Hoavy Mamirapiratra Iray ho An’ireo Zanatsika
HATRAMIN’NY nifaranan’ny Ady Lehibe Faharoa, ireo fitondram-panjakana eo amin’izao tontolo izao dia nanao planina sy nanao sonia fifanekena maro voalamina, natao hiarovana ny sivily any amin’ny ady. Anisan’ireny ny fifanekena ny hamelana ireo fitafiana miaraka amin’ireo fanampiana ara-pitsaboana sy ara-tsakafo, ho tonga any amin’ireo ankizy. Ireo fifanarahana iraisam-pirenena dia mampanantena ny hiaro ny ankizy amin’ny fanararaotana vetaveta sy ny fampijaliana ary ny herisetra. Ireo fifanarahana koa, dia mandrara ny fanaovana lisitra izay rehetra latsaka ny 15 taona, tsy ho ao amin’ny tafika.
Ny The State of the World’s Children 1996, tatitra iray nataon’ny Sampan-draharahan’ny Firenena Mikambana Mikarakara ny Reny sy ny Zaza, dia nihoby ireny lalàna ireny tamin’ny hoe “tena fiovana marina”, ary nanampy teny toy izao: “Ireo mpanao politika izay mahafantatra fa misy fari-pitsipika azo itsarana azy ireo, dia azo inoana kokoa hihevitra ireny fari-pitsipika ireny ao anatin’ny planin’izy ireo.”
Mazava ho azy fa ireo mpanao politika dia mahafantatra ihany koa fa ny fiaraha-monina iraisam-pirenena dia matetika tsy ampy fahaizana sy faniriana hampihatra ireo lalàna. Noho izany, ilay tatitra dia miaiky fa “raha jerena hoe hatraiza no tsy niraharahana ireny foto-pitsipika ireny, dia mora ny tsy hiraharaha ireo fitambaran-dalàna iraisam-pirenena misy amin’izao fotoana izao”.
Avy eo, dia misy koa ny resa-bola. Tamin’ny 1993, dia nisy ady nandrotika firenena 79. Firenena mahantra ny 65 tamin’izy ireo. Avy aiza no nahazoan’ireny firenena mahantra ireny ny fitaovam-piadiana nampiasainy mba hiadiana? Ny ankamaroany dia avy tamin’ny firenena manankarena. Ary iza avy ireo dimy voalohany mpanondrana fitaovam-piadiana any amin’ireo tany an-dalam-pandrosoana? Ireo mpikambana maharitra dimy ao amin’ny Filan-kevi-pilaminan’ny Firenena Mikambana!
Ireo izay miahy
Misy, mazava ho azy, ireo izay miahy lalina ny toe-javatra mampahonena misy an’ireo ankizy any amin’ny ady. Na ny isam-batan’olona, na ireo fikambanana, dia samy manampy amim-pitiavana ireo tanora iharan’ny vokatry ny ady. Ohatra, ny Vavolombelon’i Jehovah, izay tsy miditra amin’ny ady, dia nanao toy izany. Kanefa, ny fanafoanana ny vokatry ny ady eo amin’ny ankizy any amin’ny ady, dia midika marina tokoa ho fanafoanana ny ady mihitsy, fahatsinjovan-javatra iray izay toa tsy dia inoana loatra. Noho ny tantara lavan’ny olombelona teo amin’ny fifandirana sy ny ady, dia maro no manatsoaka hevitra fa ny olombelona dia tsy ho afaka na oviana na oviana hitondra fandriampahalemana maneran-tany. Raha ny amin’io fomba fijery io, dia marina ny azy ireo.
Manatsoaka hevitra koa ny olona fa Andriamanitra dia tsy hisalovana na oviana na oviana amin’ny raharahan’ireo firenena, na hitondra fandriampahalemana maharitra ho an’ny planeta. Raha ny amin’io fomba fijery io, dia tsy marina ny azy ireo.
Ny Mpamorona antsika, i Jehovah Andriamanitra, dia maneho fiheverana lalina ny amin’ireo zava-mitranga eto an-tany. Ao amin’ny Teniny, ny Baiboly, dia manontany toy izao i Jehovah: “Moa sitrako akory va ny fahafatesan’ny ratsy fanahy (...), fa tsy ny hialany amin’ny alehany mba ho velona izy?” Namaly tamim-panamafisana toy izao Andriamanitra: “Tsy sitrako ny fahafatesan’izay maty”. — Ezekiela 18:23, 32.
Hevero izany: Raha maniry an’ireo olon-dehibe ratsy fanahy mba hibebaka sy hifaly amin’ny fiainana ilay Mpamorona antsika be fangoraham-po, dia azo antoka fa maniry ireo ankizy mba ho velona sy hifaly amin’ny fiainana ihany koa izy! Na izany aza, ny Andriamanitsika be fitiavana dia tsy hiaritra tsy misy farany amin’ny fisian’ny ratsy fanahy. “Ny mpanao ratsy hofongorana”, hoy ny fampanantenan’ny Tenin’Andriamanitra. “Rehefa afaka kelikely, dia tsy hisy ny ratsy fanahy”. — Salamo 37:9, 10.
I Jesosy Kristy, izay nanome taratra tamin’ny fomba tanteraka ny toetran’ilay Rainy any an-danitra, dia tia ny ankizy ka nilaza fa “an’ny toa azy ny fanjakan’ny lanitra”. (Matio 19:14). Ny fanaovana sorona ankizy ho an’ireo andriamanitry ny ady, dia sady maharikoriko an’i Jehovah Andriamanitra no maharikoriko an’ilay Zanany, Jesosy Kristy. — Ampitahao amin’ny Deoteronomia 18:10, 12.
Ny fampanantenan’Andriamanitra hoavy mamirapiratra iray
Namela ny ady sy ny fijaliana hisy nandritra ny taonjato maro Andriamanitra, mba hiorina hatramin’ny mandrakizay ho avy ny fahamarinana nolazain’i Jeremia mpaminany manao hoe: “Jehovah ô, fantatro fa tsy an’ny olombelona ny lalan-kalehany, na an’ny mpandeha ny hahalavorary ny diany.” (Jeremia 10:23). Tsy ho ela, hoy ny fampanantenan’ny Baiboly, i Jehovah dia hanamarina ny fiandrianany manerana izao rehetra izao amin’ny ‘fampitsaharana ady hatramin’ny faran’ny tany’. (Salamo 46:9). Nolazaina mialoha ao amin’ny Baiboly koa ny fotoana izay hoe “hanefy ny sabany ho fangady [ny olona], ary ny lefony ho fanetezam-boaloboka; ny firenena tsy hanainga sabatra hifamely na hianatra ady intsony”. — Isaia 2:4.
Inona no hitranga amin’ireo izay nofaranan’ny ady ny fiainany? Misy fanantenana ve ho azy ireny? I Jesosy dia nampanantena fananganana ho an’ny maty, ho eo amin’ny tany iray tsy hisy ady, tamin’ny filazana hoe: “Avy ny andro (...) ny olona rehetra any am-pasana (...) dia hivoaka”. (Jaona 5:28, 29). Mitovy amin’izany koa, ny apostoly Paoly dia nilaza tamim-patokiana toy izao: “Hisy fitsanganan’ny marina sy ny meloka.” — Asan’ny Apostoly 24:15.
Ho tanteraka tsy misy diso ireo fampanantenan’Andriamanitra. Ananany na ny hery na ny fahatapahan-kevitra hanatanteraka izay rehetra nokasainy. (Isaia 55:11). Rehefa niteny i Jehovah hoe hofaranany ny ady, dia izany no kasainy hatao. Rehefa nampanantena izy ny hanangana ho amin’ny fiainana ireo izay maty, dia hanao izany izy. Izany dia araka ny nolazain’ny anjely Gabriela hoe: “Tsy hisy tsy ho tanteraka ny teny rehetra ataon’Andriamanitra.” — Lioka 1:37.
[Sary, pejy 10]
Rehefa tsy hisy ady intsony, ny ankizy rehetra dia hifaly amin’ny fiainana mahasalama