Ireo Asa Famonjen’i Jehovah Amin’izao Andro Izao
MILAZA amintsika toy izao ny amin’i Jehovah ny Baiboly: “Maro ny fahorian’ny marina; nefa Jehovah manafaka azy amin’izany rehetra izany”, ary koa hoe: “Fantatr’i Jehovah ny fomba hamonjena ny olona manana fifikirana amin’Andriamanitra ho afaka amin’ny fitsapana”. — Salamo 34:19; 2 Petera 2:9, NW.
Ahoana no anampian’i Jehovah ny vahoakany rehefa azom-pahoriana izy ireo? Tsy amin’ny fampitsimbadihana amin’ny fomba mahagaga ireo herin’ny natiora akory, na amin’ny asa tsy vitan’olombelona hafa, toy izay heverin’ny olona maro fa tokony hataony, fa amin’ny alalan’ny hery hafa izay tsy tena takatry ny ankamaroan’ny olona — ny fitiavana. Eny, tia ny vahoakany i Jehovah, ary nataony izay hampitomboana fifankatiavana mahery aoka izany teo amin’izy ireo, hany ka afaka manatanteraka ho azy ireo zavatra toa saiky fahagagana mihitsy izy. — 1 Jaona 4:10-12, 21.
Mety handroso hevitra ny sasany fa amin’ny fotoam-pahamehana, dia sakafo sy fanafody ary fitaovana no ilaina — fa tsy fitiavana. Marina aloha fa zava-dehibe ny sakafo sy ny fanafody ary ny fitaovana. Nanjohy hevitra toy izao anefa ny apostoly Paoly: “Na dia manana ny finoana rehetra aza aho ka mahafindra tendrombohitra, kanefa tsy manana fitiavana, dia tsinontsinona aho. Ary na dia omeko hohanin’ny malahelo aza ny fananako rehetra, ary na dia atolotro hodorana aza ny tenako, kanefa tsy manana fitiavana aho, dia tsy mahasoa ahy akory izany.” — 1 Korintiana 13:2, 3.
Matetika isika dia mamaky ny amin’ireo fanampiana ara-nofo avela ho simba na ho lanin’ny voalavo mipetraka eo amin’ny fitobian’entan-tsambo, kanefa misy olona sahirana matin’aretina sy maty mosary. Na mbola ratsy kokoa, ireny zavatra ara-nofo ireny dia mety ho tonga eo am-pelatanan’olona manana faniriana mihoa-pampana sy maty eritreritra izay maka tombony manokana avy amin’izany. Noho izany, dia zavatra iray ny hoe manana vatsy azo ampiasaina, kanefa zavatra hafa tanteraka ny fahitana fa mandray soa avy amin’izany ireo izay azom-pahoriana. Ny tena fitiavana sy ny tena fiahiana no afaka mahatonga ny fahasamihafana.
Fitiavana am-perinasa
Tamin’ny Septambra 1992, dia namely an’i Kauai, nosin’i Hawaii izay nisy mponina 55 000 ny Rivo-doza Iniki. Nitondra rivotra nahatratra 210 kilaometatra isan’ora sy nifofofofo tampoka hatramin’ny 260 kilaometatra isan’ora izy io, ka nahafaty olona 2, nandratra olona 98, nanimba ny 75 isan-jaton’ny fonenana, namela olona 8 000 tsy hanam-pialofana, ary nahatonga fandravana izay notombanana ho 1 000 tapitrisa dolara amerikana. Teo amin’ireo izay nipetraka tao amin’io nosy kely io, dia nisy Vavolombelon’i Jehovah 800 teo ho eo tao amin’ny kongregasiona enina. Nanao ahoana izy ireo?
Talohan’ny tena namelezan’i Iniki, ireo loholon’ny kongregasiona, teo ambany fitarihan’ny mpiandraikitra mpitety faritany, dia efa nifandray sahady tamin’ireo mpikambana rehetra tao amin’ny kongregasiona mba hahazoana antoka fa ho voaro amin’ny loza sy tsy hiharam-pahavoazana izy ireo, vonona ho amin’ilay famelezana mafy. Ny fiahiana feno fitiavana toy izany dia fiasana ho fisorohana faharatrana lehibe na fahafatesana teo amin’ireo Vavolombelona. — Ampitahao amin’ny Isaia 32:1, 2.
Na dia ratsy dia ratsy aza ny fahatapahan’ny fifandraisana sy ny fitaterana, dia anisan’ireo tonga voalohany teny an-toerana taorian’ilay rivo-doza ny solontena telo avy amin’ny biraon’ny sampan’ny Watch Tower Bible and Tract Society tany Honolulu, nahazo fanomezan-dalana manokana tamin’ny sampan-draharahan’ny vonjy rano vaky mba handeha fiaramanidina hankany Kauai. Avy hatrany izy ireo dia nifandray tamin’ireo Vavolombelona teo an-toerana, ary ny ampitso maraina, dia nandamina fivoriana izy ireo mba hanaovana drafitra ho amin’ny fanampiana. Nisy komitin’ny vonjy rano vaky natsangana mba hamaritra izay ilaina sy hahazo ireo fitaovana ilaina tamin’ny alalan’ny biraon’ny sampana any Honolulu. Niasa tsy an-kijanona izy ireo mba hitarihana ilay asa fakana vatsy ho an’ireo sahirana, sy fanadiovana ary fanamboarana ireo trano simba.
Nanao zavatra haingana ho an’ireo rahalahiny sahirana ireo Vavolombelona tao amin’ireo nosy anilany. Raha vantany vao nisokatra ny seranam-piaramanidin’i Kauai, dia nisy Vavolombelona 70 nandeha fiaramanidina tany mba hanampy. Nalefa sambo ny vatsy fanampiana nitentina 100 000 dolara amerikana, anisan’izany ireo générateurs électriques, sy fatana kely azo entina mandehandeha, fanilo, ary sakafo. Nampiasaina ho fanatobiana entana ny iray tamin’ireo Efitrano Fanjakana teo amin’ilay nosy; kanefa dia nisy tahotra ny amin’ny mety handroban’ny sasany azy io. Tamin’izay dia nisy kamiaon’ny Tafika sasany niditra tao amin’ny fitoeran’ny fiarakodian’ilay Efitrano Fanjakana. Nanontany ireo mpamily raha azon’izy ireo napetraka teo ny kamiaony. Ireo miaramila napetraka tao mba hiaro ireo kamiaon’ny tafika dia nanafoana koa ilay zava-manahirana ny amin’ny fandrobana ireo vatsy fanampiana.
Nitondra ireo générateurs électriques nitety trano ireo rahalahy ka nandefa izany isan-trano nandritra ny adiny roa na telo mba hanampiana ny olona hitana ny vata fampangatsiahan’izy ireo ho azo nampiasaina. Nozarazaraina tany amin’ny trano samihafa ireo antokon-drahalahy mba hanampy hanadio sy hanamboatra ny simba. Rehefa niasa tao amin’ny tranon’ny anabavy iray nanana vady nanohitra tamin-kalozana tamin’ny lasa izy ireo, dia tohina aoka izany ilay lehilahy, ka ny hany azony natao dia ny nandinika sy ny nitomany. Ny mpitsidika iray avy tany amin’ilay nosy lehibe izay nahita antokona Vavolombelona hafa iray niasa, dia variana aoka izany tamin’ny fitondran-tenan’izy ireo sy ny fahaizany mandamin-javatra, hany ka nanatona izy nanontany ny nahatonga azy ireo ho hafa aoka izany. Rehefa namaly ny rahalahy iray fa izany dia noho ny fitiavan’izy ireo an’Andriamanitra sy ireo Kristiana namany, dia hoy ilay rangahy: “Ahoana no ahafahako mahafantatra an’Andriamanitra?” (Matio 22:37-40). Avy eo, dia nanampy teny toy izao izy: “Olona mahay mandamin-javatra aoka izany ianareo ka azo inoana fa handefa olona hiandry any an-tranoko ianareo rehefa miverina any Floride aho!”
Tamin’ny fitambarany, ny Vavolombelon’i Jehovah dia nanampy tamin’ny fanadiovana sy fanamboarana trano 295 tany Kauai. Tamin’ireo trano ireo, dia 207 no nitaky fanamboarana madinidinika, fa ny 54 kosa dia simba be, ary ny 19 dia rava tanteraka. Ny asan’izy ireo dia nahatafiditra koa fitsidihana ny Vavolombelona rehetra fantatra tao amin’ilay nosy, mba hahazoana antoka fa voakarakara ny tsirairay tamin’izy ireo. Rehefa nomena vatsy ny anabavy iray, dia nilaza ny mpiara-monina bodista iray fa tsy naharay na dia kitapo kelin-dite iray monja aza avy tamin’ny antokona bodista nisy azy izy. Hoy ny vehivavy hafa iray nanan-trano nodiovin’ny antokona Vavolombelona: “Efa tonga teto am-baravarako hatramin’ny ela ianareo, ary nihevitra anareo ho mpiara-monina tsara aho, fa itỳ fampisehoana fitiavana ny mpiara-monina itỳ dia maneho amiko hoe toy inona ny fandaminanareo. Misaotra noho ireo asa mafy rehetra nataonareo.”
Ankoatra ny fikarakarana ny zavatra nilain’ireo Kristiana namany ara-nofo, dia niahy toy izany koa ny amin’izay hahasoa azy ireo ara-panahy ireo tompon’andraikitra tamin’ny fanampiana. Tsy ampy roa andro taorian’ilay rivo-doza, dia efa nanao ny fivoriany sahady ny kongregasiona maromaro. Vetivety dia niverina niasa indray ireo antokom-pianarana ny boky madinika. Nisy loholona folo avy amin’ireo nosy hafa, tonga tany Kauai mba hanampy ireo loholona teo an-toerana hanao fitsidihan’ny mpiandry tamin’ny Vavolombelona tsirairay ao amin’ilay nosy. Ny alahady nanaraka, ireo kongregasiona enina dia nahazo ny Fianarana Ny Tilikambo Fiambenana sy lahateny 30 minitra nataon’ny mpikambana iray tao amin’ny Komitin’ny Vonjy Rano Vaky mikasika ireo fomba fizotran’ny fanampiana ary lahateny famaranana 30 minitra nataon’ny mpikambana iray ao amin’ny Komitin’ny Sampana izay tonga avy tany Honolulu noho izany antony izany. Hoy ny tatitra nataon’ny vavolombelona nanatri-maso iray: “Samy nahazo fampiononana ny rehetra tamin’ilay fitarihana tsara dia tsara nomena, ary samy nahatsiaro tena ho vonona ara-panahy mba hiatrika ireo zava-manahirana tavela eo aminy. Maro no latsa-dranomaso teo amin’ireo mpanatrika rehefa nifarana ny fandaharana, ary lasa ho azy vokatry ny fo ny tehaka.”
Firahalahiana maneran-tany
Famantarana ny vahoakan’i Jehovah maneran-tany ny fitiavana sy fiahiana toy izany. Rehefa namafa an’i Samoa Andrefana manontolo ny Sikilaonina Val, sahabo ho herintaona talohan’izay, dia nahatonga fanimbana betsaka ihany izy io, kanefa ny Vavolombelon’i Jehovah tany amin’ny faritra hafa amin’ny tany dia nanampy haingana ireo rahalahiny tao. Tatỳ aoriana, rehefa nomen’ny fanjakana vola ny fivavahana rehetra — anisan’izany ny Vavolombelon’i Jehovah — mba hanamboarana ny simba tamin’ny tranony, dia naverin’ny Vavolombelona ilay vola niaraka tamin’ny taratasy iray nilaza fa efa voamboatra avokoa ny simba rehetra, ka ilay vola dia azo nampiasaina mba hanamboarana tranom-panjakana sasany. Nanaovana tatitra tao amin’ny gazety iray teo an-toerana ny asan’izy ireo. Rehefa nanamarika izany ny mpitondra fanjakana iray, dia nilaza tamin’ny Vavolombelona iray fa somary menatra ny amin’ny fiangonany ihany ny tenany satria izy ireo dia nanaiky ilay vola avy tamin’ny fanjakana na dia efa nosahanin’ny fiantohana avokoa aza ny fandaniana rehetra tamin’ny fahasimban’ny tranony nandritra ilay sikilaonina.
Toy izany koa fa, rehefa tondraka ka nandrava an’i Vaison-la-Romaine sy tanàna kely 15 manodidina ny Renirano Ouvèze any amin’ny faritra atsimon’i Frantsa, tamin’ny Septambra 1992, dia nanao zavatra haingana ireo Vavolombelona. Tao anatin’ny indray alina, ilay tondra-drano dia nahafaty olona 40, nandrava trano 400, nanimba an-jatony maro hafa, ary namela fianakaviana an’arivony maro tsy hanan-drano na jiro. Vao maraina be ny ampitson’iny, dia ireo Vavolombelona avy tao amin’ny kongregasiona teo an-toerana no tonga voalohany mba hanampy ny tra-boina noho ny tondra-drano. Ireo izay nila fialofana dia noraisin’ny fianakaviana Vavolombelon’i Jehovah tao amin’ilay faritra tamim-pitiavana. Nisy Vavolombelona an-jatony maro tonga avy lavitra sy akaiky nanolotra ny fanampian’izy ireo. Natsangana tany akaikin’ny tanànan’i Orange ny komitin’ny vonjy rano vaky, mba hampifandrindra ny ezaka nataon’ireo antokona mpiasa an-tsitrapo efatra izay nanaisotra fotaka sy nanadio trano, nanasa akanjo nihosim-potaka sesehena, ary nanomana sy nizara sakafo sy rano azo nosotroina nanerana ilay faritra tra-boina. Nanolo-tena mihitsy aza izy ireo hanadio ny sekoly iray sy ny tranom-panjakana maromaro teo an-toerana. Ny fiezahana tsy nety sasatra nataon’izy ireo dia nankasitrahan’ireo rahalahiny sy ny olona tao amin’ilay tanàna koa.
Tany amin’ny toerana maro hafa, dia nisy Vavolombelon’i Jehovah nijaly noho ny loza, toy ny tondra-drano sy ny tafio-drivotra ary ny horohoron-tany, toy ny olon-kafa rehetra. Noho ny fahatakarany fa izany dia vokatry ny tarehin-javatra tsy tsinjo mialoha na azo nosorohina mialoha, dia tsy manome tsiny an’Andriamanitra na ny olon-kafa izy ireo. (Mpitoriteny 9:11). Matoky kosa izy ireo fa ny fitiavana feno fahafoizan-tenan’ireo mpiray finoana aminy dia hamonjy azy ireo na toy inona na toy inona tarehin-javatra mahatsiravina mety hanjo azy ireo. Ny fanaovan-javatra feno fitiavana toy izany dia vokatry ny finoana izay iombonan’izy ireo. Nanazava toy izao i Jakoba mpianatra: “Raha misy rahalahy na anabavy tsy manan-kitafy sady tsy manan-kohanina isan-andro, ka misy aminareo manao aminy hoe: Mandehana amin’ny fiadanana, mamindroa, mivokisa, kanefa tsy omenareo azy tsinona izay tandrifiny ho an’ny tenany, inona moa no soa azo amin’izany? Ary mba toy izany koa ny finoana, raha tsy misy asa, dia maty mihitsy.” — Jakoba 2:15-17.
Ny loharanon’ny tena fiarovana
Tsy manantena fahagagana amin’ny endriky ny fisalovanan’Andriamanitra sasany ny Vavolombelon’i Jehovah, fa takany kosa hoe tokony ho hita ao amin’ny firahalahiana kristiana maneran-tany ananan’izy ireo ny fiarovana. Raha ny marina, izay azon’izany firahalahiana izany tanterahina amin’ny fotoam-pahoriana dia kely sisa dia fahagagana. Tsaroan’izy ireo ny tenin’i Jesosy hita ao amin’ny Matio 17:20 manao hoe: “Raha manana finoana hoatra ny voan-tsinapy iray aza hianareo ka hiteny amin’io tendrombohitra io hoe: Mifindrà erỳ, dia hifindra izy; ary tsy hisy tsy ho hainareo hatao.” Eny, manjavona ireo vato misakana toy ny tendrombohitra rehefa manomboka miasa ny tena finoana kristiana ombam-pitiavana.
Tsapan’ny vahoakan’i Jehovah maneran-tany ny fiarovan’ny tanan’ilay Andriamaniny amin’izao andro mivadibadika sy mampidi-doza izao. Mitovy hevitra amin’ny mpanao salamo izy ireo hoe: “Handry amin’ny fiadanana aho, ka dia hatory koa, satria ianao irery ihany, Jehovah ô, no mampitoetra ahy tsy manana ahiahy.” (Salamo 4:8, NW ). Amim-patokiana, dia mampifantoka ny sainy amin’ilay asa efa eo izy ireo: “Hotorina amin’ny tany onenana manontolo itỳ vaovao tsaran’ny fanjakana itỳ ho vavolombelona amin’ny firenena rehetra; ary avy eo, dia ho tonga ny farany.” (Matio 24:14, NW ). Ary amin-toky, izy ireo dia miandrandra ny fahatanterahan’ilay fampanantenan’i Jehovah tontolo vaovao iray feno fiadanana sy fahamarinana izay tsy hahitan’izy ireo loza intsony, na inona na inona karazany, na nataon’olona na araka ny natiora. — Mika 4:4.
[Sary, pejy 12]
Nisy Vavolombelona avy lavitra sy akaiky nanampy ireo tra-boina noho ny tondra-drano