Manana Anjely Mpiambina ve Ianao?

INOANAO ve fa manana anjely mpiambina ny tenanao? Olona maro no mihevitra fa manana izany ny tenany. Momba izany, dia voalaza fa manana talenta manokana mahakasika ny anjely, ny vehivavy iray mipetraka any andrefan’i Kanada. Raha omenao azy ny anaranao manontolo miaraka amin’ny vola 200 dolara, dia lazainy fa afaka mampifandray anao amin’ny anjely mpiambina anao izy. Voalohany, dia mandinika lalina izy amin’ny fifantohana amin’ny lelafon’ny labozia iray. Manaraka izany, dia mahazo fahitana izy, ka ao amin’izany no anomezan’ilay anjelinao hafatra tokony hampitaina aminao. Ho fanampiny, dia anaovany sarintsarin’ilay anjelinao ianao.

Ho an’ny sasany izany dia mety ho toa mitovy amin’ny tantara iray momba an’i Louis IX, Mpanjaka frantsay. Izy io, hono, dia nividy volomborona lafo be, izay voalaza fa nilatsaka avy tamin’ny elatr’i Mikaela Arkanjely. Na dia hisalasala ny amin’ny fahamarinan’io tantara io aza ny maro, dia hanaiky avy hatrany ny fihamboan’ilay vehivavy kanadiana kosa izy ireo.

Mahaliana fatratra ny olona ny anjely

Nanintona fatratra ny fahalianan’ny olona ny anjely tato anatin’ireo taona faramparany. Ao amin’ny televiziona sy amin’ny sarimihetsika, ao amin’ireo boky sy gazetiboky ary gazetikely dia resahina amintsika ny amin’ireo anjely izay mankahery ireo marary mafy, mampionona ireo nidonam-pahoriana, mampita fahendrena sy mandrombaka olona tsy ho azon’ny fahafatesana. Any Etazonia, dia mpijery tokony ho 20 tapitrisa no manaraka tantara mitohy isan-kerinandro izay mampiseho ny anjara raisin’ny anjely eo amin’ny fiainan’ny olona. Manana lisitra boky maherin’ny 400 izay mifantoka amin’ny anjely ny fivarotam-boky iray.

Tantarain’ny boky iray vao haingana ny amin’ny namonjen’ny anjely mpiambina ny ain’ny miaramila teo am-piadiana. Vakina eo amin’ireo taratasy kely araikitra amin’ny pare-chocs-n’ny fiarakodia koa fa arovan’ny anjely mpiambina ny mpamily azy ireny. Misy fikambanana, kaonferansy, seminera mampandroso ny fandinihana atao momba ny anjely ary voalaza fa manampy ny olona hifandray amin’izy ireo.

I Eileen Freeman dia nanoratra boky telo momba ny anjely sady mpampanonta gazety iray natokana indrindra ho azy ireo. Nanantitrantitra toy izao izy: “Inoako fa maro be tahaka ny anjely any an-danitra ny anjely mpiambina eto ambonin’ny Tany, ka tsy ny fiderana an’Andriamanitra any an-danitra fotsiny no andraikiny, fa ny fiahiana ny olombelona sy ny endri-piainana hafa eto ambonin’ny Tany koa. Nankinina tamin’ny anjely mpiambina iray ny tsirairay avy amintsika fony isika notorontoronina ary miambina sy miaro antsika izy io mandritra ny fitomboantsika ao am-bohoka, eo am-pahaterahana, mandritra ny fiainantsika eto amin’ity tontolo ity mandra-pitariny antsika hiala amin’ny faritr’ity tontolo ity ho any amin’ny voninahitra any an-danitra.” Mampiseho tsara ny fomba fihevitra miely momba ireo anjely mpiambina izany.

Amin’izao andro sarotra sy feno fihenjanana izao, dia mampionona ny mino fa manana anjely manokana mpiambina antsika isika, anjely izay manana andraikitra hiaro antsika. Inona anefa no lazain’ny Baiboly, Tenin’Andriamanitra, momba izany? Tokony hiezaka hifandray amin’ny anjely ve isika? Miahy ny amin’ireo fari-pitsipika ara-pitondran-tena sy zavatra inoantsika ara-pivavahana ve izy ireo? Fanampiana manao ahoana no azontsika antenaina avy aminy? Hovaliana ao amin’ny lahatsoratra manaraka ireo fanontaniana ireo.