Famakiana Andininy Misy Teny Hamafisina Tsara

REHEFA miresaka momba ny fikasan’Andriamanitra amin’ny hafa ianao, na mitokana izany na avy eny amin’ny lampihazo, dia tokony hifantoka amin’ny Tenin’Andriamanitra ny zavatra lazainao. Mamaky andinin-teny ao amin’ny Baiboly ianao amin’izany, ary tokony hataonao tsara izany.

Fanamafisan-teny tsara sy fihetseham-po. Tokony haneho fihetseham-po ny famakiana andinin-teny. Indreto misy ohatra sasany: Rehefa mamaky ny Salamo 37:11 ianao, dia tokony ho re amin’ny feonao fa sady faly ianao no tsy andrinao ilay fiadanana ampanantenaina ao. Rehefa mamaky ny Apokalypsy 21:4, izay miresaka momba ny hiafaran’ny fijaliana sy ny fahafatesana, ianao, dia tokony ho tsapa amin’ny feonao ny fankasitrahanao noho ilay fanamaivanana voalaza ao. Ny Apokalypsy 18:2, 4, 5, izay miangavy ny mpamaky mba hivoaka amin’i “Babylona Lehibe” feno fahotana, dia tokony hovakina amin’ny feo maneho fahamaikana. Tokony ho avy amin’ny fo ilay fihetseham-po aseho fa tsy ho tafahoatra. Ilay andinin-teny sy ny antony ampiasanao azy no hamaritra ny hamafin’ilay fihetseham-po hasehonao.

Ny teny tokony ho izy no hamafiso. Raha tapany iray amin’ilay andinin-teny fotsiny no iorenan’ny fanazavanao, dia tokony hanasongadina izany tapany izany ianao, rehefa mamaky ilay andininy. Ohatra, rehefa mamaky ny Matio 6:33 ianao, dia tsy hanamafy ny hoe “ny fahamarinany” na ny hoe “izany rehetra izany”, raha ny hevitry ny hoe “katsaho aloha ny fanjakany” no tianao hovelabelarina.

Mety hamaky ny Matio 28:19 ianao ao amin’ny anjara iray amin’ny Fivoriana Momba ny Fanompoana. Teny iza avy no tokony hohamafisinao? Raha ny fahazotoana hanomboka fampianarana Baiboly no tianao hampirisihana, dia ny hoe “ataovy mpianatra” no hamafiso. Kanefa mety ho ny andraikitry ny Kristianina hizara ny fahamarinana amin’ny olona vahiny eo an-toerana no tianao horesahina, na ny fampirisihana hifindra any amin’ny ilana fanampiana bebe kokoa. Ny hoe “ny firenena rehetra” no hohamafisinao amin’izay.

Matetika no raisina mba hamaliana fanontaniana ny andinin-teny iray, na mba hanaporofoana hevitra tsy eken’ny hafa. Raha mitovy ny fomba hanamafisana ny hevitra rehetra ao amin’ilay andininy, dia mety ho tsy hitan’ny mpihaino ny ifandraisany amin’ilay fanazavana. Mety hazava aminao izany, fa tsy hazava aminy.

Ohatra, mety hamaky ny Salamo 83:18 ao amin’ny Baiboly iray misy ny anaran’Andriamanitra ianao. Raha ny hoe “Ilay Avo Indrindra” no hamafisinao, dia tsy ho hitan’ilay tompon-trano fa manana anarana Andriamanitra, na dia mety ho toa miharihary aza izany. Ny hoe “Jehovah” no tokony hohamafisinao. Raha miresaka momba ny fiandrianan’i Jehovah kosa anefa ianao, dia ny hoe “Ilay Avo Indrindra” no tokony hohamafisinao, rehefa mamaky io andininy io. Toy izany koa, rehefa hamaky ny Jakoba 2:24 ianao mba hampisehoana fa tsy maintsy ampiarahina ny finoana sy ny asa, raha ny hoe “hamarinina” no hamafisinao, fa tsy ny hoe “asa”, dia tsy ho azon’ny mpihaino sasany ilay tianao hohazavaina.

Ohatra tsara hafa ny Romana 15:7-13. Tapany amin’ny taratasy nosoratan’ny apostoly Paoly ho an’ny fiangonana voaforona Jentilisa sy Jiosy izy io. Manazava ilay apostoly ao fa tsy ny Jiosy voafora ihany no mandray soa avy amin’ny fanompoan’i Kristy, fa ny firenena hafa koa, mba “hankalazan’ny jentilisa an’Andriamanitra koa noho ny famindrampo.” Avy eo i Paoly dia manonona andinin-teny efatra mba hisarihana ny saina ho amin’io tombontsoa nomena an’ireo firenena io. Ahoana no tokony hamakianao ireo andininy ireo, mba hanamafisana ny tian’i Paoly hohazavaina? Asio marika ireo teny hohamafisinao, dia ny hoe “ny jentilisa” ao amin’ny andininy faha-9, ny hoe “ry jentilisa” ao amin’ny andininy faha-10, ny hoe “ry jentilisa rehetra” sy hoe “ny firenena rehetra” ao amin’ny andininy faha-11, ary ny hoe “ny jentilisa” ao amin’ny andininy faha-12. Avy eo, dia vakio amin’ny fanamafisana ireo teny ireo ny Romana 15:7-13. Raha manao izany ianao, dia hazava kokoa sy ho mora azo kokoa ilay fanjohian-kevitr’i Paoly.

Fomba hanamafisan-teny. Azonao hamafisina amin’ny fomba maro ireo teny fototra tianao hisongadina. Tokony hifanentana amin’ny andininy sy ny faritra anaovanao ny anjaranao na lahateninao ilay fomba ampiasainao. Indreto misy fanoloran-kevitra sasantsasany.

Fanovaovam-peo. Izany dia ny fiovan’ny feo, izay mampisongadina ireo teny fototra, raha oharina amin’ireo teny hafa ao amin’ilay fehezanteny. Azo atao tsara ny manamafy teny amin’ny fitenenana mafy kokoa na mora kokoa. Amin’ny fiteny maro, ny fanamafisan-teny dia azo atao amin’ny fanovana ny haavon’ny feo ho maranitra kokoa na hidoboka kokoa. Amin’ny fiteny sasany kosa anefa, ny fanaovana izany dia mety hanova tanteraka ny hevitra. Azo hamafisina koa ireo teny fototra, raha vakina miadana kokoa. Amin’ireo fiteny tsy afaka mampiasa ny fanovaovam-peo mba hanamafisana teny sasany, dia ilaina ny mampiasa izay fomba rehetra mahazatra amin’io fiteny io mba hanamafisan-teny.

Fiatoana. Io dia azo atao aloha na aorian’ny famakiana ilay tapany fototra amin’ilay andinin-teny, na sady aloha no aoriana. Ny fiatoana aloha kelin’ny hamakianao hevi-dehibe iray dia mahatonga ny olona hiandry azy io. Mandraikitra ilay hevitra ao an-tsainy kosa ny fiatoana aoriana. Tsy hisy hevitra hisongadina anefa, raha be loatra ny fiatoana.

Famerimberenana. Mba hanamafisana hevitra iray, dia miatoa ka avereno vakina ilay na ireo teny milaza azy. Matetika anefa no tian’ny olona kokoa raha vakina manontolo ilay andininy, ary avy eo vao averina ilay teny fototra.

Fihetsehana. Matetika ny fihetsehana sy ny endrika no afaka mampita fihetseham-po, eo am-pilazana teny na fehezanteny iray.

Toe-peo. Amin’ny fiteny sasany, dia azo vakina amin’ny toe-peo izay manova ny heviny sy mampisongadina azy ny teny indraindray. Ilaina koa eto ny mitandrina, indrindra raha mamaky teny misy fanesoana.

Rehefa ny hafa no mamaky. Rehefa mamaky andinin-teny ny tompon-trano iray, dia mety ho ireo teny tsy izy no hamafisiny, na mety tsy hanamafy na inona na inona izy. Inona no azonao atao amin’izay? Tsara raha manao fampiharana ilay andininy ianao, mba hivoahan’ilay hevitra tsara. Aorian’izay, dia ifantohy manokana sy mivantana ireo teny fototra ao amin’ilay andininy.