Bann ki rod bann conseil pratik

SI OU pé rod bann conseil, ou pou kapav gagne beaucoup conseil. Partout dan le monde, enn parmi bann business ki pé pli marché c’est business lor bann livre ki donne bann conseil pratik bann dimoune, dan different domaine. Dan bann pays couma l’Angleterre, l’Amérique latine, Japon, ek l’Amérique ena bann livre ki donne bann dimoune conseil pou ameliore zot la vie, c’est bann ‘best-seller,’ setadir bann livre ki’nn plus vendé. Bann video, bann causerie ek bann programme television ki donne bann conseil pratik, pé aussi vinn bien populaire. Bann dimoune attiré par sa parski dapré sa bann conseil-la, ou kapav trouve solution pou ou bann probleme par ou-mem, sans ki ou bizin al guette enn psychologue, enn dimoune ki donne conseil dan mariage, ou-soit enn chef religieux. Dan ki domaine sa bann livre-la donne bann conseil?

Parmi bann sujet lor ki zot plus kozé ena par exemple: couma ou kapav reussi lor plan personnel, couma trouve bonheur dan bann relation amoureux, ek couma elevé bann zenfant. Ena aussi bann conseil ki montré couma pou faire face ar depression, chagrin, ek consequence enn divorce. Beaucoup dimoune rod aussi bann conseil lor fason pou arrete mange plus ki bizin, arrete fumé, ek arrete boire beaucoup. Eski sa bann conseil-la zot pratik? Parfois oui, mais souvent non. Alors, li sage ki nou guette l’avertissement ki la Bible donné: “Enn kikenn ki mank l’experience, croire tou seki li tendé, mais enn dimoune ki ena enn bon jugement, faire attention kot li mette so lipié.”—Proverbes 14:15.

Bann livre ki donne sa bann conseil pou ameliore nou la vie-la, zot bien different ar bann livre ki aprann nou couma pou tire photo, pou aprann comptabilité, ou-soit enn nouveau langage. Certain dimoune lire sa bann livre ki kapav efficace ek pa cher-la, dan place zot prend enn cour lor sa bann sujet-la. Mais bann livre ki donne bann conseil—ki li en rapport avek business, mariage, elevé bann zenfant, ou-soit la santé mental—zot different. Zot souvent encourage enn certain fason vive ou-soit enn certain fason pensé. Alors, li bon ki nou demandé: ‘Kisannla pé donne sa conseil-la? Kot-sa li’nn gagne so bann l’information?’

Pa touletan ki bann expert base zot l’opinion lor bann preuve ki finn choisir avek precaution. Certain kapav donne bann conseil ki pli vendé, parski zot koné ki zot pou gagne beaucoup kass kan zot dire bann dimoune seki zot envie tendé. Enn parmi bann pays ki faire business lor sa bann livre-la, faire plus ki huit milliard dollar profit chaque l’année!

Eski sa bann livre ki donne bann conseil pratik-la, zot utile?

Kan ou rod conseil dan sa bann livre-la, ou attann pou gagne bann conseil pratik. Mais parfois, ou gagne bann conseil ki bien vague ou-soit ki pena enn coté pratik. Bien souvent sa bann livre-la dire ou: ‘Si ou pense dan enn fason positif, ou sur ou pou kapav reglé ou bann probleme. Ou kapav gagne tou seki ou envie, ki li l’argent, la santé, ou-soit enn bon relation avek lezot, si ou pense dan enn fason positif.’ Eski sa bann qualité conseil-la, zot pratik pou reglé ou bann probleme? Eski zot pou aide ou pou faire face avek la realité ek bann decouragement ki ena dan la vie?

Prend par exemple, bann livre ki bann dimoune lire plus, setadir bann livre ki koz lor bann relation avek lezot ek lor mariage. Eski zot aide bann dimoune pou ena enn famille heureux ek stable? Pa touletan. Dapré enn journaliste, enn ecrivain ki’nn ecrire bann livre lor l’amour, ek ki ti gagne enn grand succès en Amérique latine, “dire bann lecteur couma pou crée bann bon relation avek lezot ek gagne confiance dan zot-mem.” Sa ecrivain-la dire ki enn dimoune ki contigne reste avek enn kikenn alors ki sa pa pé marché, c’est coumadir li pé trahir li-mem. En realité sa ecrivain-la pé rod dire ki avant tou, enn kikenn bizin rod so bien-etre au lieu ki li rod koné ki bann difficulté pé empeche so relation marché ek essaye reglé zot.

Li vrai ki dan bann livre ki donne conseil bann dimoune, kapav ena bann bon conseil. Mais, zot kapav donne aussi bann mauvais conseil. Enn expert kapav donne bann conseil utile lor enn sujet, alors ki bann conseil ki li donné lor enn lot sujet kapav faire bann kitsoz vinn pli pire. Li pou impossible pou examine tou bann l’idée ki ena dan sa bann livre-la, ek souvent ena contradiction entre zot. Conseil kisannla ou kapav faire confiance? Demann ou-mem: ‘Eski finn faire beaucoup recherche pou sa conseil-la, ou-soit eski c’est zis l’idée personnel sa ecrivain-la? Ziska ki point sa ecrivain-la inn laisse l’argent ou-soit la gloire influence li?’

Enn livre ki finn faire so preuve pendant enn longue periode le temps, c’est la Bible. Li donne bann conseil pratik lor plusieurs sujet ki bann lezot livre donné ek plus encore. Li’nn pousse plusieurs million dimoune pou suive sa conseil-la: “Zot bizin renouvelé dan la force ki motive zot l’esprit . . . Mette lor zot nouveau personnalité.” (Éphésiens 4:23, 24) La Bible explik dan enn fason sage kifer nou gagne probleme ek enseigne nou couma pou faire face ar sa bann probleme-la. Seki pli important, li donne nou bann bon raison pratik pou faire seki bon. Prochain lartik pou donne plus renseignement lor sa sujet-la.