Kouma Ou Kapav Priye pou ki Bondie Ekout Ou?

PRIYE ZEOVA O-NOM ZEZI

“Tou seki zot demann mo Papa lor mo nom, li pou donn zot.”​—Zan 16:23.

Bann parol Zezi montre dan enn fason kler ki Zeova pa anvi ki nou servi bann zimaz, bann sin, bann anz, ouswa nou bann anset ki’nn mor pou priye Li. Me plito, Li anvi ki nou priye Li o-nom Zezi. Kan nou priye Bondie o-nom Zezi, nou montre ki nou rekonet rol inportan ki Zezi ena. Zezi ti dir: “Personn pa kapav al kot mo Papa si li pa pas par mwa.”​—Zan 14:6.

KOZ AR OU LEKER

“Dir li seki ena lor zot leker.”​—Psom 62:8.

Kan nou priye Zeova, nou bizin koz ar Li parey kouma nou ti pou koz ar enn papa ki ena boukou lamour. Olie ki nou lir seki finn ekrir dan enn liv ouswa ki nou resit enn kitsoz ki nou finn aprann par-ker, nou bizin koz ar Bondie avek respe ek ar tou nou leker.

PRIYE AN-AKOR AR VOLONTE BONDIE

“Tou seki nou demande, li pou akord nou dapre so volonte.”​—1 Zan 5:14.

Dan Labib, Zeova dir nou seki Li pou fer pou nou ek seki Li anvi nou fer pou Li. Pou ki Bondie aksepte nou bann lapriyer, nou bizin priye Li “dapre so volonte.” Pou ki nou kapav fer sa, nou bizin etidie Labib pou aprann konn Li bien. Ek si nou fer sa, nou bann lapriyer pou fer Li plezir.

POU KI KITSOZ NOU KAPAV PRIYE?

Priye pou Bann Kitsoz ki Ou Bizin. Nou kapav priye Bondie pou bann kitsoz ki nou bizin dan nou lavi toulezour, setadir manze, linz, ek enn plas pou reste. Nou kapav osi priye pou ki Bondie donn nou sazes pou pran bann bon desizion ek lafors pou andir nou bann leprev. Nou kapav priye pou ena lafwa, pou gagn pardon ek led Bondie.​—Lik 11:3, 4, 13; Zak 1:5, 17.

Priye pou Lezot. Bann paran ki kontan zot zanfan kontan kan zot bann zanfan ena lamour sakenn pou zot kamarad. Zeova osi anvi ki so bann zanfan lor later ena lamour sakenn pou zot kamarad. Alor, li bon ki nou priye pou nou konzwin, nou bann zanfan, nou fami, ek nou bann kamarad. Disip Zak ti ekrir: “Sakenn priye pou so kamarad.”​—Zak 5:16.

Priye pou Dir Bondie Mersi. Pou montre ki nou Kreater fer “bann bon kitsoz,” Labib dir: “Li donn zot lapli ek bann sezon kot ena labondans; Li’nn donn zot manze an-abondans ek Li’nn ranpli zot leker avek lazwa.” (Zistwar Bann Apot 14:17, NW) Kan nou reflesi lor tou seki Bondie finn fer pou nou, sa pou pous nou pou remersie Li dan lapriyer. Biensir, nou bizin osi montre nou rekonesans anver Bondie kan nou obeir Li.​—Kolosien 3:15.

ENA PASIANS EK KONTIGN PRIYE

Parfwa, kan nou pa gagn enn repons deswit pou bann lapriyer sinser ki nou fer, sa kapav dekouraz nou. Eski savedir ki Bondie pa interese ar nou? Non! Get sertin lexperyans ki montre nou linportans pou kontign priye.

Steve, lor ki nou ti koze dan premie lartik, dir: “Si mo pa ti kontign priye, kitfwa mo ti pou perdi lespwar pou kapav regagn mo lazwa enn zour.” Ki ti ed li? Li ti koumans etidie Labib ek li ti aprann linportans pou priye, ek pou persevere dan lapriyer. Steve dir: “Dan mo lapriyer, mo remersie Bondie pou tou soutien ranpli ar lamour ki mo bann kamarad finn donn mwa. Zame mo finn otan ere dan mo lavi.”

Ki nou kapav dir lor Jenny, ki ti panse ki li pa merite ki Bondie ekout li? Li dir: “Kan mo ti santi ki mo pa vo nanye, mo ti sipliy Bondie pou ed mwa konpran kifer mo ti ena sa santiman-la.” Kouma sa ti ed Jenny? Li dir: “Kan mo ti koz avek Bondie, sa ti ed mwa pou trouv momem parey kouma Bondie trouv mwa ek pou konpran ki mem si mo leker kondann mwa, Bondie Li, Li pa pans koumsa. Sa finn osi ed mwa pou pa bes lebra.” Ki rezilta li finn gagne? Li dir: “Lapriyer finn ed mwa pou trouv Zeova kouma enn Papa, ek enn Kamarad ki reel, ki ena boukou lamour, ek ki gagn mo traka. Li pou touletan la pou soutenir mwa ek pou ed mwa tanki mo kontign fer zefor pou fer so volonte.”

Anou get osi lexanp Isabel. Kan li ti ansint, bann dokter ti dir li ki so zanfan pou ne avek enn andikap bien grav. Li ti abat net. Sertin ti mem dir li avorte. Isabel dir: “Telman mo leker ti fer mal akoz sa ki mo ti panse mo pou mor.” Ki li ti fer? Li dir: “Mo pa ti aret priye Bondie ek demann Li so led.” Apre sa, so garson ki li’nn apel Gerard, inn ne ek li ti andikape. Eski dapre Isabel, Bondie inn reponn so lapriyer? Wi! Kouma? Li dir: “Zordi mo garson ena 14-z-an ek li pe profit lavi mem si li andikape. Mo garson se pli gran benediksion ki mo’nn gagne. Kan mo get li, mo realize ki Zeova finn reponn mo lapriyer dan meyer fason ki ena.”

Bann lexanp koumsa tous nou leker ek rapel nou seki enn ekrivin Psom ti dir: “To pou ekout dezir bann ki ena douser, O Zeova. To pou fer zot leker vinn for ek to pou ekout zot avek boukou latansion.” (Psom 10:17, NW) Se bann rezon extraordiner pou kontign priye Bondie!

Dan Labib, nou trouv plizir lapriyer ki Zezi inn fer. Sirman lapriyer ki pli boukou dimounn kone, se lapriyer ki li ti ansegn so bann disip. Ki nou kapav aprann ar sa lapriyer-la?