Kontiyn Fer Zefor pu “Donn Temwaynaz Afon”
1, 2. Ki kitsoz inpresyonn u lor fason ki Pol ti konsider so predikasyon, ek kuma eski nu kapav imit so legzanp pu “donn temwaynaz afon”?
1 Parey kuma Zezi ek bann lezot fidel serviter dan lepase, lapot Pol ti enn predikater bon nuvel ki ti byin zele. Li ti “donn temwaynaz afon” dan ninport ki sityasyon. Mem si li ti anprizone dan so lakaz, li “ti akeyir avek buku bonte tu bann ki ti vinn get li. Li ti pres Rwayom Bondye ek anseyn zot bann kitsoz konsernan Senyer Zezi Kris avek pli gran fransiz ki kapav.”—Akt 28:16-31.
2 Nu’si nu kapav kontiyn fer zefor pu “donn temwynaz afon” tuletan. Sa vedir usi donn temwaynaz bann dimunn ki nu zwenn kan nu vwayaze pu al Lasanble Distrik “Donn Bondye Laglwar,” ek kan nu pe returne ek usi avek bann dimunn ki res dan landrwa kot fer lasanble.—Akt 28:23; Psom 145:10-13.
3. Kuma eski nu kapav evite ki nu temwaynaz okazyonel vinn zis enn temwaynaz ki arive par sans san ki nu’nn prevwar?
3 Ki Ete Temwaynaz Okazyonel? Se pa enn kitsoz ki arive par sans uswa san ki nu’nn prevwar. Se pa kumadir enn laktivite ki nu fer san okenn preparasyon uswa ki pena linportans. Byinsir, nu minister li pa enn laktivite ki pena linportans ek ki nu fer par sans. Parey kuma dan legzanp Pol, pu nu, donn Bondye laglwar kan nu donn temwynaz, sa li enn kitsoz ki byin inportan. Ek nu bizin ena lintansyon pu donn enn temwaynaz sak fwa ki nu gayn lokazyon kan nu pe vwayaze pu al lasanble sa lane la. Dan Kreol nu kapav apel sa fason pu apros bann dimunn la kuma enn lapros okazyonel, parski nu pa zis pres lakaz-lakaz, me nu rod tu lokazyon ki nu ena pu rann temwaynaz. Se enn lapros rilax, amikal ek natirel ki pa parey kuma lapros ki nu ena kan nu devan laport enn dimunn. Sa metod la kapav prodir bann bon rezilta.
4. Ki ti ed Pol pu donn temwaynaz dan so lakaz?
4 Prepare pu Donn enn Temwaynaz: Alor ki li ti anprizone dan so prop lakaz an Rom, Pol ti kre bann lokazyon pu donn temwynaz. Li ti fer premye pa. Li ti invit bann sef Zwif ki ti res dan sa landrwa la pu vinn dan so lakaz. (Akt 28:17) Mem si ti ena enn kongregasyon Kretyin dan Rom, Pol ti aprann ki kominote Zwif dan sa lavil la ti’nn gayn zis enn tigit linformasyon mem lor bann krwayans Kretyin. (Akt 28:22; Rom. 1:7) Donk, li pa finn tini-tini pu “donn temwaynaz afon” lor Zezi Kris ek Rwayom Bondye.
5, 6. Ki bann lokazyon nu ena pu donn enn temwaynaz okazyonel, ek ki bann preparasyon nu kapav fer pu donn enn temwaynaz efikas?
5 Mazinn an avans kantite dimunn ki pa tro konn bann Temwin Zeova ki u kapav zwenn kan u vwayaze. Kitfwa zot pa mem kone ki nu ofer bann dimunn enn letid Labib gratis kot zot. Vey tu bann lokazyon pu donn temwaynaz bann dimunn ki u zwenn kan u pe vwayaze, kan u pran lesans, kan u pe aste kitsoz, kan u pe manze dan restoran, uswa kan u lor bistop. Prepar an avans seki u kapav dir pu kumans enn konversasyon ek donn enn ti temwaynaz. Kitfwa, dan bann zur ki pe vini u kapav pratik-pratike ek sey donn temwaynaz u bann vwazin, bann paran, koleg travay ek bann dimunn ki u kone.
6 Kan u pe donn temwaynaz okazyonel u bizin ena sertin piblikasyon avek u. Ki sa bann piblikasyon la sa? U kapav servi trak Eski U Ti Pu Kontan Konn Plis lor Labib? Atir latansyon lor sink premye paragraf ki koz lor diferan rezon kifer bizin lir Labib. Montre kupon ki ena par deryer pu demann enn letid Labib gratis. Kan u zwenn enn dimunn ki interese, propoz li brosir Ki Bondye Pe Demann Nu? Si u panse ki u pu zwenn bann dimunn ki koz enn lot lang, amenn brosir Une bonne nouvelle pour toutes les nations. Lor paz 2 ena enn lexplikasyon lor kuma servi sa brosir la pu donn enn temwaynaz. Si u pe vwayaz par loto, u pu kapav amenn sertin lezot piblikasyon ki nu abitye servi dan predikasyon pu bann dimunn ki montre enn vre lintere pu mesaz Rwayom. Ek si u pe vwayaz dan bis u kapav amenn diferan trak avek u.
7, 8. Ki prekosyon nu bizin pran konsernan nu laparans ek nu kondwit kan nu pe vwayaze?
7 Pran Kont U Laparans ek U Kondwit: Nu bizin asir nu ki nu kondwit, nu labiyman ek nu laparans pa pu donn bann dimunn enn move linpresyon uswa fer zot ‘koz kont’ lorganizasyon Zeova. (Akt 28:22) Sa li pa aplik zis kan nu pe asiste lasanble, me kan nu pe vwayaze usi. Latur Degard 1 Ut, 2002, paz 30 paragraf 14 dir nu: “Nu laparans bizin pa kas lizye lezot, egzazere, provokan, transparan uswa dekolte, uswa ki tro alamod. Anplis, nu bizin abiy nu enn fason ki montre ki nu ‘ena lakrint pu Bondye.’ Sa fer nu reflesi, pa vre? Eski kan nu asiste bann reynion kongregasyon nu abiy nu byin, kuma bizin, me dan bann lezot moman, nu abiy nu kuma nu anvi? Nu bann Kretyin ek bann serviter Bondye 24 lor 24. Donk nu laparans personel bizin tuzur reflekte enn latitid respektab ek onorab.”—1 Tim. 2:9, 10.
8 Nu labiyman bizin tuletan sinp ek respektab. Si nu laparans ek nu kondwit tuletan reflet nu krwayans an Bondye, zame nu pa pu ezite pu donn temwaynaz dan ninport ki lokazyon. Nu pa pu per ki nu laparans li pa konvenab pu enn serviter Bondye.—1 Pyer 3:15.
9. Ki bon rezilta Pol finn gayne an Rom kan li’nn donn temwaynaz?
9 Temwaynaz Okazyonel Prodir Buku Frwi: Pandan sa dezan ki li ti anprizone dan so lakaz dan Rom, Pol finn truv bon rezilta bann zefor ki li ti fer pu donn temwaynaz. Lik ti ekrir ki “sertin ti kumans krwar bann kitsoz ki’nn dir.” (Akt 28:24) Pol limem ti kalkil bon rezilta ki li ti gayne kan li ti “donn temwaynaz afon,” kan li finn ekrir: “Mo sityasyon finn plito servi pu fer bon nuvel progrese. Dayer tu bann gard Pretoryenn ek tu lezot ankor, ti’nn kone ki mo dan prizon pu Kris: ek kan zot finn truv mwa dan prizon, laplipar bann frer finn gayn konfyans dan Senyer, ek deplizanpli zot pe gayn kuraz pu anons parol Bondye san ki zot per.”—Fil. 1:12-14.
10. Ki rezilta enn kup finn gayne kan zot finn donn temwaynaz lane dernyer?
10 Lane dernyer, apre ki zot finn pas enn zurne dan lasanble distrik, enn kup ti gayn bon rezilta kan zot finn donn temwaynaz enn servez. Servez la ti poz zot kestyon lor zot baj. Zot finn explik li lor lasanble ek lor lespwar ki Labib ofer pu tu dimunn dan lavenir. Apre sa zot finn donn li trak Eski U Ti Pu Kontan Konn Plis lor Labib? ek zot finn explik li ki li kapav gayn enn letid Labib gratis kot li. Sa madam la finn dir ki li ti pu kontan ki enn kikenn vizit li. Li finn ekrir so non ek so ladres par deryer lor sa trak la ek li finn demann sa kup la pu fer bann laranzman pu li gayn enn letid. Ki rezilta u kapav gayne sa lane la si u kontiyn fer zefor pu “donn temwaynaz afon”?
11. Ki bann kalite nu bizin fer zefor pu devlope kan nu “donn temwaynaz afon” pu nu kapav fer predikasyon bon nuvel avanse?
11 Donn Nu Afon pu Fer Predikasyon Bon Nuvel Avanse: Mazine ki kantite kontan Pol ti kontan kan li ti tande ki so bann frer ek ser pe montre zot zel parey kuma li! Nu tu nu bizin fer tu seki nu kapav pu fer predikasyon bon nuvel avanse. Kuma? Se kan nu donn temwaynaz okazyonel lor nu bann krwayans lor Labib pandan ki nu pe profit lasanble distrik sa lane la.
[Lankadre lor page 3]
Piblikasyon Ki Bizin Kan Donn Temwaynaz Okazyonel
■ Eski U Ti Pu Kontan Konn Plis lor Labib? (trak)
■ Ki Bondye Pe Demann Nu? (brosir)
■ Une bonne nouvelle pour toutes les nations (ti brosir)
■ Bann lezot piblikasyon ki nu abitye servi dan predikasyon
[Lankadre lor page 4]
Pa Bliye Zot!
Bliye kisannla? Tu bann dimunn interese ki ti vinn asiste Memoryal lamor Kris uswa diskur spesyal. Eski u finn invit zot pu vinn asiste lasanble distrik sa lane la? Si u ankuraz zot avek buku bonte, sirman enn kantite pu vini. Amezir ki zot profit bon konpayni ki ena dan lasanble ek sa program spirityel ki byin ankurazan la, sa pu ed zot pu zot vinn pros ar Zeova ek ar so lorganizasyon. Kifer eski u pa invit zot ek gete ki zot dir? Donn zot tu bann detay ki bizin, par egzanp dat lasanble, bann linformasyon pu zot kone kuma pu vini, ler ki bann sesyon pu kumanse ek pu fini, ek enn ti avangu program lasanble ki paret lor kuvertir par deryer dan Réveillez-vous ! 8 Zin, 2003.