Fampianarana Manome Fiainana
“Ny Baiboly [no] mpitari-dalana ambony indrindra eo amin’ny fahaiza-miaina.” — Thomas Tiplady, 1924.
TSY manitatra isika raha milaza fa afaka manova fiainana ny fampianarana miorina amin’ny Baiboly. Nampisy heviny ny fiainana sy nanome fanantenana ho an’ireo nahatsiaro ho nanana fiainana poakaty sy namoy fo izy io. Nanoratra toy izao tany amin’ny sampan’ny Vavolombelon’i Jehovah atsy Afrika Atsimo ny vehivavy iray mitaiza irery ny zanany, avy any Namibia:
“Sivy amby roapolo taona aho, ary roa andro monja dia voavakiko ilay boky hoe Manontany ny Tanora — Valiny Mandaitra. Nanohina lalina ny foko izy io satria tena irery aho. Maty tamin’ny lozam-piarakodia ilay tovolahy rain-janako, nefa roa ny zanakay. Mijaly be izahay telo mianaka. Nieritreritra aho indraindray fa tsara kokoa raha vonoiko ho faty ireo zanako, ary avy eo aho hamono tena. Niova anefa ny hevitro rehefa nahazo an’io boky io aho. Iangaviako ianareo hanampy ahy ka hampianatra Baiboly ahy maimaim-poana.”
Ny Baiboly dia bokin-tari-dalana afaka manampy ny olona hahomby eo amin’ny lafiny rehetra amin’ny fiainana: fifandraisana amin’ny fianakaviana sy ny mpiara-miasa ary ny mpiara-belona. (Salamo 19:7; 2 Timoty 3:16). Manome toro lalana marim-pototra ny amin’ny fomba hanaovana ny tsara sy hanalavirana ny ratsy izy io. Boky iray miresaka ny tena zava-misy iainana izy io. Rehefa mamaky azy ianao dia ho hitanao fa feno fitantarana momba ny olona tena nisy izy io. Ho hitanao ny nahatonga ny fiainan’ny sasany ho sambatra sy nahafa-po, nefa ny an’ny hafa nampijaly sy nampahonena. Hanjary hazava tsara aminao hoe inona no zavatra mendrika hatao ary inona no tsy izany.
Fampianarana manome fiainana dieny izao
Manantitrantitra ny Baiboly fa zava-dehibe ny fahendrena azo ampiharina. Hoy izy: “Ny voaloham-pahendrena dia izao: Mahazoa fahendrena”. (Ohabolana 4:7). Ekeny koa fa tsy ampy fahendrena ny olona matetika, hany ka mananatra toy izao izy: “Raha misy hianareo tsy manam-pahendrena, aoka izy hangataka amin’Andriamanitra, Izay manome malalaka ho an’ny olona rehetra”. — Jakoba 1:5.
Manome malalaka ny fahendrena i Jehovah Andriamanitra Mpamorona antsika. Ahoana no anaovany izany? Amin’ny alalan’ny Teniny, dia ny Baiboly, izay ampirisihany mba hovakintsika. Manasa toy izao Andriamanitra: “Anaka, raha raisinao ny teniko, ary raketinao ao am-ponao ny didiko, ka atongilanao amin’ny fahendrena ny sofinao, (...) Dia ho fantatrao marina ny fahatahorana an’i Jehovah, ary ho hitanao ny fahalalana an’Andriamanitra. Fa Jehovah no manome fahendrena”. (Ohabolana 2:1, 2, 5, 6). Rehefa mampihatra ny torohevitra ao amin’ny Tenin’Andriamanitra isika, ka mahita fa tena mahasoa ilay izy, dia takatsika fa mampiseho taratry ny fahendren’Andriamanitra tokoa izy io.
Raiso, ohatra, ny ady amin’ny fahantrana. Mampirisika ny olona hazoto hiasa ny Baiboly ary mampitandrina ny amin’ireo raharaha mandanilany foana ny vola kely ananana. Noho izany, dia mazava fa mifanohitra amin’ny foto-pitsipika ara-baiboly ny fahazaran-dratsy toy ny fifohana sigara sy ny fihinanana paraky ary ny fisotroana alkaola tafahoatra. — Ohabolana 6:6-11; 10:26; 23:19-21; 2 Korintiana 7:1.
Ahoana ny amin’ny herin’ny namantsika eo amin’ny fiainantsika? Hoy ny Baiboly: “Izay miara-dia amin’ny hendry dia ho hendry; fa izay misakaiza amin’ny adala dia hidiran-doza.” (Ohabolana 13:20). Voamarikao ve fa matetika ny fitaoman’ireo mitovy taona aminy no nitarika olona — na antitra na tanora — himamo sy hidoroka zava-mahadomelina ary haloto fitondran-tena? Raha miharoharo amin’ny olona mpanao ireo zavatra ireo tokoa isika, dia ho lasa toa azy ireo, araka ny lazain’ny Baiboly hoe: “Ny fikambanana amin’ny ratsy manimba ny fitondrantena tsara.” — 1 Korintiana 15:33.
Azo antoka fa maniry ho sambatra isika rehetra. Ahoana anefa no hetezan’izany? Takatrao ve fa milaza ny Baiboly hoe tsy voatery ho zavatra no mahasambatra antsika, fa toe-tsaina sy fifandraisana amin’ny hafa kosa, indrindra fa fifandraisana tsara amin’Andriamanitra? (1 Timoty 6:6-10). Nolazain’i Jesosy Kristy tao amin’ilay Toriteny malaza teo An-tendrombohitra fa ny olona tena sambatra dia ireo “mahatsapa izay ilainy ara-panahy” (NW ), “malemy fanahy”, “mangetaheta ny fahamarinana”, “miantra”, “madio am-po”, ary “mpampihavana”. — Matio 5:1-9.
Rehefa mieritreritra lalina ny amin’ireo fampianaran’ny Baiboly ianao, dia ho takatrao ny fomba anampian’izy ireny anao hitondra ny fiainanao. Loharanon-torohevitra tsy manam-paharoa ny Baiboly. Mahasoa foana ny toroheviny, ary tsy teoria fotsiny mihitsy na mitondra fahavoazana ho antsika. Mandray soa foana izay mampihatra ny torohevitry ny Baiboly.
Fampianarana manome fiainana
Ankoatra ny soa entin’ny Baiboly ho antsika dieny izao anefa, dia manome fanantenana ny amin’ny hoavy koa izy io. Resahiny ny amin’ny fanadiovana lehibe hatao amin’ny tany sy ny fanovana azy io ho fonenana mahafinaritra ho an’ireo manompo an’Andriamanitra. Mariho izao filazana mankahery momba ny hoavy izao: “Indro, ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:3, 4; Ohabolana 2:21, 22.
Eritrereto ange e! Tsy hisy zaza farofy intsony, tsy hisy mosary intsony, tsy hisy aretina mampahatahotra mandany ny herin’ny vatana intsony, tsy hisy fanaintainana mamely intsony! Ho foana ny ranomaso noho ny hakiviana sy fahadisoam-panantenana ary alahelo, satria hovana na hesorina ny zavatra mahatonga ireo. Koa satria ho efa naringan’ny tafik’anjelin’Andriamanitra ny ratsy fanahy tsy miova, dia tsy hisy intsony ny mpangalatra, mpamono olona, mpandainga ary ny hafa mahatonga ny fiainana tsy hilamina. Hanana ny tranony sy hilamina hankafy izany ny olona. — Isaia 25:8, 9; 33:24; 65:17-25.
Tianao ve izany? Ho tianao ve ny hianatra bebe kokoa momba ny fampiharana ireo foto-pitsipiky ny Baiboly, mba hahafahan’ny tenanao mandray soa dieny izao sy amin’ny hoavy? Raha izany no izy, dia mifandraisa amin’ny Vavolombelon’i Jehovah, ary ho faly izy ireo hampiditra anao sy ny fianakavianao ao amin’ilay fandaharana “fampianarana manome fiainana” atao maneran-tany.