Fitsidihana Saha Misionera eto Amin’ny Taninay

NY ANTOKONA kongregasiona kristiana tsidihiko dia mitondra ahy any Portogaly ka hatrany Sina — na, toa toy izany ilay izy. Kanefa, izahay sy i Olive vadiko dia tsy nihetsika teto Grande-Bretagne mihitsy.

Mitsidika ireo kongregasionan’ny Vavolombelon’i Jehovah miteny vahiny izay mitombo isa sy miparitaka manerana ilay tany izahay. Manomboka ao amin’ny nosy Jersey, 20 kilaometatra eo ho eo avy eo amin’ny moron-tsirak’i Normandie, Frantsa, izay misy antokon’olona miteny portogey, ka hatrany amin’ny tanànan’i Sunderland, any avaratr’i Grande-Bretagne, izay itsidihanay olona liana miteny sinoa, dia manana anjara ao amin’ny saha miroborobo sy mandroso ara-panahy izay ampiasana fiteny maro be, izahay. Ahoana no nanjary nahavoatendry anay hanao io asa tsy mahazatra io? Ary inona no mitranga ao amin’io saha misionera ao amin’ny taninay io? Mamelà ahy hanazava.

Efa nanompo 20 taona teo ho eo tao amin’ny asa fitetezam-paritany izahay sy i Olive, ka nitsidika kongregasiona hafa isan-kerinandro. Nitondra anay nanomboka tany avaratra ka hatrany atsimo, tany atsinanana ka hatrany andrefana, nanerana an’i Grande-Bretagne ireo dia nataonay, ary tsy ela izay dia tonga hatrany amin’ireo rahalahinay kristiana tao amin’ny nosy mediteranean’i Malta izahay; niavaka ny fitiavana mandray vahiny kristiana hitanay tany. (Ampitahao amin’ny Asan’ny Apostoly 28:1, 2.) Taorian’ny telo taona tao Malta, dia nanomboka nanontany tena izahay hoe aiza indray no hanendrena anay. Nieritreritra izahay fa angamba hitsidika faritra ambanivohitra miteny anglisy izahay, ary nanomboka nampifanaraka ny sainay tamin’io zavatra mety hitranga io izahay. Akory ny hagaganay rehefa naharay ny fanendrena anay izahay, dia ny hanompo ao amin’ny fizaran-tany vaovao voaforon’ny antokon’olona sy kongregasiona mampiasa fiteny 23 samy hafa!

Nanontany tena izahay hoe ahoana no hiatrehanay izany. Ankoatra ny fanandraman-javatra hitanay tany Malta, dia mbola tsy nifanerasera loatra tamin’olona avy tamina fiaviana sy kolontsaina hafa mihitsy izahay. Tena ho afaka hampahery ireo izay tsy nahay firy ny teny anglisy ve izahay? Tsy mahay fiteny hafa izahay, koa ahoana no hiresahanay? Ahoana ny amin’ny sakafo sy ny fomba amam-panaon’ny hafa? Ho hainay ve ny hampifanara-javatra? Nandalo tao an-tsainay ny fanontaniana toy ireo rehefa nandinika tao amin’ny vavaka izay havaly io antso makedoniana io izahay. — Asan’ny Apostoly 16:9, 10; 1 Korintiana 9:19-22.

Fandresena ny vato misakana momba ny fiteny

“Tamin’ny voalohany dia nahatsapa ny tenako ho tsy ampy fahaizana aho, satria tsy mba nahay fiteny maro”, hoy ny fanazavan’i Olive. “Tsy hitako izay fomba hahafahako hanampy ireo rahavavy. Tamin’izay dia tadidiko fa ilay mpivady niara-nianatra Baiboly taminay tamin’ny voalohany, dia nampirisika anay mba tsy handa na oviana na oviana asa anendrena. Nampianatra anay izy ireo hoe tsy hangataka antsika na oviana na oviana hanao zavatra tsy ho vitantsika i Jehovah.” Koa vonona ny hanaiky ilay asa nanendrena anay izahay mivady.

Rehefa misaintsaina izany izahay, dia hitanay fa nanampy anay hitondra ny olona rehetra tamin’ny fomba tena nitovy ny tsy fahaizanay fiteny hafa. Ohatra, ny fanatrehana fivoriana atao amin’ny fiteny hafa isan-kerinandro dia nahatonga anay hahatakatra izay tsapan’ireo rahalahy rehefa voatery nanatrika fivoriana amin’ny teny anglisy izy ireo nefa tsy nahatakatra afa-tsy zavatra kely tamin’izay nolazaina. Voatosika hanomana tsara ireo fivoriana izahay mba hahafahanay hahazo ny hevitr’izay lazaina. Mamaly ny iray amin’ireo fanontaniana foana i Olive any am-pivoriana. Manomana ilay valin-teny amin’ny teny anglisy izy ary mangataka anabavy iray handika azy io ho azy, ka manoratra ilay dikan-teny araka ny fomba fanononana azy. Miaiky izy fa miahotrahotra ihany ny tenany rehefa manangan-tanana mba hanome valin-teny. Indraindray dia miteraka fihomehezana ny ezaka ataony. Tsy mahakivy azy anefa izany. “Fantatro fa ankasitrahan’ireo mpiara-manompo ny ezaka nataoko”, hoy izy. “Raha ny marina, ny fanomezako valin-teny dia mampirisika an’ireo mahay kokoa an’ilay fiteny mba handray anjara amin’ny fivoriana.”

Ho ahy, dia hafa koa ny fanaovana lahateny, satria tsy maintsy mamela fotoana ho an’ilay mpandika teny aho aorian’ny fehezanteny rehetra. Tena mora very ny filaharan’ireo hevitro. Hitako fa voatery mifantoka bebe kokoa sy mampihena be ny fanazavako, aho. Nahafinaritra ahy ihany anefa ilay izy.

Ilay fanompoanay niova endrika

Any amin’ny faritra maro an-tanàn-dehibe eto Grande-Bretagne, dia miparitaka ireo olona miteny vahiny, angamba misy anankiroa amin’ny arabe iray, ary avy eo dia tsy maintsy mandeha lavidavitra ianao vao mahita hafa. Na dia izany aza, rehefa miarahaba azy ireo amin’ny fiteniny manokana ianao ary mahita ny fihetsiny, dia tsapanao fa mendrika ny hanaovana ezaka ilay izy. Raha toa ilay rahalahy iarahako ka manolotra ny hafatra momba ilay Fanjakana amin’ny fitenin’ilay tompon-trano, dia matetika no haravoana tsy misy toy izany no hasetriny izany.

Eny tokoa, ny fanompoana eny amin’ny saha ampiasana fiteny vahiny dia iray amin’ny fanompoana mampientana indrindra hitanay nandritra ny 40 taona nanaovanay fanompoana ilay Fanjakana. Be ny fanantenana fitomboana. Tsy isalasalana fa olona maro no mianatra haingana lavitra sy amim-pankasitrahana lalina kokoa rehefa ampianarina amin’ny fitenin-drazany izy ireo. (Asan’ny Apostoly 2:8, 14, 41). Tena mampihetsi-po ny mahita rahalahy sy anabavy latsa-dranomasom-pifaliana amin’ny faran’ny fivoriana iray, indraindray dia sambany izy ireo vao nihaino sy nahazo ny hevitry ny fandaharana iray manontolo.

Rehefa mitory isan-trano izahay, dia miezaka hanao fampidiran-dresaka amin’ny fitenin’ny tompon-trano fara fahakeliny, na dia mahita zava-manahirana kely aza izahay indraindray. Ohatra, ny fiarahabana mahazatra ao amin’ny tokantrano miteny goujrati dia hoe Kemcho, izay midika fotsiny hoe “Manao ahoana.” Indray mandeha dia toa diso fanonona aho, ka toy ny hoe nanao dokam-barotra momba ny anarana kafe be mpahalala. Na dia izany aza, tao amin’ny trano iray dia nitsiky ilay lehilahy sy ny vadiny rehefa niarahaba azy ireo tamin’ny teny goujrati aho. Avy hatrany izy ireo dia nanasa anay hiditra ary nandroso kafe ho anay tamin-katsaram-panahy — tsy noho ny fahadisoam-panononana akory. Hita fa hay havan’ny sasany tamin’ireo Vavolombelon’i Jehovah tao amin’ilay antokon’olona tsidihinay izy ireo, ary nampiseho fahalianana marina tamin’ny fahamarinana.

Nametraka gazety matetika tamin’ny ramatoa iray miteny sinoa ny anabavy iray miteny anglisy, nandritra ny taona maro. Indraindray izy dia nanolotra fampianarana Baiboly maimaim-poana tamin’ilay ramatoa, nefa nolavina izany. Indray andro dia niaraka taminy ny anabavy iray nianatra teny sinoa, ary nanolotra ny boky Azonao Atao ny Hiaina Mandrakizay ao Amin’ny Paradisa eto An-tany amin’io fiteny io, tonga dia noraisin’ilay tompon-trano liana izy io.a Manana ilay boky amin’ny fiteniny manokana izy izao, ka nanaiky fampianarana Baiboly. Ireo teny vitsy natao tamin’ny fitenin’ilay ramatoa ireo no nampisy izany fiovana rehetra izany.

Kolontsaina samy hafa

Tsy takatray fa ao amin’ny kolontsaina sasany, ny lehilahy dia tsy tia ny hivoahan’ny vadiny irery amin’ny alina. Manjary tena sarotra noho izany ny hanatrehan’ny anabavy maro ireo fivoriana atao amin’ny hariva. Mino ny fitambaran’olona aziatika sasany fa ireo tovovavy izay mifidy ny tsy hanambady sady manohy mipetraka ao an-trano dia manao tsinontsinona ny fianakaviana. Naniry hanapoizin-tena ny rain’ny anabavy tanora iray rehefa nanda tsy hanambady ilay lehilahy nofidin’ny fianakaviana ho azy ilay anabavy. Eny, tena miavaka tokoa ny zavatra tsy maintsy hiaretan’ny anabavy toy izany! Na dia eo aza izany, rehefa hitanao ny vokatry ny fahamarinana eo amin’ny fiainam-pianakaviana ary hitanao fa manohina ny fon’ireo ray aman-dreny ny tsy fivadihan’ny anabavy toy izany amin’i Jehovah, dia tena mahatalanjona ilay izy!

Teo amin’ny fandraisana anjara tamin’io asa nanendrena io, dia voatery nanao fanovana sasany izahay. Talohan’ny nanombohanay ny asa fitetezam-paritany, ny sakafoko dia nahandro anglisy tsy nisy fangarony; izao anefa, arakaraka ny maha-be zava-manitra mampahatsiro ny sakafo no itiavako azy. Nanenenanay ireo taona maro navelanay handalo talohan’ny nanombohanay nankafy nahandro hafa toy izany — manomboka amin’ny trondro manta ka hatramin’ny hanina nasiana carry.

Fahatsinjovan-javatra mahabe fanantenana

Toa mazava fa izao no fotoana iroboroboan’ny saha ampiasana fiteny vahiny, any amin’ny faritra maro. Zavatra vita an-tsoratra mihamaro hatrany izao no azo raisina amin’ny fiteny samy hafa. Afaka mahatsapa ny fitahian’i Jehovah ny tena rehefa misy kongregasiona vaovao aorina. Tonga avy lavitra ireo rahalahy mahay fiteny hafa mba hanampy.

Ohatra niavaka iray ny nandraisana tamin’ny fomba tsara ny fitoriana ny vaovao tsara momba ilay Fanjakana tamin’ny teny frantsay. Nisy mpitsoa-ponenana maro avy any Zaïre sy tany afrikana hafa tonga teto Grande-Bretagne tato anatin’ireo taona faramparany. Miteny frantsay izy ireo. Rehefa niforona tao Londres ny kongregasiona miteny frantsay voalohany, dia nisy 65 teo ho eo ny mpitory ilay Fanjakana tao aminy. Herintaona tatỳ aoriana, dia nitsambikina ho 117 io isa io, ary nisy 48 tamin’izy ireo nanompo manontolo andro tamin’ny naha-mpisava lalana maharitra. Tsy ela dia tafaorina ny kongregasiona faharoa mba hikarakara ny fahalianana nitombo. Ankehitriny dia azo omena fiheverana bebe kokoa ireo olona liana, ka nisy 345 tamin’izy ireo nanatrika ny fankalazana ny Fahatsiarovana 1995. Mampiasa ny fanandraman-javatra hitany izao ireo nahazo diplaoma taloha tany Gileada mba hikarakara an’io saha mihamiitatra io, ary mahagaga ny fomba fandraisan’ny olona. Efa nanompo tany Bénin, Côte d’Ivoire, Maroc, ary Zaïre ireo misionera ireo, ary mahagaga ny vokatra.

Tamin’ny fitsidihana iray tao amin’ny kongregasiona miteny frantsay, dia niara-nianatra ny Baiboly tamin’ny tovovavy afrikana iray aho. Rehefa tsy maintsy nandeha izahay, dia nitalaho ilay vehivavy tanora hoe: “Aza mbola mandeha re! Mijanòna aloha.” Naniry hahalala bebe kokoa fotsiny izy. Nampahatsiaro ahy an’i Lydia tamin’ny taonjato voalohany izy. — Asan’ny Apostoly 16:14, 15.

Ny asanay tamin’ny voalohany dia ny hanampy ny antokon’olom-bitsy miteny vahiny ho tonga kongregasiona. Any amin’izay anaovan’ireo rahalahy Fianarana ny Bokin’ny Kongregasiona isan-kerinandro, dia mampiditra ny Sekolin’ny Fanompoana Teokratika nohafohezina izahay ho azy ireo, indray mandeha isam-bolana. Manampy azy ireo hahay haneho hevitra eny amin’ny fanompoana eny amin’ny saha izany. Avy eo izy ireo dia miezaka tsikelikely hanao ireo fivoriana dimy fanaon’ny kongregasiona isan-kerinandro. Efa manana kongregasiona vaovao miteny frantsay, galoà, goujrati, japoney, portogey, pendjabi, sinoa (kantôney), ary tamoul, izahay.

Nanana ny tombontsoa nanatrika fivorian’ireo rahalahy marenina koa izahay. Tena mampihetsi-po ny mijery ireo rahalahy mihira amin’ny tanany. Noho ny fahafantarako fa miteny amin’ny alalan’ny fihetsika izy ireo eo amin’ny fanompoana ataony dia mankasitraka ny ezaka tsara dia tsara ataony mba handraisana anjara amin’ny fitoriana ilay Fanjakana aho. Misy aza mpandika teny ho an’ireo sady jamba no marenina. Toa manao izay hahazoana antoka i Jehovah fa tsy misy na dia olona iray aza hadino.

Raha asaina manao fangatahana manokana izahay dia hitovy amin’ny an’i Jesosy ny anay: “Mangataha amin’ny Tompon’ny vokatra mba hampandehanany mpiasa hamory ny vokatra.” (Matio 9:38). Maro amin’ireo rahalahintsika no nanaiky hanao ilay zava-tsarotra, dia ny fianarana ny fitenin’ireo foko ao amin’ny faritanin’ny kongregasionany. Na dia tsy nomena tamin’ny fomba mahagaga ny fahaizana fiteny samy hafa aza izahay, azo antoka fa i Jehovah dia manokatra ny fanompoana eto amin’itỳ saha misionera ao amin’ny taninay itỳ — saha izay masaka hojinjàna. (Jaona 4:35, 36). — Notantarain’i Colin Seymour.

[Fanamarihana ambany pejy]