Velona ny Tenin’Andriamanitra
Amin’ny ahoana ny fahafatesan’i Jesosy no mahakasika antsika?
TAORIAN’NY nahafatesan’i Jesosy Kristy, dia nijanona teny an-dalana i Kleopasy sy ny namany “sady nalahelo tarehy”. (Lioka 24:17.) Fahavalo ny fahafatesana, koa ara-dalàna raha miteraka alahelo izany. Kanefa ireo olona ireo dia afaka ny ho faly tokoa tamin’ny nahafatesan’i Jesosy, ary isika koa. Fantatrao ve hoe nahoana?
Hoy ny fanazavan’ny Baiboly: “Kristy maty noho ny fahotantsika”. Maty hamonjy antsika [izy], mba hiara-belona aminy isika”. (I Korintiana 15:3; I Tesaloniana 5:10.) Eny, nirahina tety an-tany Jesosy mba hamonjy antsika. Hoy ny teniny mihitsy: “Ny Zanak’olona (...) tonga mba (...) hanolotra ny ainy ho avotra hisolo ny maro.” (Matio 20:28.) Nefa inona no dikan’ny hoe nanome ny ainy ho “avotra” i Jesosy? Inona ny avotra?
Ny teny hoe “avotra” dia ampiasaina matetika rehefa misy fakàna olona an-keriny. Rehefa avy namabo olona mpaka an-keriny iray, dia mety hilaza izy fa haveriny ilay olona nobaboiny raha tahiny ka misy vola voaloa ho avotra. Ny avotra àry dia mitondra fanafahana ho an’ny olona iray voatana ho babo. Zavatra aloha mba tsy hamerezan’ny olona iray ny ainy izy io. Ny fiainan’olombelona tanteraka nananan’i Jesosy dia nomena mba hahazoana ny fanafahana ny olombelona amin’ny fatoran’ny ota sy ny fahafatesana (I Petera 1:18, 19; Efesiana 1:7). Nahoana no nilaina izany fanafahana izany?
Nilaina izy io satria i Adama razambentsika dia nikomy tamin’Andriamanitra (Genesisy 2:17; 3:11, 12). Araka izany, ny zavatra nataony tsy nanara-dalàna dia nahatonga azy ho mpanota, satria hazavain’ny Baiboly fa “ny ota no fandikàna ny lalàna”. (I Jaona 3:4; 5:17.) Ho vokatr’izany dia tsy mendrika ny handray ny fanomezana fiainana mandrakizay avy amin’Andriamanitra izy. (Romana 6:23). Verin’i Adama àry ny fiainan’olombelona tanteraka teto amin’ny paradisa an-tany ho an’ny tenany. Veriny koa io fahatsinjovan-javatra mahafinaritra io ho an’ireo zanaka rehetra izay haterany. ‘Fa nahoana, hoy angamba ianao, no tsy maintsy ho faty ny zanany rehetra, nefa i Adama no nanota?’
Izany no izy satria i Adama, rehefa tonga mpanota, dia namindra ny fahotana sy fahafatesana tamin’ireo zanany, anisan’izany ireo olona rehetra miaina amin’izao andro izao (Joba 14:4; Romana 5:12). Maty àry ny olombelona noho ny fahotana nolovany tamin’i Adama. Ahoana àry no hahafahan’y fahafatesan’i Jesosy hanafaka ny olona rehetra amin’ny fatoran’ny ota sy ny fahafatesana?
Tafiditra eto ny fitsipika ara-pitsarana iray ao amin’ny lalàn’Andriamanitra ho an’ny firenen’Isiraely. Milaza izy io fa ‘iana no tokony homena ho solon’ny aina’. (Eksodosy 21:33.) Tamin’ny tsy fankatoavany, i Adama lehilahy tanteraka dia nanary ny fiainana tanteraka tao amin’ny paradisa an-tany ho an’ny tenany sy ny zanany rehetra. Jesosy Kristy dia nanome ny fiainany tanteraka hahafahana mividy indray ilay narian’i Adama. Araka ny anazavan’ny Baiboly azy, Jesosy dia “nanolotra ny tenany ho avotra [mifanandrify] hisolo ny olona rehetra”. — I Timoty 2:5, 6.
Eritrereto kely fotsiny ny dikan’izany ho antsika! Ny dikany dia hoe nandatsaka ny rany tao amin’ny fahafatesana i Jesosy mba hahazoantsika ny fahafahana hiaina mandrakizay eo ambany fanapahan’ny fanjakan’Andriamanitra. Hampiseho ny fankasitrahanao amin’ny fampiasana ny fiainanao mba hanompoana an’Andriamanitra sy ny Zanany any an-danitra, Jesosy Kristy, ve ianao? — II Korintiana 5:14, 15.
[Sary, pejy 8]
Amin’ny ahoana no anampian’ny “vola ho avotra” antsika mba hahatakatra ny hevitry ny avotr’i Jesosy?
[Sary, pejy 9]
Nitarika ho amin’inona ho an’ny tenany sy ny taranak’olombelona rehetra moa ny tsy fankatoavan’i Adama?
Koa satria Jesosy nifandanja tanteraka tamin’i Adama, lehilahy tanteraka, milaza inona ho antsika moa izany?