Mahità Fifaliana ao Amin’ny Tenin’Andriamanitra

“SAMBATRA ny olona izay . . . ny lalàn’i Jehovah no sitrany.” Ny olona toy izany dia mamaky ny Tenin’Andriamanitra “andro aman-alina.” (Sal. 1:1, 2) Mahatsapa izany fahasambarana izany ve ianao? Ahoana no ahafahanao mampitombo ilay fifaliana entin’ny Tenin’Andriamanitra ho anao?

Mihainoa rehefa miteny i Jehovah

Aza mamaky teny tsirairay fotsiny. Ataovy hita an’eritreritra ireo fisehoan-javatra vakinao. Alao sary an-tsaina ny feon’ireo miteny. Rehefa mamaky ireo toko voalohany amin’ny Baiboly ianao, dia ataovy toy ny renao i Jehovah mampahafantatra tsikelikely, izay ataony mba hanomanana ny tany hipetrahan’ny olombelona. Henoy ny filazany amin’ny Zanany, ilay Mpiasa Faran’izay Mahay, hoe tonga ny fotoana hamoronana ny olombelona voalohany. Alao sary an-tsaina ilay tarehin-javatra: Mikomy i Adama sy i Eva, mamoaka didim-pitsarana momba azy ireo Andriamanitra, ka avy eo dia mandroaka azy avy ao amin’ny Paradisa. (Genesisy, toko 1-3) Ataovy toy ny renao, ka mampahatahotra anao, ilay feo avy any an-danitra mampahafantatra an’i Jesosy Kristy ho ny Zanaka malalan’Andriamanitra, ilay nirahiny mba hanome ny ainy ho an’ny olombelona. (Matio 3:16, 17) Ataovy toy ny hitanao ny fihetsiky ny apostoly Jaona mahare an’i Jehovah milaza hoe: “Indro, havaoziko ny zavatra rehetra.” (Apok. 21:5) Tena mitondra fahafinaretana tokoa ny famakiana ny Tenin’Andriamanitra amin’izany fomba izany!

Manohiza mamaky ny teny ara-tsindrimandry, dia hanjary hahafantatra an’i Jehovah ho Andriamanitra tena misy sy heni-kaja ary mahatahotra ianao. Ho voasintona mafy ianao hanatona Azy, satria tia antsika Izy, mamindra fo amintsika, manampy antsika raha manao ny sitrapony amim-panetren-tena foana isika, ary manampy antsika hahita soa amin’izay rehetra ataontsika.—Josoa 1:8; Sal. 8:1; Isaia 41:10.

Arakaraka ny andanianao fotoana hamakiana ny Baiboly no hitomboan’ny fahafaham-ponao, satria mihamitombo ny fahalalanao ny sitrapon’Andriamanitra momba anao. Tsy izay ihany anefa no fahafinaretana ho tsapanao. Rehefa manampy anao handamina zava-manahirana amim-pahendrena ny famakianao Baiboly, dia hilaza toy ilay mpanao salamo ianao hoe: “Mahagaga ny teni-vavolombelonao, ka dia mitandrina azy ny fanahiko.” (Sal. 119:129) Ho faly koa ianao rehefa hitanao avy ao amin’ny Soratra Masina ireo toro lalana izay hanampy anao hamolavola ny fisainanao sy ny fanirianao hifanaraka amin’izay tian’Andriamanitra.—Isaia 55:8, 9.

Manome tari-dalana ara-pitondran-tena miaro antsika ny Baiboly, ary mampiseho amintsika ny lalana tsara. Eo am-pamakiantsika azy io, dia tsapantsika fa tena Ray tokoa i Jehovah, izay mahafantatra ireo voka-dratsy ho hitan’ny olona iray manaiky ho resin’ny filan’ny nofo mpanota. Tsy tiany hizaka ny vokatra mahatsiravina tsy maintsy hateraky ny tsy firaharahana ny fitsipiny ara-pitondran-tena isika. Tiany isika ary tiany hanana ny fomba fiaina tsara indrindra. Ny famakiantsika ny Teniny dia manampy antsika hahatakatra tsara kokoa fa fitahiana ny manana azy ho Andriamanitra sady Ray.

Mamakia Baiboly isan’andro

Hoy ny mpanao salamo momba ny olona mamaky ny Tenin’Andriamanitra isan’andro: “Ny asany rehetra dia ataony lavorary avokoa.” (Sal. 1:3) Tsy tanteraka isika, miaina eo anivon’ny tontolo ratsin’i Satana, ary miezaka handrapaka antsika ny Devoly. Na izany aza anefa, raha mamaky sy mampihatra tsy tapaka ny Tenin’Andriamanitra isika, dia ho tomombana ny asa rehetra ataontsika ka mahakasika ny fifandraisantsika amin’i Jehovah.

Be dia be ny fanerena hitantsika avy amin’ity tontolo tranainy ity. Hahazo tanjaka anefa isika, raha mifantoka amin’ireo hevitry ny Mpamorona, na dia vetivety monja isan’andro aza. Ny sasany izay nampidirina an-tranomaizina noho ny finoany dia tsy nanana afa-tsy andinin-teny sendra hitany tetsy sy teroa, tao amin’ny gazety mpiseho isan’andro. Nohetezany izy ireny, nianarany tsianjery, ary nosaintsaininy. Nitahy ny ezaka nataony i Jehovah, satria nanao izay azony natao izy ireny, teo amin’ny toerana nisy azy, mba handraisana fahalalana avy tamin’ny Tenin’Andriamanitra. (Matio 5:3) Ny ankamaroantsika anefa manana fahalalahana lehibe lavitra noho izy ireny. Tsy tokony hihevitra isika fa hiteraka vokatra mahagaga eo amintsika ny famakiana haingana andinin-teny iray indray mandeha isan’andro. Hahazo fitahiana kosa anefa isika, raha manova ireo zavatra omentsika ny toerana voalohany, mba hamakiana ampahany iray ao amin’ny Baiboly isan’andro, sy hieritreretana momba azy, ary hampiharana azy eo amin’ny fiainantsika.

Azo ampoizina anefa fa ho voakorontana na dia ny fandaharam-potoana tsara indrindra aza. Rehefa mitranga izany, dia hanome ny toerana voalohany ho an’izay tena zava-dehibe isika. Tsy hinia tsy hisotro rano mandritra ny iray na roa andro isika, ohatra. Koa na inona na inona àry mipoitra eo amin’ny fiainantsika andavanandro, dia tokony haka fotoana foana isika hamelombeloman-tena amin’ny ranon’ny fahamarinana.—Asa. 17:11.

Vakio ny Tenin’Andriamanitra manontolo

Efa namaky ny Baiboly manontolo ve ianao? Misy kivy rehefa hoe hamaky manomboka eo amin’ny Genesisy ka hatramin’ny Apokalypsy. Noho izany, dia maro tamin’ireo naniry hamaky ny Baiboly manontolo no nanomboka tamin’ny famakiana ny Soratra Grika Kristianina. Nahoana? Angamba satria hitany fa mahakasika azy kokoa ireo bokin’ny Baiboly ireo, noho izy te hanara-dia an’i Kristy. Na angamba satria toa tsy be loatra ny tokony hovakina amin’ireo Soratra Grika Kristianina: mahery kelin’ny ampahefatry ny Baiboly monja. Rehefa avy namaky ireo boky 27 ireo anefa izy, dia niverina tany amin’ireo boky 39 amin’ny Soratra Hebreo, ka nanomboka namaky sy nankafy azy ireo. Rehefa vitany ny Soratra Hebreo, dia efa nahazo fahazarana mamaky Baiboly tsy tapaka izy ireo, ka nanohy izany, tamin’ny famakiana ny Soratra Grika Kristianina fanindroany, ary tsy nijanona intsony. Enga anie ianao hanao ny famakiana ny Tenin’Andriamanitra ho fahazarana eo amin’ny fiainanao manontolo toy izany koa.

Misy olona tsy mahay mamaky teny ve ao amin’ny fianakavianao na eo amin’ireo mpiara-manompo aminao? Nahoana raha manipy hevitra ny hamaky ny Baiboly tsy tapaka ho an’izany olona izany? Samy handray soa avy amin’izany na ianao na izy, rehefa misaintsaina sy mampihatra izay renareo.—Apok. 1:3.

Rehefa mandeha ny fotoana, dia mety ho te hanao zavatra manokana sasany mifandray amin’ny famakianao ny Baiboly ianao. Hanampy anao izany hahita ny fifandraisana misy eo amin’ireo tapany samihafa ao amin’ny Baiboly. Raha manondro andinin-teny hafa ny andininy sasany ao amin’ny Baibolinao, izy ireny dia mety hanome anao tsipiriany ara-tantara sy fitantarana hafa mifanitsy aminy. Mety hanampy anao hahafantatra ny toe-javatra nitarika ho amin’ny fanoratana ireo salamo samihafa sy ireo taratasy nosoratan’ny apostolin’i Jesosy Kristy, izy ireny. Ireo boky Fahatakarana ny Hevitry ny Soratra Masina (frantsay) dia misy fanazavana ara-tantara be dia be momba ireo olona sy toerana ary toetra tsara voalaza ao amin’ny Baiboly. Misy tabilao ao mampiseho ny fahatanterahan’ny faminaniana ara-baiboly, sy milaza izay mpanjaka sy mpaminany niara-belona, ary manome daty mety ho nitrangan’ny zavatra maro tantarain’ny Baiboly.

Rehefa misaintsaina momba izay ianaranao ianao, dia ho takatrao ny anton’ny fisehoan-javatra sasany teo amin’ny vahoakan’Andriamanitra. Ho azonao koa ny antony nanaovan’i Jehovah zavatra toy izao na toy izao tamin’ny vahoakany. Ho hitanao ny fomba fijerin’i Jehovah momba ny zavatra ataon’ireo fitondram-panjakana sy vahoaka ary isam-batan’olona. Hanampy anao izany hahatakatra tsara kokoa ny fomba fisainany.

Hanjary hahaliana anao kokoa ireo tantara ara-baiboly, rehefa mahita an’eritreritra ny toerana nisehoany ianao. Mampahafantatra ny toetoetran’ireo toerana sy ireo elanelan-tany ny sarin’ireo tany voalaza ao amin’ny Baiboly. Tamin’ny toerana taiza ho aiza, ohatra, no nitan’ny Isiraelita ny Ranomasina Mena? Nanao ahoana ny haben’ny Tany Nampanantenaina? Tonga hatraiza ny dian’i Jesosy, nandritra ny fanompoany teto an-tany? Inona avy no zavatra hitan’i Paoly nandritra ireo dia misionerany? Manome tsipirian-javatra izay hahatonga ny vakiteninao ho velombelona ireo sarintany sy fanazavana ara-jeografia. Aiza no hahitanao sarin’ireo tany voalaza ao amin’ny Baiboly? Misy sasany ao amin’ny Soratra Masina—Fandikan-tenin’ny Tontolo Vaovao sy ao amin’ny Baiboly malagasy sasany. Misy sarintany 70 eo ho eo ao amin’ireo boky Fahatakarana, ary misy fanondroana sarintany any amin’ny faran’ilay boky voalohany. Ampiasao ny Fanondroana Bokin’ny Vavolombelon’i Jehovah mba hahafantarana izay misy sarintany hafa. Raha tsy manana ireo zavatra ireo ianao, dia ampiasao ireo sarintany avoaka ao amin’ny Tilikambo Fiambenana mba hanampiana anao eo amin’ny famakianao ny Baiboly.

Ao amin’ny Soratra Hebreo, dia mankalaza an’i Jehovah i Davida Mpanjaka hoe: “Endrey, zava-tsoa amiko indrindra ny hevitrao, Andriamanitra ô! Akory ny hamaron’ny isany!” (Sal. 139:17) Ao amin’ny Soratra Grika Kristianina, dia midera an’i Jehovah ny apostoly Paoly, satria “nampahazava ny fonay ho amin’ny fahazavan’ny fahalalana ny voninahitr’Andriamanitra eo amin’ny tavan’i Jesosy Kristy” Izy. (2 Kor. 4:6) Nisy an-jatony taona maro nampisaraka ny fotoana niainan’i Davida sy i Paoly; kanefa, samy nahita fahafinaretana avy tamin’ny Tenin’Andriamanitra izy ireo. Ho toy izany koa ianao, raha maka fotoana hamakiana izay rehetra nomen’i Jehovah anao ao amin’ireo pejin’ny Teniny ara-tsindrimandry.