AVO INDRINDRA
Ambony indrindra, fara tampony. Avy amin’ny teny hebreo hoe ʽelyôhn ny hoe “Avo Indrindra”, ary ilazana an’i Jehovah. Ampiasaina amin’ireto olona sy zavatra ireto koa anefa io teny io: Ilay Mesia Mpanjaka, na ilay mifanitsy amin’i Davida, izay ambony noho ny mpanjakan’ny tany (Sl 89:20, 27), ny Israely izay nampanantenaina fa ho ambony noho ny firenena hafa rehetra (De 26:18, 19), harona ambony indrindra (Ge 40:17), vavahady ambony (2Mp 15:35), dobo ambony (2Mp 18:17), tokotany ambony (Je 36:10), rihana farany ambony (Ezk 41:7), efitra fisakafoana tany amin’ny farany ambony (Ezk 42:5), Beti-horona Ambony (Js 16:5), ary ny loharano ambony tao Gihona (2Ta 32:30). Toerana tanana na toerana ara-bakiteny àry fa tsy hery no tiana holazaina amin’ilay hoe ʽelyôhn.
Antsoina hoe “Avo Indrindra” i Jehovah, satria mitana ny toerana fara tampony. (Sl 83:18) Ao amin’ny Genesisy 14:18-20 no ahitana voalohany an’io anaram-boninahitra io miaraka amin’ny hoe ʼEl (Andriamanitra). Antsoina hoe “mpisoron’ilay Andriamanitra Avo Indrindra” i Melkizedeka ao. Afaka nitso-drano an’i Abrahama sy nisaotra an’ilay Andriamanitra Avo Indrindra àry izy. Miaraka amin’ny anaran’Andriamanitra hoe Jehovah ilay hoe “Avo Indrindra” (Ge 14:22; Sl 7:17), na miaraka amin’ny hoe ʼElôhim (Andriamanitra amin’ny endriny milaza maro ary ilazana fahatsarana). (Sl 78:56) Mandeha irery koa anefa izy io indraindray.—De 32:8; Sl 9:2; Is 14:14.
Ny teny aramianina hoe ʽelyôhnin (amin’ny endriny milaza maro) no hita ao amin’ny Daniela 7:18, 22, 25, 27. Nadika hoe “Fara Tampony” (TV) izy io ao amin’ireo andininy ireo, ary ilazana fahatsarana na fahamboniana. Ilay endriny milaza tokana hoe ʽillai (Avo Indrindra) kosa no ao amin’ny Daniela 7:25.
Ny teny grika hoe hypsistôs (Avo Indrindra) no tena nampiasain’i Lioka rehefa niresaka momba an’i Jehovah izy, ao amin’ny Filazantsarany (indroa rehefa niteny tamin’i Maria i Gabriela fa hiteraka an’i Jesosy izy) sy ao amin’ny Asan’ny Apostoly. (Lk 1:32, 35, 76; 6:35; 8:28; As 7:48; 16:17) Ny Marka 5:7 sy Hebreo 7:1 no andininy hafa ahitana an’io teny grika io.