar zot konsernan bann kitsoz ki zot ti bizin. Li ti priye Zeova pou li gagn kouraz ek bon zizman, pou li kapav sezi sak lokazion ki li gagne pou prese. (Zist. 5:29) Li dir: “Zeova ti reponn mo lapriyer. Li ti donn mwa kouraz ek sazes pou mo kapav koumans plizir letid Labib sink-sink minit ar bann prizonie devan zot laport kaso. Lerla, aswar mo ti ekrir bann let ki mo ti pou donn zot landemin.” Nou osi, nou kapav sir ki Zeova pou ed nou pou nou kontign prese. Parey kouma Jin-hyuk, nou kapav priye pou gagn kouraz ek sazes.

14. Ki kitsoz kapav ed nou kan nou ena bann difikilte? (Psom 37:3, 5)

¹⁴ Demann Zeova so led pou andire malgre to bann difikilte. Boukou parmi nou pe soufer akoz enn maladi ouswa akoz bann problem emosionel. Kitfwa enn kikenn ki zot kontan inn mor, zot ena bann problem familial, zot pe gagn persekision, ouswa zot ena lezot problem ankor. Ek bann kitsoz kouma pandemi ouswa bann lager, inn rann nou lavi pli difisil ankor. Alor, ouver to leker ar Zeova. Explik Li to sitiasion, parey kouma to ti pou fer ar enn bon kamarad. To kapav sir ki Zeova “pou ed twa.”​—Lir Psom 37:3, 5.

15. Kouma lapriyer kapav ed nou pou “andire dan leprev”? Donn enn lexanp.

¹⁵ Kan nou kontign priye, sa pou ed nou pou “andire dan leprev.” (Rom. 12:12) Zeova konn bann difikilte ki so bann serviter gagne ek “li tann zot soufrans.” (Ps. 145:18, 19) Kristie, enn pionie ki ena 29 an, dakor ar sa bann parol-la. San ki li ti atann, Kristie ti gagn enn maladi bien grav, ek akoz sa, li ti fer enn gro depresion. Inpe apre, li ti aprann ki so mama ti ena enn maladi bien grav ek ki li ti pre pou mor. Kristie dir: “Mo ti sipliy Zeova dan lapriyer pou Li donn mwa lafors pou mo kapav andire sak zour. Mo ti ena enn bon program spiritiel, mo ti asiste mo bann renion, ek mo ti fer mo letid personel.” Kristie dir: “Lapriyer inn ed mwa pou travers sa bann moman difisil la. Mo ti kone ki Zeova touletan la, ek sa ti vremem rekonfort mwa. Mem si mo pa ti bien deswit, Zeova ti reponn mo bann lapriyer. Li’nn donn mwa lape ek Li’nn ed mwa pou res kalm.” Fode zame nou bliye ki “Zeova kone kouma pou delivre dan leprev bann dimounn ki atase ar li.”​—2 Pier 2:9.

16. Kifer nou bizin Zeova so led pou reziste bann tantasion?

¹⁶ Demann Zeova so led pou reziste bann tantasion. Akoz nou inparfe, nou bizin touletan fer zefor pou nou pa tom dan tantasion ek fer bann move kitsoz. Me Satan esey fer tou seki li kapav pou fer nou tom dan tantasion. Enn fason li esey tant nou se atraver bann divertisman ki imoral. Sa bann divertisman-la kapav ranpli nou lespri ar bann panse ki malang. Lerla, nou kapav vinn sal devan lizie Zeova ek nou riske fer enn pese ki bien grav.​—Mark 7:21-23; Zak 1:14, 15.

17. Kan nou priye Zeova pou nou pa tom dan tantasion, kouma nou kapav azir an-akor ar nou lapriyer? (Get zimaz osi.)

¹⁷ Nou bizin led Zeova pou nou pa tom dan tantasion ek fer bann move kitsoz. Kan Zezi ti montre so bann disip kouma pou priye, li ti dir zot demann so Papa: “Pa les nou tom dan tantasion, me sap nou ar sa kikenn ki move la.” (Mat. 6:13) Zeova anvi ed nou, me nou bizin demann Li so led. Nou bizin osi azir an-akor ar nou lapriyer. Kouma? Nou bizin fer nou maximum pou evit lir ek ekout bann move kitsoz ki bien popiler dan lemond Satan. (Ps. 97:10) Nou kapav ranpli nou lespri ar bann bon kitsoz kan nou lir Labib ek nou etidie li. Ek kan nou asiste bann renion ek nou prese, nou protez nou lespri. Lerla, Zeova promet nou ki Li pa pou les nou gagn enn tantasion ki nou pa kapav siporte.​—1 Kor. 10:12, 13.

18. Konsernan lapriyer, ki kitsoz nou tou nou bizin fer?

¹⁸ Nou pe viv dan bann dernie zour, ek si nou anvi res fidel ar Zeova, li bien inportan ki nou priye pli souvan. Alor, rezerv letan sak zour pou to priye to Papa ar tou to leker. Zeova anvi ki nou priye Li ek ki nou ‘dir li seki ena lor nou leker.’ (Ps. 62:8) Loue Li ek remersie Li pou tou seki Li fer. Demann Li kouraz pou to prese. Sipliy Li pou ed twa pou andir ninport ki problem ek pou reziste ninport ki tantasion ki to gagne. Ek pa les nanye ek personn anpes twa priye Zeova regilierman. Me kouma eski Zeova reponn nou lapriyer? Nou pou reponn sa kestion inportan la dan prosin lartik.