Fanomanana Lahateny ho An’ny Fiangonana

NOMANINA mba hahasoa ny fiangonana manontolo ny fandaharan’ny Sekolin’ny Fanompoana. Manome fampianarana sarobidy koa anefa ireo fivoriana hafa sy ireo fivoriambe. Raha nomena anjara any amin’ny iray amin’ireo ianao, dia andraikitra mavesa-danja no nankinina taminao. Nampirisika an’i Timoty, mpiandraikitra kristianina, ny apostoly Paoly mba hitandrina hatrany ny fampianarany. (1 Tim. 4:16) Ireo tonga amin’ny fivoriana kristianina dia nanokana fotoana sarobidy—ny sasany aza nanao ezaka mafy dia mafy—mba ho eo ka hahazo fampianarana momba izay rehetra mahakasika ny fifandraisany amin’Andriamanitra. Tena tombontsoa tsy manam-paharoa tokoa ny manome izany fampianarana izany ho azy ireo! Ahoana no ahafahanao miantsoroka azy io tsara?

Hevitra Misongadina ao Amin’ny Baiboly

Miorina amin’ny tapany ao amin’ny Baiboly asaina vakina amin’ny herinandro io lafiny iray amin’ny sekoly io. Tokony hoantitranterina ny hoe: Amin’ny ahoana izy io no mahakasika antsika amin’izao andro izao? Milaza ny Nehemia 8:8 fa namaky ampahibemaso ny Tenin’Andriamanitra i Ezra sy ireo namany, ary ‘nanazava tsara ny heviny’ no sady nanampy ny olona hahazo tsara izay nolazaina. Manome anao fahafahana hanao izany koa ny famelabelaranao ireo hevitra misongadina ao amin’ny Baiboly.

Ahoana no tokony hanomananao io anjara io? Raha mety, dia vakio herinandro mialoha, na mahery, ilay tapany ao amin’ny Baiboly asaina vakina. Eritrereto avy eo ny amin’ireo mpanatrika fivoriana sy ny zavatra ilainy. Mivavaha momba ilay izy. Inona no torohevitra, na ohatra, na toro lalana hitanao ao amin’io tapany ao amin’ny Tenin’Andriamanitra io, ka mifanaraka amin’izany zavatra ilaina izany?

Tena ilaina ny fanaovana fikarohana. Misy ny Fanondroana Bokin’ny Vavolombelon’i Jehovah ve amin’ny fiteninao? Raha eny, dia ampiasao tsara izy io. Rehefa mikaroka ny fanazavana efa navoaka momba ireo andinin-teny nofidinao hifantohana ianao, dia mety hianatra momba ny zava-nitranga ara-tantara, ny fahatanterahan’ny faminaniana, ny famakafakana momba ny toetran’i Jehovah, na fanazavana toro lalana. Aza mitady hanazava hevitra be loatra. Andininy vitsivitsy monja no ifantohy, satria tsara kokoa raha vitsivitsy izy ireo, nefa voazava tsara.

Mety hasaina hangataka ny mpanatrika hilaza ny soa noraisiny avy tamin’ny famakiana Baiboly tamin’io herinandro io koa ianao, amin’io anjara io. Inona no hitany fa hahasoa azy eo amin’ny fianarany manokana sy ny fianaram-pianakaviany, na eo amin’ny fanompoany, na koa eo amin’ny fomba fiainany? Toetran’i Jehovah inona avy no niharihary, teo amin’ny fifandraisany tamin’ny vahoakany sy ny firenena hafa? Inona no hitan’ny mpanatrika fa nanatanjaka ny finoany sy nanamafy ny fankasitrahany an’i Jehovah? Aza mandany fotoana be loatra amin’ny tsipirian-javatra. Ny hevitr’ireo zavatra nofidinao sy ny fomba azo ampiharana azy no antitrantero.

Lahateny Fampianarana

Izy io dia miorina amin’ny lahatsoratra iray ao amin’ny Tilikambo Fiambenana na ny Mifohaza!, na angamba amin’ny tapany iray ao amin’ny boky iray. Mazàna izy io no lava raha oharina amin’ny fotoana omena anao. Ahoana no tokony hanaovanao io anjaranao io? Toy ny ataon’ny mpampianatra, fa tsy toy ny ataon’ny olona iray mamaky lahatsoratra fotsiny. Tsy maintsy “mahay mampianatra” ny mpiandraikitra.—1 Tim. 3:2.

Atombohy amin’ny fandinihana ilay lahatsoratra ny fanomananao. Jereo ireo andinin-teny. Saintsaino ireo hevitra. Iezaho hatao aloha ben’ilay daty hanaovanao ny anjaranao izany. Tadidio fa ampirisihina hamaky mialoha ilay lahatsoratra hiorenan’ny anjaranao ireo rahalahy. Tsy famerenana na famintinana ilay lahatsoratra àry no asaina ataonao, fa fampisehoana kosa ny fomba hampiharana azy. Mifidiana tapany amin’ilay lahatsoratra, izay azonao ampiharina mba hanampiana ilay fiangonana.

Samy manana ny toetra mampiavaka azy ny fiangonana tsirairay, tsy misy hafa amin’ny ankizy samy manana ny toetrany avy. Tsy mamerimberina fitsipika amin’ny zanany fotsiny ny ray na reny iray mahay mampianatra. Miara-manjohy hevitra amin’ny zanany izy. Manisy fiheverana ny toetran’ilay zaza sy ireo zava-manahirana mahazo azy, izy. Toy izany koa fa miezaka hanome ny fanampiana ilain’ilay antokon’olona iresahany ireo mpampianatra ao amin’ny Efitrano Fanjakana. Tsy hampiasa ohatra mety hahasanganehana ny mpanatrika iray anefa ny mpampianatra mahay iray. Hisarika ny saina ho amin’ireo tombontsoa efa noraisina noho ny fanarahana ny lalan’i Jehovah izy. Ary raha manana olana ireo anisan’ny fiangonana, dia hanasongadina izay torohevitry ny Soratra Masina hanampy azy hamaha izany tsara izy.

Manohina ny fon’ny mpanatrika ny fampianarana amin’ny fomba tsara. Ny fampianarana toy izany akory tsy filazana zava-misy fotsiny, fa fahaiza-manosika ny mpihaino hankasitraka ny hevitra asehon’ireny zava-misy ireny koa. Mitaky fiheverana amim-pahatsorana an’ireo izay ampianarina izany. Tokony hahafantatra an’ilay andian’ondry ny mpiandry ondry ara-panahy. Raha manam-pitiavana izy ka mitadidy ny zava-manahirana ny tsirairay avy aminy, dia hahay hampahery rehefa miteny, hahazo ny fihevitry ny hafa, hiombom-pihetseham-po aminy ary haneho fangoraham-po.

Fantatry ny mpampianatra mahay fa tsy maintsy manana zava-kendrena mazava tsara ny lahateny iray. Tokony hisongadina ao ireo hevitra fototra, mba hahafahana hitadidy azy. Tokony hisy hevitra azo ampiharina ho voarain’ny mpihaino, ka hisy vokany eo amin’ny fiainany.

Fivoriana Momba ny Fanompoana

Somary hafa noho izany ny fanaovana anjara miorina amin’ny lahatsoratra iray ao amin’ny Fanompoantsika Ilay Fanjakana. Matetika ianao no hasaina hampita ilay fanazavana manontolo amin’ny mpanatrika, fa tsy hifantina izay mifanentana indrindra aminy. Ampio izy ireo hanjohy hevitra momba ireo andinin-teny iorenan’ny torohevitra omena ao amin’ilay lahatsoratra. (Tit. 1:9) Voafetra ny fotoana, ka mazàna no tsy ahafahanao mampiditra fanazavana fanampiny.

Mety hasaina hamelabelatra fanazavana tsy miorina amin’ny Fanompoantsika Ilay Fanjakana koa ianao. Mety hanondro lahatsoratra iray ao amin’ny Tilikambo Fiambenana ilay toromarika, na mety ho teny fanamarihana vitsivitsy monja. Anjaranao mpampianatra ny mandinika ny zavatra ilain’ireo mpiara-manompo aminao, mifandray amin’ilay anjaranao. Mety hila hampiasa fanoharana iray fohy sady mazava ianao, na hitantara zava-nitranga mifanentana amin’ilay anjaranao. Tadidio fa tsy ny hiresaka momba ilay foto-kevitra fotsiny akory no ilaina amin’io anjara io, fa ny hanampy ireo mpiara-manompo aminao hanao ilay asa asain’ny Tenin’Andriamanitra atao sy hahita fifaliana eo am-panaovana azy.—Asa. 20:20, 21.

Rehefa manomana ny anjaranao ianao, dia eritrereto ny toe-javatra misy an’ireo mpiara-manompo aminao. Anaovy teny fiderana izy ireo, noho izay efa ataony. Ahoana no mety hitomboan’ny vokatra hitany sy ny fifaliany eo amin’ny fanompoana, raha ampihariny ireo fanipazan-kevitra ao amin’ilay fanazavana?

Misy fampisehoana na fanadinadinana ve ny anjaranao? Raha eny, dia tokony homanina aloha be izany. Mety halaim-panahy hangataka olon-kafa handamina izany ianao, nefa tsy ahazoana vokatra tsara indrindra foana izany. Raha mbola azo atao koa, dia anaovy famerenana ilay fampisehoana na fanadinadinana, alohan’ny andro hanaovana ilay fivoriana. Ataovy azo antoka fa tena hanatsara ilay fampianaranao io tapany amin’ny anjaranao io.

Fivoriambe

Mety homena anjara amin’ny fandaharan’ny fivoriambe ireo rahalahy mamboly toetra ara-panahy tsara dia tsara, ary tonga mpandahateny sy mpampianatra mahay. Manome fahafahana manokana hampita ny fampianaran’Andriamanitra ny fivoriambe. Mety ho lahateny vakina no anaovana izany, na drafitra, na toromarika ho an’ny fampisehoana tantara ara-baiboly ampiharina amin’ny andro ankehitriny, na koa fehintsoratra iray misy toromarika fotsiny. Raha mahazo tombontsoa toy izany ianao, dia fakafakao tsara ilay fanazavana asaina velabelarinao, mandra-pahatakatrao tsara ny maha zava-dehibe azy.

Ireo voatendry hanao lahateny vakina dia tokony hamaky azy io ara-bakiteny. Tsy manova ny firafitry ny fehezanteny na ny fanazavana ao izy. Fakafakainy tsara ilay izy, mba hahitany mazava tsara ireo hevi-dehibe sy ny fomba amelabelarana azy. Mamerimberina mamaky azy amin’ny feo avo izy, mandra-pahainy manonona ilay lahateny amin’ny fanamafisana tsara ireo hevitra, sy amin’ny fanehoana hafanam-po, fitiavana, fihetseham-po, fahamaotinana, ary fatokisan-tena, kanefa koa amin’ny feo mafy sy mahery, mifanentana amin’ny mpanatrika be dia be.

Ireo rahalahy tendrena hanao lahateny miorina amin’ny drafitra dia manana andraikitra hamelabelatra ilay fanazavana, amin’ny fanarahana akaiky ilay drafitra. Tsy hamaky ilay drafitra fotsiny izy mandritra ny lahateniny. Tsy hanova azy ho tonga lahateny vakina koa izy, rehefa manomana azy. Tokony hamelabelatra ilay fanazavana, tsy an-kijery soratra, sy avy amin’ny fo, kosa izy. Tena ilaina ny manaraka tsara ny fotoana voalaza ao amin’ilay drafitra, mba hamelabelarana amin’ny fomba mazava ny hevi-dehibe tsirairay aseho ao. Tokony hampiasa tsara ireo hevitra sy andinin-teny voatanisa eo ambanin’ireo hevi-dehibe ilay mpandahateny. Tsy tokony hanala hevitra ao amin’ilay drafitra izy mba hahafahany hampiditra hevitra fanampiny izay tiany manokana. Ny Tenin’Andriamanitra, mazava ho azy, no iorenan’ilay fampianarana. Ny ‘hitory ny teny’ no andraikitry ny anti-panahy kristianina. (2 Tim. 4:1, 2) Koa tokony hihevitra manokana an’ireo andinin-teny ao amin’ilay drafitra àry ny mpandahateny, hanjohy hevitra momba azy ireo sy hanao fampiharana azy ireo.

Aza mangataka andro lava

Manana fahafahana hanao anjara na lahateny matetika ve ianao? Ahoana no ahafahanao manao azy rehetra araka ny tokony ho izy? Aza andrasana ho efa am-poto-moty vao manomana ireo anjaranao.

Ilaina hoeritreretina tsara mialoha izay lahateny tena hahasoa ireo mpiara-manompo aminao. Aoka àry ianao hizatra hamaky avy hatrany ilay zavatra asaina hazavainao, isaky ny mahazo anjara. Amin’izay, dia afaka mieritreritra momba azy io foana ianao eo am-panaovana zavatra hafa. Mety handre tenin’olona hanampy anao hahita ny fomba tsara indrindra hampiharana ilay fanazavana ianao mandritra ny andro na herinandro vitsivitsy mialoha ny famelabelaranao ny anjaranao. Mety hisy tarehin-javatra hipoitra, izay hampiseho fa tonga amin’ny fotoana ilana azy ilay lahateny. Ilana fotoana ny mamaky sy mieritreritra momba ny anjaranao raha vantany vao voarainao ilay izy, nefa tsy very maina foana izany fotoana izany. Rehefa mipetraka hanao ilay drafitrao amin’izay ianao, dia ho hitanao fa hanampy anao be dia be ilay nieritreretanao momba azy ela be mialoha. Tsy hatahotahotra ianao raha manomana ny anjaranao toy izany, ary ho afaka hampiseho ilay fanazavana mba ho azo ampiharina sy hanohina ny fon’ireo mpiara-manompo aminao manatrika eo.

Ankasitraho ilay fahaizana nankinina taminao, mifandray amin’ny fandaharam-pampianarana nataon’i Jehovah ho an’ny vahoakany, dia hanome voninahitra azy ianao ary ho fitahiana ho an’ireo tia azy.—Isaia 54:13; Rom. 12:6-8.