Nihavana Indray i Jakoba sy Esao

Niteny tamin’i Jakoba i Jehovah hoe hiaro azy, hoatran’ny nataony tamin’i Abrahama sy Isaka. Tany Harana i Jakoba no nipetraka. Nanambady izy tany, ary nanan-janaka be dia be sady lasa nanan-karena be.

Hoy i Jehovah tamin’i Jakoba, tatỳ aoriana: ‘Mandehana miverina any amin’ny taninao.’ Dia lasa àry izy sy ny fianakaviany nandeha lavitra be niverina tany amin-dry zareo. Niteny tamin’i Jakoba ny mpiasany teny an-dalana hoe: ‘Tamy any i Esao zokinao, miaraka amin’ny lehilahy 400.’ Natahotra be i Jakoba sao dia hovonoin’i Esao izy mianakavy. Nivavaka tamin’i Jehovah àry izy hoe: ‘Mba vonjeo re aho e!’ Dia nandefasan’i Jakoba ondry, osy, omby, rameva, ary ampondra be dia be i Esao ny ampitson’iny.

Nahita anjely i Jakoba ny alin’iny. Izy irery no teo tamin’izay. Nifampitolona izy sy ilay anjely mandra-paharainan’ny andro. Tsy niala mihitsy i Jakoba na dia efa voa mafy aza. Hoy àry ilay anjely taminy: ‘Avelao aho handeha.’ Hoy anefa i Jakoba: ‘Tsy avelako mandeha ianao raha tsy mitso-drano an’ahy.’

Dia nitso-drano an’i Jakoba ilay anjely tamin’ny farany. Lasa natoky àry i Jakoba hoe tsy avelan’i Jehovah hamono azy i Esao.

Nitazana teny lavitra teny i Jakoba rehefa maraina ny andro, dia nahita an’i Esao sy ireo lehilahy 400. Nandeha teo alohan’ny fianakaviany àry i Jakoba, dia niankohoka impito teo anatrehan’i Esao. Dia iny i Esao fa nihazakazaka namihina an’i Jakoba. Samy nitomany izy roa lahy, ary nihavana indray. Mba ahoana izao ny fihetseham-pon’i Jehovah rehefa nahita ny zavatra nataon’i Jakoba?

Nandeha nody i Esao avy eo, fa i Jakoba kosa nanohy ny diany. Nanan-janakalahy 12 i Jakoba. Ireto avy ny anarany: Robena, Simeona, Levy, Joda, Dana, Naftaly, Gada, Asera, Isakara, Zebolona, Josefa, ary Benjamina. I Josefa no nampiasain’i Jehovah mba hamonjena ny vahoakany. Andao ange hojerentsika e!