Mythe 6: Bondié accepté ki servi zimage ek zidole dan l’adoration

Ki l’origine sa mythe-la?

“Pa ti ena bann zimage dan culte bann premier chretien . . . L’Eglise ti expliké ki ti introduire bann zimage dan 4^eme ek 5^eme siecle, parski comparé ar bann sermon ou-soit bann livre, sa bann zimage-la ti permette bann dimoune ki pa ti ena enn grand l’education pou aprann pli bien zistoire lor religion chretien.”—Cyclopedia of Biblical, Theological, and Ecclesiastical Literature, par McClintock ek Strong, volume 4, page 503 ek 504.

Ki la Bible dire?

“Fodé pa ki to faire [bann] statue ni okenn forme ki ressemblé bann kitsoz ki dan le ciel la-haut, ou-soit lor la terre en-bas, ou-soit dan de l’eau en-bas la terre. Fodé pa ki to prosterne devant zot.” (Exode 20:4, 5, La Bible, par le chanoine Osty) L’apotre Jean ti ecrire bann chretien dan premier siecle: “Bann ti zenfant, reste loin ar bann zidole.”—1 Jean 5:21.

Eski bann zimage, zot zis enn moyen pou honore ek pou vinn pli pré ar seki zot representé, pareil couma bann l’Eglise pretann? Enn livre reference ki koz lor bann zimage la religion chretien dire ki sa bann zimage-la zot coté artistik ek decoratif ti pé automatiquement encourage bann dimoune pou faire bann kitsoz exageré. Resultat: Bien vite bann dimoune inn commence adore sa bann zimage-la mem, seki finn amenn bann grand debat, surtout concernant l’adoration bann zimage ki ena enn grand l’importance dan bann religion orthodoxe.a Mais selman, prophete Isaïe ti ena raison pou pose sa question-la: “Ar ki kitsoz zot pou compare Bondié, ek ki zimage zot pou faire ki ressemblé Li?”—Isaïe 40:18, La Sainte Bible, par Abbé Crampon.

Examine sa bann verset la Bible-la: Isaïe 44:13-19; Actes 10:25, 26; 17:29; 2 Corinthiens 5:7