Ny Fomba Anampian’ny Anjely Anao
MANAMARINA ny fisian’ny anjely ny Tenin’Andriamanitra. Lazainy amintsika fa sesehena ny isan’ireny zavaboary ara-panahy ireny. Nahazo fahitana ny amin’ny zavatra any an-danitra i Daniela, mpanompon’i Jehovah Andriamanitra, ka izao no nosoratany momba izany: “Arivoarivo no nanompo Azy [Andriamanitra], ary alinalina no nitsangana teo anatrehany”. — Daniela 7:10.
Mariho fa tsy ny habetsahan’ny anjely fotsiny no ambaran’i Daniela amintsika. Lazainy koa fa manompo an’Andriamanitra izy ireo. Mpanompony ireo anjely. Mifanaraka amin’izany, dia nanao izao hira fankalazana izao ny mpanao salamo: “Misaora an’i Jehovah, hianareo anjeliny, dia hianareo izay mahery indrindra sady mankatò ny didiny ary mihaino ny feon’ny teniny. Misaora an’i Jehovah, ny miaramilany rehetra, dia ny mpanompony izay manao ny sitrapony.” — Salamo 103:20, 21.
Hazavain’ny Baiboly koa fa tsy olombelona teto an-tany akory ny anjely tamin’ny voalohany. Noarìn’i Jehovah tany an-danitra ny anjely, talohan’ny namoronany ny tany mihitsy aza. Fony Andriamanitra ‘nanorina ny tany dia nihoby avokoa ireo anjely zanak’Andriamanitra’. — Joba 38:4-7.
Zavaboary ara-panahy, tsy hita maso sady mahery no manan-tsaina ny anjely. Ao amin’ny Baiboly, ny teny hebreo hoe mal·ʼakhʹ sy ny teny grika hoe agʹge·los dia adika hoe “anjely” rehefa zavaboary ara-panahy no resahina. Hita efa ho in-400 ireo teny ireo ao amin’ny Baiboly. Samy mitovy ny hevitr’izy ireo, dia ny hoe: “mpitondra hafatra”.
Fihaonana tamin’ny anjely
Tena mpitondra hafatra tokoa ny anjely. Mety ho fantatrao tsara ilay fitantarana ao amin’ny Baiboly fony niseho tamin’i Maria ny anjely Gabriela. Nilazany i Maria fa na dia virjiny aza izy dia hiteraka zazalahy izay hantsoina hoe Jesosy. (Lioka 1:26-33). Nisy anjely iray koa niseho tamin’ny mpiandry ondry vitsivitsy teny an-tsaha. Izao no nambarany: “Mpamonjy no teraka ho anareo anio (...), dia Kristy Tompo.” (Lioka 2:8-11). Mitovy amin’izany koa fa nisy anjely nampita hafatra tamin’i Hagara, i Abrahama, i Lota, i Jakoba, i Mosesy, i Gideona sy i Jesosy ary ireo hafa voasoratra ao amin’ny Baiboly. — Genesisy 16:7-12; 18:1-5, 10; 19:1-3; 32:25-31; Eksodosy 3:1, 2; Mpitsara 6:11-22; Lioka 22:39-43; Hebreo 13:2.
Tsara homarihina fa nifanaraka tamin’ny fizotran’ny fikasan’Andriamanitra, fa tsy voatery ho ny an’ireo olombelona voakasika, ny hafatra rehetra nampitain’ireo anjely. Ireo anjely dia niseho tamin’ny nahasolontenan’Andriamanitra azy, araka ny sitrapony sy ny fandaharam-potoanany. Tsy olombelona no niantso azy ireo.
Tokony hangataka ny fanampian’ny anjely ve isika?
Mety ve ny hangatahana ny fanampian’ny anjely amin’ny fotoam-pahoriana? Raha izany no izy, dia ho tiantsika hofantarina ny anaran’ny anjely iray izay ho afaka hanampy antsika tsara indrindra. Mifanaraka amin’izany, dia misy boky sasany natao hahazoam-bola, manome lisitr’izay lazaina fa anaran’anjely maro, miaraka amin’ny mari-boninahiny sy ny anaram-boninahiny ary ny andraikiny. Manana lisitr’izay antsoina hoe “Anjely folo lehibe indrindra” ny boky iray, dia “ireo anjely malaza indrindra any amin’ny tany tandrefana”. Ampiarahina amin’ilay lisitra ny torohevitra mba hanakimpy ny masonao, hamerina imbetsaka sady miadana ny anaran’ilay anjely, hanao fisefoana lalina, hisefo miadana, sy “hanoman-tena ho amin’ny mety ho fifandraisana amin’izy ireo”.
Mifanohitra amin’izany, dia tsy manome afa-tsy anaran’anjely mahatoky roa monja ny Baiboly, dia i Mikaela sy i Gabriela. (Daniela 12:1; Lioka 1:26). Angamba mba hampisehoana fa persona ara-panahy miavaka manana anarana ny anjely tsirairay fa tsy hery iray tsy manana ny mahaizy azy fotsiny, no antony nanomezana ireny anarana ireny.
Tsara homarihina fa nisy anjely tsy nety nampahafantatra ny anarany tamin’ny olombelona. Rehefa nangatahin’i Jakoba ny anjely iray mba hampahafantatra aminy ny anarany, dia tsy nety nanao izany izy. (Genesisy 32:30). Rehefa nanontaniana ny anjely iray nanatona an’i Josoa mba hampahafantatra ny tenany, dia nilaza fotsiny izy fa “Komandin’ny miaramilan’i Jehovah” ny tenany. (Josoa 5:14). Rehefa nanontanian’ny ray aman-drenin’i Samsona ny amin’ny anarany ny anjely iray, dia namaly toy izao izy: “Nahoana no manontany ny anarako hianao? fa anarana mahagaga izany.” (Mpitsara 13:17, 18). Ny tsy nanomezan’ny Baiboly lisitry ny anaran’ireo anjely dia miaro antsika tsy hanome voninahitra sy hanolotra fanompoam-pivavahana tsy natao ho azy ireo. Araka ny ho hitantsika, dia tsy mampianatra antsika hangataka ny fanampiany koa izy io.
Fiantsoana an’Andriamanitra
Ny Baiboly dia milaza amintsika izay zavatra rehetra tokony ho fantatsika any amin’ny faritra ara-panahy. Nanoratra toy izao ny apostoly Paoly: “Izay soratra rehetra nomen’ny tsindrimandrin’Andriamanitra dia mahasoa koa ho fampianarana, (...) mba ho tanteraka ny olon’Andriamanitra, ho vonona tsara ho amin’ny asa tsara rehetra.” (2 Timoty 3:16, 17). Raha tian’i Jehovah ny hahalalantsika ny anaran’ny anjely maro, dia ho efa nampahafantariny tao amin’ny Teniny, ny Baiboly, izany. Ary raha toa ka nirin’Andriamanitra ny hampianatra antsika ny amin’ny fomba ifandraisana amin’ny anjely sy iresahana amin’izy ireny ao amin’ny vavaka, dia ho efa nanome izany fanazavana izany tao amin’ny Soratra Masina izy.
Nampianatra toy izao kosa anefa i Jesosy Kristy: “Hianao kosa, raha mivavaka, dia midira ao amin’ny efi-tranonao, ka rehefa voarindrinao ny varavaranao, dia mivavaha amin’ny Rainao, Izay ao amin’ny mangingina (...). Amin’izany mivavaha toy izao hianareo: Rainay Izay any an-danitra, hohamasinina anie ny anaranao.” (Matio 6:6, 9). Izao no fomba fihevitra araka ny Soratra Masina: Tsy tokony hiantso ny anjely isika na hivavaka aminy, fa tokony hanatona an’ilay Mpamorona ny anjely kosa ao amin’ny vavaka, dia ny tenan’Andriamanitra mihitsy. Tsy zava-miafina ny anarany, ary tsy mila olona nahazo fahitana mba hampahafantatra izany amintsika isika. Na dia teo aza ireo fanandramana natao mba hanafenana ny anaran’Andriamanitra, dia hita maherin’ny im-7000 izy io ao amin’ny Baiboly. Ny Ray any an-danitra ohatra, no tondroin’ny mpanao salamo rehefa nanao hira fiderana toy izao izy: “Hianao irery ihany, Izay atao hoe Jehovah, no Ilay Avo Indrindra ambonin’ny tany rehetra.” — Salamo 83:18.
Tsy hoe be hatao loatra i Jehovah ka tsy afaka ny hihaino antsika, raha manatona azy araka ny tokony ho izy ao amin’ny vavaka isika. Manome izao toky izao ny Baiboly: “Fa ny mason’i Jehovah mijery eny tontolo eny eran’ny tany rehetra, mba hisehoany aman-kery hamonjy izay manana fo mahitsy aminy.” — 2 Tantara 16:9.
Anjely manana fitsipi-pitondran-tena
Mifanohitra matetika amin’izay aseho ao amin’ny fampitam-baovao, dia tsy mitsara ny olona ny anjely. Mety izany satria tsy nomena lalana hitsara ny olombelona ny anjely. Jehovah no “Mpitsara ny olona rehetra”, na dia ‘nomeny ny Zanaka [Jesosy Kristy] aza ny fitsarana rehetra’. (Hebreo 12:23; Jaona 5:22). Na dia izany aza, dia ho diso ny hiheverana fa tsy miraika ny amin’ny fomba itondrantsika ny fiainantsika ny anjely. Hoy i Jesosy: “Misy fifaliana (...) eo anatrehan’ny anjelin’Andriamanitra ny amin’ny mpanota iray izay mibebaka.” — Lioka 15:10.
Tsy mpitazana fotsiny anefa ny anjely. Fahiny izy ireo dia nanompo tamin’ny naha mpanatanteraka ny didim-pitsaran’Andriamanitra. Nampiasa ny anjely, ohatra, Andriamanitra mba hamelezana ireo Ejipsianina fahiny. Araka ny Salamo 78:49, dia “nandatsaka ny fahatezerany mirehitra taminy Izy: Eny, fahavinirana sy fahatezerana ary fampahoriana, dia anjely andiany mitondra loza”. Mitovy amin’izany koa, dia tantarain’ny Baiboly fa nahafaty miaramila asyrianina 185 000 ny anjely iray tao anatin’ny indray alina monja. — 2 Mpanjaka 19:35.
Amin’ny hoavy koa, ireo anjely dia handringana an’ireo izay hampidi-doza ny fahasambaran’ny hafa noho ny tsy fetezany hanaraka ireo fari-pitsipika marin’Andriamanitra. Ho avy i Jesosy ‘mbamin’ny anjelin’ny heriny, amin’ny afo midedadeda, hamaly izay tsy mahalala an’Andriamanitra sy izay tsy manaiky ny filazantsara’. — 2 Tesaloniana 1:7, 8.
Asehon’ny Soratra Masina àry fa manao ny sitrapon’Andriamanitra mandrakariva ireo anjely mahatoky, amin’ny fanatanterahana ny toromarika avy aminy sy amin’ny fanohanana ireo fari-pitsipiny marina. Mazava fa raha tiantsika ny hanampian’ireo anjelin’Andriamanitra antsika, dia tokony hahafantatra ny sitrapon’Andriamanitra isika ary hiezaka mafy amim-pahatsorana mba hanao izany.
Ireo anjely mpiambina
Miahy ny olona sy miaro azy ireny ve ireo anjely? Nanontany toy izao ny apostoly Paoly: “Tsy fanahy manompo va izy [anjely] rehetra, nirahina hanao fanompoana ho an’izay handova famonjena?” (Hebreo 1:14). Mazava fa eny no valim-panontanian’i Paoly.
Noho ny nandavany tsy hiankohoka teo anoloan’ilay sariolona volamena natsangan’i Nebokadnezara Mpanjaka babylonianina, dia natsipy tao anaty lafaoro mirehitra afo izay nohafanaina izaitsizy ireo Hebreo telo lahy, dia i Sadraka sy i Mesaka ary i Abednego. Tsy nokasihin’ny afo anefa ireo mpanompo mahatokin’Andriamanitra ireo. Rehefa nijery ny tao anatin’ilay lafaoro mirehitra afo ny mpanjaka dia nahita “efa-dahy” izy ary nolazainy fa “ilay fahefatra dia toa zanak’ireo andriamanitra”. (Daniela 3:25). Natsipy tao an-davaky ny liona indray i Daniela, taona maromaro tatỳ aoriana, noho ny tsy fivadihany. Navotana soa aman-tsara koa izy tamin’io, ka izao no nambarany: “Andriamanitro efa naniraka ny anjeliny ka nanakombona ny vavan’ny liona”. — Daniela 6:23.
Rehefa tafaorina ny kôngregasiônan’ireo mpanara-dia an’i Kristy tamin’ny taonjato voalohany am.f.i., dia niseho indray ireo anjely, nanafaka ireo apostoly tany an-tranomaizina. (Asan’ny Apostoly 5:17-24; 12:6-12). Ary rehefa notandindomin-doza teny an-dranomasina ny ain’i Paoly, dia nanome toky azy ny anjely iray fa ho tody soa aman-tsara any Roma izy. — Asan’ny Apostoly 27:13-24.
Miaiky tanteraka ny mpanompon’i Jehovah Andriamanitra amin’ny andro ankehitriny fa tena misy sy afaka mitondra fiarovana, toy ny nataony ho an’i Elisa sy ny mpanompony, ireo tafika anjelin’Andriamanitra tsy hita maso. (2 Mpanjaka 6:15-17). Eny tokoa, “ny Anjelin’i Jehovah mitoby manodidina izay matahotra Azy ka mamonjy azy”. — Salamo 34:7; 91:11.
Ny hafatra entin’ny anjely
Na dia miahy momba izay hahasambatra an’ireo izay manompo an’i Jehovah Andriamanitra aza ny anjely, dia ataony azo antoka koa fa mianatra momba an’Andriamanitra sy ny fikasany ny olona. Izao no nosoratan’ny apostoly Jaona: “Hitako fa, indro, nisy anjely iray koa nanidina teo afovoan’ny lanitra, nanana filazantsara mandrakizay hotorina amin’izay monina ambonin’ny tany sy amin’ny firenena sy ny fokom-pirenena sy ny samy hafa fiteny ary ny olona rehetra, nanao tamin’ny feo mahery hoe: Matahora an’Andriamanitra, ka omeo voninahitra Izy”. — Apokalypsy 14:6, 7.
Irinao ve ny hahafantatra ny votoatin’io “filazantsara mandrakizay” io? Raha izany no izy, dia anontanio ny Vavolombelon’i Jehovah. Ho faly izy ireo hiara-mizara izany aminao.
[Sary, pejy 7]
Manana filazantsara mandrakizay hotorina ny anjely iray eo afovoan’ny lanitra. Irinao ve ny hahafantatra momba izany?