LAVI PE VINN PLI SER—KOUMA POU FER FAS?

Kontant Ou ar Seki Ou Ena

Bann dimounn ki kontant zot ar seki zot ena, zot satisfe ar zot lavi. Ek kan zot sitiasion sanze, zot adapte zot fason viv pou ki zot kapav viv dapre zot mwayin.

KIFER SA LI INPORTAN?

Jessica Koehler, enn sikolog, inn remarke ki bann dimounn ki kontant zot ar seki zot ena, zot ena enn latitid pli pozitif ek ki zot mwins anvie lezot. Se akoz sa ki bann dimounn ki kontant zot ar seki zot ena, zot plis zwaye ek zot mwins strese. Ofet, sertin parmi bann dimounn ki plis ere dan lavi, zot pena boukou kas. Sa bann dimounn-la konsantre zot lor bann kitsoz ki pli inportan ki kas pa kapav aste, kouma par exanp, lor lazwa ki nou gagne kan nou pas letan ar nou fami ek nou bann kamarad.

“Si nou ena manze ek linz, nou pou kontant nou ar sa bann kitsoz-la.”—1 Timote 6:8.

SEKI OU KAPAV FER

Pa konpar ou ar lezot. Si ou konpar ou ti lavi sinp avek lavi lix ki bann dimounn pe amene, ou pou nepli satisfe ar seki ou ena ek ou kapav mem anvie bann dimounn-la. Ou kapav panse ki bann-la bien ris, me letan gete, sertin parmi zot kapav ena bann gro det. Nicole, ki res Senegal, dir: “Mo pa bizin boukou kitsoz pou mo ere. Mem si lezot kapav ena plis ki mwa, mo zwaye parski mo kontant mwa ar seki mo ena.”

Esey sa: Evit get bann piblisite ouswa bann posts lor bann rezo sosio kot lezot pe fer letalaz kantite kas ki zot ena ek zot lavi grandioz.

“Mem kan enn dimounn ena boukou kitsoz, bann kitsoz ki li ena pa donn li lavi.”—Lik 12:15.

Montre rekonesans. Bann dimounn ki ena rekonesans, zot kontant zot ar seki zot ena ek zot pa panse ki zot bizin ouswa zot merit plis ki sa. Roberton, ki res Ayiti, dir: “Mo pran letan pou reflesi lor bonte ki lezot inn montre anver mwa ek mo fami. Apre sa, mo dir sa bann dimounn-la ki kantite mo apresie seki zot inn fer pou mwa ek mo fami. Mo osi montre mo ti-garson wit an pou dir mersi pou tou ti-kitsoz ki li gagne.”

Esey sa: Sak zour, ekrir enn kitsoz pou ki ou bien rekonesan. Ou kapav rekonesan pou bon lasante ki ou ena, pou bon lantant ki ena dan ou fami, pou ou bann bon kamarad, ouswa mem pou enn zoli kouse-soley.

“Enn dimounn ki ena enn leker zwaye, li touletan pe fete.”—Proverb 15:15.

Parfwa, sa kapav difisil pou kontant nou ar seki nou ena. Me, li vo lapenn ki nou fer sa zefor-la! Si nou kontant nou ar seki nou ena, nou pou ere, ek sa se enn kitsoz ki kas pa kapav aste.