ADOMIMA

(Adomìma) [avy amin’ny fototeny midika hoe “mena”; mety ho Vatolampy Mena].

Fiakarana mideza 12 km eo ho eo, manavatsava tendrombohitra, any atsinanana avaratratsinanan’i Jerosalema, ary eo antenatenan-dalana avy any Jeriko mankany Jerosalema. Fiakarana mampitohy ny lohasaha ivan’i Jordana sy ny faritra be tendrombohitr’i Joda izy io. Efa hatramin’izay io lalana io no nampitohy an’i Jeriko sy Jerosalema. Ny hany resahin’ny Baiboly anefa dia hoe sisin-tany manasaraka ny tanin’i Joda sy Benjamina izy io.​—Js 15:7; 18:17.

Antsoin’ny Arabo hoe Talʽat ed-Damm (midika hoe “Fiakaran-dra”) izy io, fa ny Hebreo kosa miantso azy hoe Maʽale Adomima (midika hoe “Fiakarana Adomima”). Nisy mpanoratra fahiny nilaza fa ny ra nalatsaky ny jiolahy sy ny mpanendaka tamin’iny lalana iny no niavian’ilay anarana. Azo inoana kokoa anefa hoe noho ireo sosona tanimena eo amin’ilay lalana no nahatonga ilay anarana. Nampidi-doza foana io lalana io satria nangingina loatra sady be jiolahy, ka efa hatry ny ela no nasiana toerana voaro mafy teny mba hiarovana ny mpandeha. Izany no antony nilazan’i Jesosy hoe notafihin’ny jiolahy ilay lehilahy ‘nidina nankany Jeriko’, tao amin’ny fanoharany momba ilay Samaritanina tsara fanahy.​—Lk 10:30-37.

Lazain’ny Josoa 15:7 fa teo atsimon’ny “lohasaha falehan-driaka” iray no nisy ny fiakarana Adomima. Tsy iza izy io fa ny Lohasaha Falehan-driaka el Kilt, izay mitovy zotra amin’ny arabe ary mandalo eo atsimo kelin’i Jeriko vao mankany amin’ny Reniranon’i Jordana.