ALAMOTA

(Alamòta) [Ankizivavy; Tovovavy].

Teny fampiasa tamin’ny mozika, ary toa ilazana ny feo voalohan’ny tovovavy na ny feo maranitry ny ankizilahy. Nisy lokanga “nampanarahina feo Alamota” (1Ta 15:20) na hoe ʽala·môht (heb.). Nadika hoe “Ankizivavy” anefa io teny io, ao amin’ny teny mampiditra ny Salamo faha-46.

Miresaka “harpa nampanarahina feo Seminita” na hoe sheminit (heb.), kosa ny 1 Tantara 15:21. Teny fampiasa tamin’ny mozika koa izy io, ary nadika hoe “oktavy ambany” ao amin’ny teny mampiditra ny Salamo faha-6 sy 12. Mety ho tsy mifanohitra ny dikan’ny hoe Alamota sy Seminita. Mifanohitra anefa izy ireo, hoy ny manam-pahaizana sasany. Toa mitombina izany satria mitaraindraina ka tokony hampanarahina feo ambany ireo Salamo roa (6 sy 12), izay ahitana hoe sheminit ny teny mampiditra azy. Miresaka zavatra mahafaly kosa ny Salamo faha-46, izay ahitana hoe ʽala·môht ny teny mampiditra azy, ka mety raha ambony ny feo nampanarahina na nihirana azy.​—Jereo HARPA; MOZIKA.