Fampidirana ny Fizarana 12

Nampianarin’i Jesosy momba ny Fanjakan’ny lanitra ny olona. Nampianatra azy ireo koa izy mba hivavaka hoe hohamasinina ny anaran’Andriamanitra, ho tonga ny Fanjakany, ary hatao etỳ an-tany ny sitrapony. Hazavao amin’ny zanakao hoe zava-dehibe io vavaka io. Tsy nivadika mihitsy i Jesosy, na dia nitaona azy hanao an’izany aza i Satana. Nifidy an’ireo apostoly i Jesosy, ary lasa anisan’ny hitondra ao amin’ilay Fanjakana ry zareo. Mariho fa tena nazoto niaro ny fivavahana marina koa i Jesosy. Tsy izay ihany fa te hanampy ny olona izy dia nanasitrana ny marary, nanome sakafo ny noana, ary nanangana ny maty mihitsy aza. Tiany haseho hoe hoatr’izany no hataon’ilay Fanjakana amin’ny hoavy.