Zava-tsarotra Tsy Maintsy Resen’ny Ray Aman-dreny
Izao tontolo izao dia toerana feno haratsian-toetra be lavitra noho ny taloha. Misy dokam-barotra maro be tsy misy toy izany mifandray amin’ny lahy sy ny vavy. Amidy any amin’ny trano fivarotana enta-madinika ny gazety izay mampiseho ny vehivavy ho toy ny kilalao tsy misy vidiny firy. Mankasitraka amin’ny fomba miharihary fisavihana nataon’ny lehilahy iray tamin’ilay vehivavy niarahany ny hira rock iray. Eny tokoa, araka ny zavatra hita sy re isan’andro dia tontolo iray maloto fitondrantena ity!
NY PROFESORA Greer Litton Fox, mpandinika momba ny fianakaviana dia nanamarika fa amin’ireo firaisana miharihary na firaisana resahina tsy mivantana “40 eo ho eo, izay mety ho hitan’ny olona ao amin’ny televiziona eo anelanelan’ny 1 ora sy sasany tolakandro sy 11 ora alina, dia latsaka ny 5 isan-jato no ataon’olon-droa mpivady”. Noho ireo fampahalalam-baovao izay mampirisika ankarihary ny firaisana, dia tsy mahagaga ny famakiana koa ny “isa mahazendan’ireo zatovovavy bevohoka sy ny vokatra manimba aterak’izany”.
Azo inoana marina fa ho an’ireo ray aman-dreny maniry ny tsara indrindra ho an’ny zanany, dia zava-tsarotra tsy maintsy reseny ny fanabeazana azy ireny eo anivon’ity tontolo maloto fitondrantena ity. Tsy midika anefa akory izany fa manao firaisana avokoa ny tanora rehetra. Ny fanadinadinana natao dia nampiharihary fa ny antsasak’ireo zatovovavy amerikana eo anelanelan’ny 15 sy 19 taona dia efa nanandrana firaisana, ka manamafy izany fa tsy mba toy izany ny antsasany! Ambonin’izany, na dia ny maro amin’ireo efa nanao firaisana aza dia manenina noho izany. Nanoratra toy izao ho an’ilay mpanoratra an-gazety atao hoe Ann Landers ny iray tamin’ireny:
“Nandiso fanantenana ahy ny firaisako tamin’i Joe (ilay ankizilahy niarahako voalohany), dia nanandrana izany indray tamin’i Mike aho, avy eo dia tamin’i Neal ary tamin’i George. Tsy fantatro izay notadiaviko. Na inona anefa izany na inona, dia tsy hitako. Nandray hevitra adaladala maro avy tamin’ireo gazetiboky sy tantara mitohy ao amin’ny televiziona ary sarimihetsika aho. Tsy mitovy amin’izany anefa ny tena izy.
“Raha afaka miresaka amin’ireo tanora zazavavy mamaky ny lahatsoratrao aho, dia holazaiko azy ireo fa ny firaisana eo amin’ny zatovo dia tsy mandamina zava-manahirana fa miteraka zava-manahirana amboniny. Izany dia tsy manao izay hahatsapan’ny zazavavy iray fa tiana izy, fa manao izay hahatsapany kosa fa tsy misy vidiny izy. Hampahafantariko azy ireo fa tsy mahatonga ny zazavavy iray ho ‘vehivavy lehibe’ izany fa mahatonga azy ho latsaka noho izany kosa.
“Raha afaka miresaka amin’ireo ray aman-dreny aho dia hampirisika azy hanantitrantitra amin’ny zanany ny amin’ny fanajan-tena sy ny fari-pitsipika ambony.”
Raha ny marina, amin’ireo tanora izay mifandray akaiky amin’ireo ray aman-dreniny sy mahatsapa tsy fananana ahiahy ao anatin’ny fianakaviany ary manaja ny tenany, dia kely kokoa ny fironany ho latsaka ao amin’ny fahalotoam-pitondrantena noho ireo tsy mba toy izany. Ary misy fandaminana iray voaforon’olona mahery lavitra ny efatra tapitrisa maneran-tany izay, eo anivony, dia ampiana ny tanora hifikitra amin’ny fari-pitsipika ambony lavitra noho izay arahin’ny ankapoben’ny olona ankehitriny.
Noho ireo zava-misy ireo, ahoana no ahafahanareo manampy ny zanakareo mba hiarovany tena amin’ny fahalotoam-pitondrantena mitombo eo amin’izao tontolo izao ankehitriny? Ahoana no ahafahanareo manampy azy ireo hanana fiainana sambatra kokoa, tsara kokoa, ary madio ara-pitondrantena kokoa? Izany no foto-kevitr’ireo lahatsoratra roa manaraka.