Pa Laisse Nanyé Empeche Nou Gagne la Gloire

1, 2. (a) Ki vedir mot “la gloire” en Hébreu? (b) Ki bann question nou pou examiné dan sa lartik-la?

KAN ou tann mot “la gloire,” ki vinn dan ou l’esprit? Beauté extraordinaire ki ena dan creation? (Ps. 19:1) L’honneur ek la gloire ki donne bann dimoune ki ena enn grand richesse ek sagesse ou-soit ki’nn bien reussi dan la vie? Dan la Bible, mot Hébreu ki’nn traduire par “la gloire” vedir lourd. Dan le passé​—kan ti faire l’argent ar bann metal ki ena valeur​—plus enn piece ti lourd, plus li ti ena valeur. A koz sa, mot ki ti traduire par “la gloire” kapav faire reference ar enn kitsoz ki ena enn grand valeur ou-soit ki bien impressionnant.

² Li possible ki nou laisse-nou impressionné par pouvoir, position ou-soit reputation enn lot dimoune. Mais Bondié Li, ki Li guetté dan enn dimoune? La Bible koz lor la gloire ki Bondié donne bann dimoune. Par exemple Proverbes 22:4 dire: “Resultat l’humilité ek la crainte pou Jéhovah, c’est la richesse ek la gloire ek la vie.” Ek disciple Jacques ti ecrire: “Humilié-zot devant lizié Jéhovah, ek Li pou eleve zot.” (Jacq. 4:10) Ki sa la gloire ki Jéhovah donne bann dimoune-la? Ki kapav empeche nou gagne sa la gloire-la? Couma nou kapav aide lezot pou gagne sa la gloire-la?

3-5. Couma Jéhovah donne nou la gloire?

³ Enn psalmiste ti sur ki Jéhovah pou trap so la main droite ek pou amenn li vers enn vrai la gloire. (Lire Psaume 73:23, 24.) Couma Jéhovah faire sa? Jéhovah amenn so bann serviteur ki humble vers la gloire kan Li honore zot dan plusieurs fason. Par exemple, Li aide zot pou comprend so volonté. (1 Cor. 2:7) Li permette bann ki ecoute so parole ek obeir Li, pou ena bann relation personnel avek Li.​—Jacq. 4:8.

⁴ Jéhovah confié aussi so bann serviteur enn ministere ki ena enn grand valeur. (2 Cor. 4:1, 7) Ek sa ministere-la faire nou gagne la gloire. Bann ki participe dan sa ministere-la loué Jéhovah ek faire lezot gagne bann bienfait. Jéhovah faire zot sa promesse-la: “Bann ki honore moi, mo pou honore zot.” (1 Sam. 2:30) Jéhovah honore sa bann serviteur-la kan Li faire zot gagne enn bon reputation, ek lezot membre dan congregation pou koz en bien lor zot.​—Prov. 11:16; 22:1.

⁵ Ki l’avenir bann ki ‘mette zot l’espoir en Jéhovah ek obeir Li’ ena? La Bible faire zot sa promesse-la: ‘Li [Jéhovah] pou donne zot grandeur pou ki zot herite la terre. Kan bann mauvais dimoune pou detruire, zot pou trouvé.’ (Ps. 37:34) Zot ena enn l’esperance extraordinaire pou vive pou touletan.​—Ps. 37:29.

“MO PA ACCEPTÉ LA GLOIRE KI BANN ZOM DONNÉ”

6, 7. Kifer beaucoup dimoune pa ti disposé pou ena la foi en Jésus?

⁶ Ki kapav empeche nou gagne la gloire ki Jéhovah disposé pou donne nou? Enn kitsoz, c’est kan nou donne trop l’importance ar l’opinion bann dimoune ki pena okenn relation avek Jéhovah. Guette seki l’apotre Jean ti dire concernant certain ki ti ena l’autorité dan lepok Jésus: “Mem parmi bann chef, beaucoup ti ena la foi en [Jésus], mais a cause bann Pharisien, zot pa ti faire lezot koné, pou ki pa mette zot dehors dan synagogue; parski zot ti pli content la gloire bann zom ki la gloire Bondié.” (Jean 12:42, 43) Li ti pou beaucoup pli bon ki sa bann chef-la pa ti donne enn grand l’importance ar fason pensé bann Pharisien!

⁷ Au commencement so ministere, Jésus ti bien expliké kifer beaucoup pa ti pou accepté li ek ena la foi en li. (Lire Jean 5:39-44.) Pendant plusieurs siecle, nation Israël ti pé attann le Messie. Kan Jésus ti commence preché, certain dimoune kitfois ti koné ki dapré prophetie Daniel, ti’nn arrive le temps fixé pou le Messie arrivé. Plusieurs mois avant, kan Jean le Baptiste ti commence preché, beaucoup dimoune ti pé demann-zot-mem: “Eski c’est pa li-mem kitfois ki le Christ?” (Luc 3:15) Asterla, sa Messie ki zot ti pé attann depuis longtemps-la ti pé enseigné parmi zot. Mais bann ki ti bien konn la Loi, ti refuse pou accepté li. Jésus ti expliké pou ki raison zot pa ti accepté li, kan li ti demann zot: “Couma zot kapav croire, alors ki zot pé accepté la gloire sakenn so camarade ek zot pa pé rod la gloire ki sorti kot sel Bondié?”

8, 9. Couma l’exemple la lumiere montré ki la gloire ki bann zom donné kapav empeche nou trouve la gloire ki Bondié donné?

⁸ Nou comprend couma la gloire ki bann zom donné kapav vinn pli important pou nou ki la gloire ki Jéhovah donné, kan nou compare la gloire ar la lumiere. L’univers rempli ar la lumiere. Eski ou rappel kan dernier fois ou ti guette le ciel a-soir ek ou ti trouve plusieurs millier zetoile? “La gloire bann zetoile” vrai-mem extraordinaire, zot impressionne nou, pa vrai? (1 Cor. 15:40, 41) Mais, si nou lor enn chemin dan enn la ville ki bien eclairé, couma sa mem le ciel-la pou parette? Nou pou remarké ki, a cause bann la lumiere ki ena dan la ville, li preské impossible pou trouve la lumiere bann zetoile. Eski sa vedir ki la lumiere ki ena lor bann chemin, lor bann stade, ek bann batiment, zot pli fort ek pli joli ki la lumiere bann zetoile? Non! C’est parski la lumiere ki dan sa la ville-la zot pli pré ar nou ek li difficile pou nou trouve la lumiere bann zetoile. Pou nou kapav trouve beauté bann zetoile, nou bizin al loin ar bann la lumiere artificiel.

⁹ Li pareil aussi avek la gloire ki bann zom donné. Si li trop pré ar nou leker, sa kapav empeche nou pou apprecié ek pou rod la gloire ki Jéhovah disposé pou donne nou. Beaucoup dimoune refuse pou accepté message lor Royaume Bondié parski zot peur seki zot camarade ek zot famille kapav pensé lor zot. Mais eski li kapav arrivé ki mem bann serviteur Jéhovah ena enn desir pou gagne la gloire ar bann dimoune? Si par exemple, enn jeune frere bizin preche dan enn l’endroit kot la plupart dimoune konn li, mais zot pa koné ki li enn Témoin de Jéhovah. Eski li pou honté pou preche dan sa l’endroit-la? Ki enn Témoin pou faire si certain bouffonne li a cause so bann l’objectif spirituel? Eski li pou laisse bann dimoune ki pa trouve l’importance pou mette service Jéhovah en premier dan la vie, influence so bann choix? Li possible aussi ki enn chretien inn faire enn peché grave. Eski li pou cachiette sa parski li peur pangar li perdi so bann responsabilité dan congregation ou-soit parski li pou faire la peine bann dimoune ki li content? Dan sa cas-la, si, seki pli important pou li c’est ré-gagne so bann bon relation avek Jéhovah, li pou “appel bann ancien dan congregation” ek rod zot l’aide.​—Lire Jacques 5:14-16.

10. (a) Ki kapav arrivé si nou trop tracassé lor seki lezot pensé lor nou? (b) Ki l’assurance nou kapav ena si nou agir avek humilité?

¹⁰ Li possible ki nou pé progressé pou vinn enn chretien mur dan congregation, mais enn lot chretien donne nou bann conseil. So bann conseil bien franc kapav aide nou si nou accepté zot. Mais, si nou refuse zot a cause l’orgueil, nou rod sauve la face, ou-soit nou tenté pou justifié-nou, nou pa pou gagne bann bienfait. Ou-soit, supposé ki ou pé travail lor enn projet avek enn lot chretien. Si c’est ou ki finn donne bann bon l’idée ek finn travail dur, eski ou pou tracassé kisannla ki pou gagne bann louange? Si ou dan enn parmi sa bann situation-la, ou kapav sur ki “enn kikenn ki ena enn l’attitude humble pou gagne la gloire.”​—Prov. 29:23.

11. Couma nou bizin reagir au fond nou-mem kan enn dimoune felicite nou, ek kifer?

¹¹ Bann ancien ek bann frere ki “ena desir” pou gagne privilege dan congregation, bizin aussi faire attention pou pa rod la gloire bann zom. (1 Tim. 3:1; 1 Thess. 2:6) Couma enn frere bizin reagir kan lezot felicite li pou enn travail ki li’nn bien faire? Surement li pa pou construire enn monument pou li-mem, pareil couma le Roi Saül ti faire. (1 Sam. 15:12) Mais, eski desuite li pou reconette ki c’est selman grace a Jéhovah ki li finn reussi faire sa, ek ki dan l’avenir aussi, li pou bizin benediction ek l’aide Bondié pou reussi dan seki li faire? (1 Pierre 4:11) Fason ki nou reagir au fond nou-mem kan enn dimoune felicite nou montré ki qualité la gloire nou pé rodé.​—Prov. 27:21.

“ZOT OULÉ FAIRE SEKI ZOT PAPA ENVIE”

12. Ki ti empeche certain Juif pou ecoute Jésus?

¹² Enn lot kitsoz ki kapav empeche nou gagne la gloire ki Bondié donné, c’est nou bann prop desir. Bann mauvais desir kapav empeche nou pou ecoute la verité. (Lire Jean 8:43-47.) Jésus ti dire certain Juif ki zot pa ti ecoute so message parski ‘zot ti oulé faire seki zot papa le Diable, ti envie.’

13, 14. (a) Ki bann recherche finn montré lor fason ki nou cerveau reagir ar la voix bann dimoune? (b) Ki pou faire nou decidé kisannla nou pou ecouté?

¹³ Nou bann desir influence fason ki nou ecouté. (2 Pierre 3:5) Jéhovah inn crée nou avek capacité pou nou pa ecoute bann tapage ki nou pa envie tendé. Arrete enn ti moment ek concentré lor bann different son ki ou kapav tendé asterla. Surement, ou pa ti prend compte beaucoup parmi zot enn tipé avant. Ou systeme limbique, setadir enn partie dan ou cerveau, ti pé aide ou pou concentré zis lor enn sel son, mem si li ena capacité pou tann different son. Mais bann recherche finn montré ki li pli difficile pou nou ecoute plusieurs dimoune ki pé kozé en mem temps. Sa vedir ki, kan ou tann deux la voix en mem temps, ou bizin choisir kisannla ou pou ecouté. Ou choix pou depann lor kisannla ou envie ecouté. Bann Juif ki ti oulé faire seki zot papa, le Diable ti envie, pa ti ecoute Jésus.

¹⁴ Nou gagne bann message ki coumadir sorti dan ‘lakaz bann sage’ ek dan ‘lakaz bann bête.’ (Prov. 9:1-5, 13-17) Bann sage ek bann bête pé coumadir contigne appel nou, ek sa mette nou devant enn choix. Ki l’invitation nou pou accepté? Sa depann kisannla nou envie faire plaisir. Bann brebis Jésus ecoute so la voix ek zot suive li. (Jean 10:16, 27) Zot “dan coté la verité.” (Jean 18:37) “Zot pa konn la voix bann etranger.” (Jean 10:5) Bann dimoune humble ki suive Jésus gagne la gloire.​—Prov. 3:13, 16; 8:1, 18.

“SA REPRESENTE LA GLOIRE POU ZOT”

15. Couma bann l’epreuve ki Paul ti gagné ti “represente la gloire” pou lezot?

¹⁵ Nou perseverance pou faire volonté Jéhovah pou aide lezot pou gagne la gloire. Paul ti ecrire congregation Éphèse: “Mo demann zot pou pa abandonné a cause bann l’epreuve ki mo pé gagné pou zot, parski sa represente la gloire pou zot.” (Éph. 3:13) Dan ki sens eski bann tribulation Paul ti “represente la gloire” pou bann Éphésiens? Paul ti disposé pou contigne aide so bann frere malgré bann l’epreuve ki li ti gagné. Sa ti montré bann Éphésiens ki privilege ki zot ti ena en tant ki chretien, ti ena enn grand valeur. Si Paul ti abandonné kan li ti pé gagne bann l’epreuve, eski li pa ti pou faire croire ki relation ki sa bann Éphésiens-la ti ena avek Jéhovah, zot ministere ek zot l’esperance pa ti ena valeur? Par so l’endurance, Paul ti montré ki li vaut la peine nou faire n’importe ki sacrifice pou privilege ki nou ena en tant ki chretien.

16. Ki l’epreuve Paul ti gagné dan la ville Lystres?

¹⁶ Reflechi ki quantité sa ti aide bann frere kan zot ti trouve zele ek l’endurance Paul. Actes 14:19, 20 dire: “Bann Juif ti sorti Antioche ek Iconium ek ti convaink bann la foule, ek zot ti lapide Paul ek ti traine li en dehors la ville [Lystres], zot ti croire ki li ti’nn mort. Mais, kan bann disciple ti entoure li, li ti levé ek li ti rente dan la ville. Lendemain, li ti al Derbé avek Barnabas.” Maziné ki quantité sa ti difficile pou Paul marche 100 kilometre alors ki la veille, so bann l’ennemi ti lapide li pou li mort!

17, 18. (a) Couma li possible ki Timothée ti konn bann l’epreuve ki Paul ti gagné dan la ville Lystres? (b) Ki l’effet l’endurance Paul ti ena lor Timothée?

¹⁷ Eski Timothée ti parmi “bann disciple” ki ti soutenir Paul? Livre Actes pa dire nanyé lor-la, mais li possible ki li ti parmi sa bann disciple-la. Guette seki Paul ti ecrire dan deuxieme lettre ki li ti envoye Timothée: “To’nn suive bien mo l’enseignement, mo maniere vive, . . . bann kitsoz ki finn arrive moi dan Antioche [bann Juif ti force li pou quitte la ville], dan Iconium [certain ti rod lapide li], dan Lystres [bann Juif ti lapide li], bann persecution ki mo’nn supporté; ek pourtant le Seigneur ti delivré moi ar tousala.”​—2 Tim. 3:10, 11; Actes 13:50; 14:5, 19.

¹⁸ Timothée ti “suive bien” sa bann l’evenement-la ek ti bien koné ki quantité difficulté Paul ti enduré. Li ti surement aprann beaucoup ar l’exemple Paul. Kan Paul ti vinn Lystres, li ti aprann ki Timothée ti enn bon l’exemple dan congregation. “Bann frere dan Lystres ek dan Iconium ti rann enn bon temoignage” lor li. (Actes 16:1, 2) Avek le temps, Timothée ti pré pou prend bann pli grand responsabilité.​—Phil. 2:19, 20; 1 Tim. 1:3.

19. Ki l’effet nou l’endurance kapav ena lor lezot?

¹⁹ Kan nou perseveré pou faire volonté Bondié, sa kapav ena mem l’effet lor lezot​—surtout lor bann jeune. Beaucoup parmi zot pou grandi pou vinn bann bon serviteur Bondié. Bann jeune pa zis observe nou ek aprann ar fason ki nou koz ar bann dimoune dan predication. Mais zot aussi gagne bann bienfait kan zot trouvé couma nou faire face ar bann difficulté ki nou gagné dan la vie. Paul ti “contigne endure tou kitsoz” pou ki tou bann ki reste fidele kapav ‘gagne delivrance ek la gloire eternel.’​—2 Tim. 2:10.

20. Kifer nou bizin contigne rod la gloire ki sorti kot Bondié?

²⁰ Alors, eski nou pena bann bon raison pou contigne “rod la gloire ki sorti kot sel Bondié”? (Jean 5:44; 7:18) Oui, pena okenn doute! (Lire Romains 2:6, 7.) Jéhovah donne ‘la vie eternel bann ki rod la gloire.’ En plus, nou “l’endurance dan enn bon travail” pou pousse lezot pou reste ferme ek pou gagne la vie eternel. Alors, pa laisse nanyé empeche ou pou gagne la gloire ki sorti kot Bondié.