‘Tsy Nahomby Ilay Ezaka Natao’

MANERAN-TANY dia mitombo ny hantsana mampisaraka ny mahantra sy ny manankarena. Nisy ezaka natao mba hampitoviana ny fari-piainan’ny olona eran-tany. Hoy ny fikambanana iraisam-pirenena iray mahakasika izany: “Efa 50 taona izao no nanaovana ilay ezaka, ary hita fa tsy nahomby izy io. Tsy nanatsara ny fari-piainan’ny olona eran-tany io ezaka io. Lasa simba ny tontolo iainana, mbola tsy nisy toy izany ny herisetra, mikororosy ny toe-karenan’ny firenena maro, mihamitombo ny fahantrana sy ny hanoanana, tsy ampy ny tany onenana, mihabetsaka ny mpifindra monina ka mampikorontana ny fiaraha-monina. Tsy nahomby tokoa ilay ezaka natao.”

Inona no tsy nety? Rehefa tia tena ny olona dia ratsy foana ny vokany. Hoy i George Soros, mpandraharaha: “Manova ny zava-drehetra ho entam-barotra ny fifanakalozana ara-barotra, tafiditra amin’izany ny olona (mpiasa) sy ny natiora (tany).” Tsy lavorary koa moa ny olona. Mamerina ny hevitr’i Karl Popper i Soros rehefa nilaza hoe: “Isika mihitsy no efa tsy mahay. Tsy ho vitantsika mihitsy ny hanorina fiaraha-monina tonga lafatra, raha ny tena marina.”

Tsy zava-baovao akory ny tsy fitovian’ny fari-piainana. Efa niresaka momba ireo “izay mampahory ny mahantra sy manorotoro ny malahelo” ny mpanoratra ao amin’ny Baiboly, 800 taona talohan’i Kristy. (Amosa 4:1) Hoy ny mpanjaka iray, 3 000 taona lasa izay, rehefa nahita ny tsy rariny toy izany: ‘Manapaka ny namany ny olona ka mampiditra loza aminy.’—Mpitoriteny 8:9.

Inona no vahaolana? Afaka hanafoana ny tsy fitoviana eo amin’ny lafiny ara-toe-karena ve ny fikambanana iraisam-pirenena, raha miray hina? Hoy i Soros: “Tsy misy fikambanana afaka miaro ny fahafahana sy zon’ny olona tsirairay, ny tontolo iainana, ny rariny, ary indrindra indrindra ny fandriampahalemana. Ny ankamaroan’ny fikambanana misy dia fitambarana firenena. Ny hahasoa ny tenany anefa no katsahin’ireny firenena ireny voalohany, fa tsy ny hahasoa ny besinimaro. Tsy mahatanteraka ireo fampanantenana voasoratra ao amin’ny dinany ny Firenena Mikambana.”

Tokony hanary toky ve isika? Tsia. Efa akaiky ilay fanjakana marina hanerana ny tany! Izy io no foto-kevitry ny fitorian’i Jesosy. Nantsoiny hoe “ny Fanjakan’Andriamanitra” izy io, ary nampianariny hivavaka momba azy io ny mpianany. (Lioka 11:2; 21:31) Efa miorina any an-danitra ny Fanjakan’Andriamanitra, ary kely sisa dia hanala ny tsy rariny rehetra amin’ity tany ity. (Apokalypsy 11:15, 18) Tsy hanapaka mandritra ny fotoana fohy fotsiny izy io, fa haharitra mandrakizay. (Daniela 2:44) Hofoanan’izy io tanteraka ny fahantrana sy ny fampahoriana. Hoavy mahafinaritra ho an’ny mahantra sy ny ory re izany, ary ho an’ny olona rehetra mihitsy!

[Sary, pejy 21]

Tsy vahaolana ho an’ny mahantra ilay ezaka natao mba hampitoviana ny fari-piainan’ny olona. An’arivo tapitrisany maro no mbola tsy manana jiro sy rano