¿Jáchisute ito nunüye jume Jehovata testígom?

¿Jáykim Jehovata testígome täya? Jámak wátem émowte jëla jowʼwak, enchimʼmakte tekipanoa o nawte excuela; jámak ket émomakte Liosta Noki bétana etʼtexwala. ¿Jábesate tuá ajäria? ¿Jatchiásute géntetamak nonoka itom suálew bétana?

Kiá jabe gente bénasite. Itómaki ówim éntok jámuchim sïmat yew sákalame ayu polóbem éntok ríkom. Watemte wepu religióntate jípurey wate éntok katʼte Liosta suáley; júnentak junʼne, ketune ka Jehovata testígotaka, tiémpotate ito makʼkak jume maxtiárim Liosta Nókipo wëme tüysi at suaka am bit bechïbo (Hechos 17:11). Juka itom täyakawi ata mabétak chúkula éntok wewépulayka desicióntate nükak: Jehová Liosta adorarua báreka.

Biblia estúdiopo jita türite ama yew nunüye. Sïme géntem bénasi, problémamte jípure éntokte jijʼjiobe; te utʼtiatate jojoá jume nésawrim Liosta Nokipo wëme chikti wélapo itom jiápsipo an wetua bechïbo, júnel itom jiápsi chë tülisi wéweye (Salmo 128:1, 2). I wepu razón ajäria géntemʼmew itom nonoka bechïbo tü nókim bétana Bíbliapo itom täyakawi.

Bíbliata jíaw pámanite ito wéweria. Jume nésawrim, Bíbliata itom maxtiawi, may tülisi itom eʼetua. Éntoket, itómim yuyue wate géntem yöri bechïbo ket ia pámani árate lútulaysi ito weria éntok tüwatate wéwetua. Itom aʼania tü yorémtunakete bechïbo éntok tekipanoalérom, éntok itom famíliata naw aʼamtua ket tü condúctata itom jíjiputua. Tuate juneyʼya, ke “Diosta sïme yorémem nánancha [am bitcha]”. Junen bechïbo, sïmat ániachi tuate ito sayla, wanay ju raza éntok política ka itom nánaykimte. Eláposu kié jabe gente bénasite junʼne, ka senu pueblo ayu ía bénasi (Hechos 4:13; 10:34, 35).

• ¿Jítaposute alebenʼna jume Jehovata testígom wate gentemʼmaki?

• ¿Jítasu itom maxtiala ju Liosta Noki?