Misy Anjely ve eto Anivontsika?

Haingana aoka izany no nitrangan’ilay izy. Lasan’eritreritra lalina sy nanadino izay nanodidina azy i Marilynn, raha nandehandeha teny amin’ny lalamby. Tampoka teo, dia nandre feo nirohondrohona mafy izy. Nanandratra ny masony izy ka nahita fa, hay, nijoro nivantana teo amin’ny lalan’ny lamasinina iray tamy nanatona izy! Ankona i Marilynn, tsy nahahetsika noho ny tahotra. Akaiky aoka izany ilay lamasinina ka afaka nahita ny maso manga sy ny endrika nivaloharik’ilay mpamily, izy. Tsy nanadino mihitsy izay nitranga nanaraka izany i Marilynn. “Toy ny hoe nisy goavana iray nanosika ahy avy tany aoriana”, hoy izy. “Nisidina niala ny lalamby aho ka nianjera teo amin’ny saribao sisa tsy may terỳ lavitra kokoa.” Naratra kely i Marilynn ka nitsangana mba hisaotra ilay mpamonjy azy — kanefa dia tsy nisy na iza na iza tazana! Ny fanatsoahan-keviny? “Namonjy ny aiko ilay anjely mpiambina ahy”, hoy i Marilynn. “Mety ho iza indray àry ka?”

TOA liana be tampoka amin’ny anjely ny tontolo iray be fisalasalana. Tao anatin’ireo taona faramparany, ireo fisiana any an-danitra dia foto-dresaka tao amin’ireo fampisehoan’ny televiziona sy sarimihetsika ary tamin’ny lalao an-dampihazo iray tany Broadway mihitsy aza. Ireo boky momba ny anjely dia loha laharana eo amin’ny lisitr’ireo boky ara-pivavahana be mpividy indrindra. Ao ireo klioban’ny anjely, semineran’ny anjely, sy gazety kelin’ny anjely. Natsangana ireo fandaharam-pampianarana mba hanampiana anao — araka ny ilazan’ny lahatsoratra iray azy hoe — mba hamaha fatorana an’ilay “ ‘anjely anaty’ ao aminao”.

Nanararaotra tamin’ny fomba mety tsara an’ilay fihetsiketsehana momba ny anjely ireo mpivarotra mpanararaotra izay misisika mivarotra entana fanjifa mitohy tsy misy farany. “Na inona na inona misy anjely eo aminy dia entana ahazoana tombony”, hoy ny anisan’ny tompom-pivarotana iray any Etazonia. Ho fanampin’ireo boky maro be efa lafo, dia tanisainy ny “anjely sarivongana, anjely fisisika, anjely saribakoly mbamin’ireo T-shirts sy posters ary cartes firarian-tsoa misy anjely” — izany rehetra izany dia andraofana ilay antsoin’ny mpanao gazety iray hoe “tombony avy any an-danitra”.

Tsy lamaody mihelina fotsiny akory izy itỳ, hoy ny fanizingizinan’ireo mpiaro ny anjely. Mba hanohanana ny filazany, izy ireo dia manolotra fanambarana ho fanamarinana maro be — fihaonana “tena niainana” tamin’anjely. Misy milaza fa nahita anjely nanana endrik’olombelona izy ireo. Ny hafa nahita fahazavana, nandre feo, nahatsapa ny fisiana iray tsy hita maso manelohelo, na nahatsapa fampirisihana mafy izay inoan’izy ireo fa avy tamin’ny anjely. Maro no milaza sahala amin’i Marilynn, fa namonjy ny ainy ny anjely iray.

Inona no mitranga? “Mihevitra aho fa misy fipongarana indray eo amin’ny fahatsapana ny hasin’ny fivavahana”, hoy i Joan Wester Anderson, izay nanoratra boky roa momba ireo fihaonana tamin’ny “fanahy”. Lasa lavitra kokoa i Alma Daniel, izay nanampy tamin’ny fanoratana boky hafa iray. Nilaza izy fa ireo anjely “izao dia mahazo toromarika hampahafantatra ny tenany mba hahafahana hahatratra olona bebe kokoa hatrany. Ny antony ahafantarantsika zavatra betsaka aoka izany momba azy ireo dia satria izany no irin’izy ireo. Manao izany izy ireo”.

Toy izany marina tokoa ve no izy? Sa misy zavatra hafa ao ambadik’ilay fahasondrianana amin’ireo anjely amin’izao fotoana izao? Mba hahitana izany, dia tsy maintsy mandinika ny Tenin’Andriamanitra isika. Mirakitra ny fahamarinana momba ireo anjely ny Baiboly, araka ny ho hitantsika.

[Sary nahazoan-dalana, pejy 2]

Pejy 3 sy 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.