Vakiteny Tsy Misy Diso

MILAZA ny Soratra Masina fa ny hahatongavan’ny karazan’olona rehetra “amin’ny fahalalana ny marina” no sitrapon’Andriamanitra. (1 Tim. 2:4) Mifanaraka amin’izany, rehefa mamaky Baiboly amin’ny feo avo isika, dia tokony hiseho eo amin’ny fomba famakintsika ny faniriantsika hampita fahalalana marina.

Mila mahay mamaky amin’ny feo avo ny Baiboly sy ny boky manazava ny Baiboly na ny tanora na ny antitra. Ary isika Vavolombelon’i Jehovah dia manana andraikitra hizara ny fahalalana an’i Jehovah sy ny lalany amin’ny hafa. Matetika no mila mamaky teny amin’olon-kafa isika amin’izany. Mamaky teny koa isika eo anivon’ny fianakaviana. Ao amin’ny Sekolin’ny Fanompoana, dia mandray torohevitra mba hanatsarana ny famakiany teny amin’ny feo avo ny rehetra, na rahalahy na anabavy, na antitra na tanora.

Tokony horaisina ho zava-dehibe ny famakiana ny Baiboly ampahibemaso, atao amin’olona mitokana, na amin’ny fiangonana manontolo. Ara-tsindrimandrin’Andriamanitra ny Baiboly. Fanampin’izany, dia “velona sy mahery ny tenin’Andriamanitra . . ., ka mahay mamantatra ny eritreritra sy ny fisainan’ny fo.” (Heb. 4:12) Mirakitra fahalalana sarobidy tsy hita any an-toeran-kafa ny Tenin’Andriamanitra. Afaka manampy ny olona iray hahafantatra ilay hany Andriamanitra marina sy hifandray tsara aminy ary handamina ireo zava-manahirana eo amin’ny fiainana, izy io. Manazava ny fomba hahazoana ny fiainana mandrakizay ao amin’ny tontolo vaovaon’Andriamanitra izy io. Ny zava-kendrentsika àry dia ny hamaky ny Baiboly amin’ny fomba tsara araka izay azontsika atao.—Sal. 119:140; Jer. 26:2.

Ny fomba hamakian-teny tsy misy diso. Misy lafiny maro ny fahaizana mamaky teny tsara, fa ny fanaovana izany tsy misy diso no dingana voalohany. Ny dikan’izany dia hoe miezaka hamaky izay tena voasoratra eo amin’ilay pejy. Mitandrema mba tsy handingana teny na faran-teny, na handiso ny famakiana teny iray noho izy mitovitovy amin’ny teny hafa.

Mba hamakiana ireo teny araka ny tokony ho izy, dia mila mahazo ny hevitry ny teny manodidina azy ianao. Mitaky fanomanana tsara izany. Hihatsara ny fahaizanao mamaky teny tsy misy diso any aoriana, rehefa mihamahay ianao ka mahita mialoha ny fizotran’ireo hevitra.

Tena ilaina ny mari-piatoana sy ny mari-tsindrimpeo eo amin’ny soratra. Ny mari-piatoana dia mety hanondro ny toerana tokony hiatoana, sy ny faharetan’ilay fiatoana, ary angamba ny tokony ho fiovan’ny feo hidina na hiakatra. Amin’ny fiteny sasany, dia mety ho lasa filazana tsotra ny fanontaniana, na mety hiova tanteraka ny heviny raha tsy ovana araka izay takin’ny mari-piatoana ny feo. Ny fitsipi-panoratana indraindray no mitaky ny mari-piatoana. Amin’ny fiteny maro, dia tsy marina ny vakiteny atao raha tsy arahina tsara ireo mari-tsindrimpeo, na ireo voasoratra izany na ireo atoron’ny hevitry ny teny manodidina. Manova ny feon’ilay litera misy azy ny mari-tsindrimpeo. Fantaro tsara ny fomba fampiasa ny mari-piatoana sy ny mari-tsindrimpeo amin’ny fiteninao. Izany no fanalahidy iray hanaovana vakiteny misy heviny. Tadidio fa ny hampita hevitra no tokony ho zava-kendrenao, fa tsy hanonona teny fotsiny.

Ilaina ny manao fanazaran-tena, raha tianao ny hianatra hamaky teny tsy misy diso. Fehintsoratra iray ihany aloha vakina, ary averimbereno vakina ilay izy avy eo, mandra-pamakinao azy tsy misy diso. Avy eo, dia mifindrà ho eo amin’ny fehintsoratra manaraka. Ary farany, dia miezaha hamaky pejy maromaro, ka tsy handingana, na hamerina, na handiso ny famakianao ireo teny. Rehefa avy nanao ireo dingana ireo ianao, dia mangataha olona iray hihaino ny vakiteninao sy hilaza izay diso mety hataonao.

Manasarotra ny famakian-teny, ny maso tsy mahita tsara sy ny jiro tsy mazava, any amin’ny tany sasany. Asio fanamboarana ireo zavatra ireo raha azo atao, dia ho azo antoka fa hihatsara ny vakiteninao.

Mety hasaina hamaky ampahibemaso ny fehintsoratra amin’ny Fianarana Boky sy ny Fianarana Ny Tilikambo Fiambenana ireo rahalahy mahay mamaky teny tsara. Tsy fahaizana manonona ireo teny amin’ny fomba mety fotsiny anefa no ilaina amin’izany. Mba hahatongavana ho mpamaky teny ampahibemaso mahay any am-pivoriana, dia mila mamboly fahazarana tsara eo amin’ny vakiteny ataonao manokana ianao. Iray amin’izany ny fahatakaranao fa samy manana ny asany ny teny tsirairay ao anatin’ny fehezanteny iray. Tsy afaka mandingana ny sasany amin’izy ireny ianao, ka mbola hahazo tsara ihany ny hevitr’izay lazaina. Raha diso ny famakianao teny iray, na dia rehefa mamaky samirery aza ianao, dia ho voaolana ny hevitr’ilay fehezanteny. Ny teny nodisoina dia mety ho avy amin’ny tsy fahitana ireo mari-tsindrimpeo na avy amin’ny tsy fahazoana ny hevitry ny teny manodidina. Miezaha hahazo ny hevitry ny teny tsirairay eo anivon’ireo teny manodidina azy. Mariho koa fa miankina amin’ny mari-piatoana ny hevitry ny fehezanteny. Tadidio fa mazàna no teny maromaro miaraka no mampita hevitra. Fantaro izy ireny, satria amin’izay, rehefa hamaky amin’ny feo avo ianao, dia hamaky fitambaran-teny, fa tsy teny tsirairay. Raha azonao mazava tsara ny hevitr’izay vakinao, dia tena hanampy anao hampita fahalalana marina amin’ny hafa izany, rehefa mamaky teny ampahibemaso ianao.

Anti-panahy kristianina efa za-draharaha no nanoratan’ny apostoly Paoly hoe: “Mandra-pihaviko tandremo ny famakian-teny.” (1 Tim. 4:13) Mazava fa afaka manatsara ny vakiteny ataontsika daholo isika rehetra.