ADARA, II

Volana jiosy faha-12 tamin’ny kalandrie ara-pivavahana, taorian’ny sesitany, fa faha-6 kosa tamin’ny kalandrie tsy ara-pivavahana (Es 3:7), ary mifanitsy amin’ny faramparan’ny Febroary sy voalohandohan’ny Martsa. Nasisika taorian’ny Adara ny volana fanampiny natao hoe Veadara na Adara faharoa, tamin’ny taona sasany.

Tamin’ny Adara no nifarana ny ririnina ary efa hiditra ny lohataona tany Palestina. Nanomboka namony ny hazo karobie tany amin’ny faritra sasany, ary efa azo notazana ny voasary sy voasarimakirana teny amin’ny faritra iva nafana kokoa.

Nampirisihin’i Hamana praiminisitra i Ahasoerosy mpanjakan’i Persa, ka namoaka didy hoe ny 13 Adara no handripahana ny Jiosy rehetra tao amin’ireo faritany nofeheziny. Namoaka didy hafa koa anefa izy noho ny tenin’i Estera vadiny, ka afaka nandresy an’izay saika handripaka azy ireo ny Jiosy. Nodidian’i Mordekay avy eo ny Jiosy mba hankalaza ny Fetin’ny Porima, avy amin’ny hoe “Pora, na ny Antsapaka” (Es 9:24-26; jereo PORIMA), ny 14 sy 15 Adara, ho fahatsiarovana ny nanafahana azy ireo.​—Es 3:13; 8:11, 12; 9:1, 15, 20, 21, 27, 28.

Ny volana Adara koa no voaorin’i Zerobabela Governora indray ny tempolin’i Jerosalema. (Ezr 6:15) Resahin’ny andininy hafa hoe “ny volana faharoa ambin’ny folo” izy io.​—2Mp 25:27; 1Ta 27:15; Je 52:31; Ezk 32:1.