Asehonao ve fa Velom-pankasitrahana ny Tenanao?
Tao amin’ny tranon’ny misionera atsy Afrika andrefana, dia nisy alika mpiambina iray nantsoina hoe Teddy nipetraka tao taloha. Rehefa nisy olona nanipy hena ho an’i Teddy, dia nateliny avy hatrany ilay izy, tsy nisy fankafizana na fitsakoana akory. Nihanahana tao anatin’ny danik’andro mahamay izy, niandry ny hanipazana eo amin’ny lalany ny sombin-kena manaraka. Rehefa lany ny hena dia mihodina izy ary lasa.
Mbola tsy nampiseho mihitsy fankasitrahana i Teddy na dia kely akory aza. Tsy nisy olona nanantena ny hanaovany izany koa. raha ny marina dia alika ihany izy.
RAHA ny amin’ny fankasitrahana, dia matetika isika no manantena izany bebe kokoa avy amin’ny mpiara-belona amintsika noho ny avy amin’ny biby. Mazàna isika no diso fanantenana. Olona maro no mandrombaka izay azony avy amin’ny fiainana ary mitady bebe kokoa hatrany. Tsy mahagaga koa izany. Nanambara mialoha ny Baiboly fa amin’ny andro farany, ny olona dia tsy hahay hankasitraka. — 2 Timoty 3:1, 2.
Kanefa, manana toe-tsaina tsy mitovy amin’izany ny mpanompon’Andriamanitra. Raisiny am-po ilay torohevitry ny apostoly Paoly, izay nananatra ny mpiray finoana taminy toy izao: “Asehoy fa velom-pankasitrahana ianareo.” — Kolosiana 3:15, NW.
Asehon’i Jehovah fa velom-pankasitrahana izy
Namela ohatra tonga lafatra ny amin’ny fampisehoana fankasitrahana i Jehovah Andriamanitra. Diniho ny fomba fiheverany ny mpanompony mahatoky. Teo ambanin’ny tsindrimandry, i Paoly dia nanoratra toy izao ho an’ny Kristianina hebreo: “Andriamanitra tsy mba tsy marina hanadino ny asanareo sy ny fitiavana izay nasehonareo ho voninahitry ny anarany, raha nanompo ny olona masina hianareo sady mbola manompo ihany.” — Hebreo 6:10.
Betsaka ny ohatra ny amin’ny fankasitrahan’i Jehovah ny mpanompony mahatoky. Nitahy an’i Abrahama izy tamin’ny fampitomboana ny taranany ara-bakiteny, mba hahatongavan’izy ireo “ho tahaka ny kintana eny amin’ny lanitra sy ho tahaka ny fasika izay any amoron-dranomasina”. (Genesisy 22:17). Ho fankasitrahana ny fahatokian’i Joba teo ambanin’ny fitsapana, dia tsy vitan’ny hoe namerina indray ny harem-be nananan’i Joba fotsiny i Jehovah, fa nanome azy “indroa toraka izay”. (Joba 42:10). Manaporofo ny fahamarinan’izao fanambarana izao, ny fifampiraharahan’i Jehovah tamin’ny olombelona nandritra ny an’arivony taona maro: “Ny mason’i Jehovah mijery eny tontolo eny eran’ny tany rehetra, mba hisehoany aman-kery hamonjy izay manana fo mahitsy aminy.” — 2 Tantara 16:9.
Ny fankasitrahan’Andriamanitra sy ny fironany hamaly soa ireo izay miezaka hanao ny sitrapony no lafiny lehibe indrindra amin’ny toetrany. Zava-dehibe ho an’ny finoana kristianina, ny fanekena izany. Nanoratra toy izao i Paoly: “Raha tsy amin’ny finoana, dia tsy misy azo atao hahazoana sitraka aminy; fa izay manatona an’Andriamanitra dia tsy maintsy mino fa misy Izy sady Mpamaly soa izay mazoto mitady Azy.” — Hebreo 11:6.
Raha nampiseho toe-tsaina feno hasiahana sy tia manakiana kosa i Jehovah, dia ho voaheloka avokoa isika rehetra. Efa ela izay no nilazan’ny mpanao salamo izao hevitra izao: “Raha mandinika heloka Hianao, Jehovah ô, iza no hahajanona, Tompo ô?” (Salamo 130:3). Tsy mba tsy mahay mankasitraka i Jehovah no sady tsy mba be fanakianana. Mankamamy ireo izay manompo azy izy. Asehony fa velom-pankasitrahana ny tenany.
Jesosy — Olona mahay mankasitraka lalina
Rehefa nampiseho taratr’ireo toetran’ny Rainy any an-danitra i Jesosy Kristy, dia nampiseho fankasitrahana ireo zavatra nataon’ny hafa tamim-pinoana. Diniho izay nitranga indray mandeha tao amin’ny tempoly tany Jerosalema: “Ary Jesosy nanopy ny masony ka nahita ny mpanan-karena mandatsa-drakitra tao amin’ny fandatsahan-drakitra; ary nahita mpitondratena malahelo anankiray koa mandatsaka farantsakely roa teo Izy. Dia hoy Izy: Lazaiko aminareo marina tokoa fa io mpitondratena malahelo io no efa nandatsaka be noho izy rehetra. Fa ireo rehetra ireo, dia tamin’ny haben’ny fananany no nandatsahany tao amin’ny rakitra; fa izy kosa tamin’ny fahantrany no nandatsahany ny fivelomany rehetra izay nananany.” — Lioka 21:1-4.
Raha eo amin’ny lafiny ara-bola, dia kely ilay fanomezana, indrindra raha nampitahaina tamin’ny an’ireo olona nanankarena. Tsy ho nahamarika an’ilay mpitondratena velively ny ankamaroan’ireo nanatrika. Kanefa, tena nahita izany mpitondratena izany i Jesosy. Nahatakatra ny tarehin-javatra nisy azy izy. Nahita azy i Jesosy ary nankasitraka azy.
Nisy fisehoan-javatra hafa iray izay nahakasika an’i Maria, vehivavy iray nanankarena. Raha teo am-pandriana ilika nihinana iny i Jesosy, dia nandraraka menaka manitra tena lafo vidy teo amin’ny tongotr’i Jesosy sy teo amin’ny lohany ilay vehivavy. Nanakiana ny zavatra nataony ny sasany, ka nilaza fa ho azo namidy ilay menaka ary nampiasaina mba hanampiana ny mahantra ny vola. Ahoana ny namalian’i Jesosy izany? Hoy izy: “Avelao izy; nahoana hianareo no mampalahelo azy? Asa soa no nataony tamiko. Ary lazaiko aminareo marina tokoa: Na aiza na aiza amin’izao tontolo izao no hitoriana ny filazantsara, dia holazaina koa izao nataon-dravehivavy izao mba ho fahatsiarovana azy.” — Marka 14:3-6, 9; Jaona 12:3.
Tsy nimenomenona noho ny tsy nampiasana ilay menaka sarobidy tamin-javatra hafa, i Jesosy. Nankasitraka ny fitiavana sy ny finoana nasehon’i Maria tamim-pahalalahan-tanana, i Jesosy. Noraiketina an-tsoratra ao amin’ny Baiboly io fisehoan-javatra io ho fahatsiarovana ny asa tsara nataony. Mampiseho ireo fitantarana ireo sy ny hafa fa lehilahy nanana fankasitrahana lalina i Jesosy.
Raha mpanompon’Andriamanitra ianao, dia afaka mahazo antoka fa samy mankasitraka amin’ny fomba lalina ny ezaka ataonao mba hampandrosoana ny fanompoam-pivavahana madio, i Jehovah Andriamanitra sy i Jesosy Kristy. Ny fahalalana toy izany dia mampanatona antsika azy ireo sy manosika antsika hanahaka azy ireo amin’ny fampisehoantsika fa velom-pankasitrahana isika.
Toe-tsain’i Satana tia fanakianana
Andeha isika izao handinika ohatra iray ny amin’ilay tsy mampiseho fankasitrahana, dia i Satana Devoly. Anisan’ny nahatonga an’i Satana hitarika fikomiana nahatsiravina tamin’Andriamanitra, ny tsy fananany fankasitrahana.
Rehefa nanolokolo toe-tsaina tia fanakianana noho ny tsy fahafaham-po i Satana, dia nanomboka namafy izany tamin’ny hafa. Diniho ny fisehoan-javatra tao amin’ny sahan’ny Edena. Namorona ny lehilahy sy ny vehivavy voalohany i Jehovah, ary nametraka azy ireo tao amin’ny zaridaina iray miendrika paradisa ka nilaza toy izao tamin’izy ireo: “Ny hazo rehetra eo amin’ny saha dia azonao ihinanana ihany”. Tsy nisy fameperana afa-tsy iray monja. Hoy Andriamanitra: “Ny hazo fahalalana ny tsara sy ny ratsy dia aza ihinanana; fa amin’ny andro izay ihinananao azy dia ho faty tokoa hianao.” — Genesisy 2:16, 17.
Tsy ela anefa, dia nihaika an’i Jehovah ho tsy azo inoana, i Satana. Tamin’ny ampahany, dia niriny ny hahatonga an’i Eva ho tsy hahay hankasitraka an’i Jehovah, ka ho voatosika hikomy taminy, tahaka ny nataon’ny tenan’i Satana mihitsy. “Hanky! efa nataon’Andriamanitra hoe: Aza ihinananareo ny hazo rehetra eo amin’ny saha?”, hoy i Satana nanontany. (Genesisy 3:1). Ny tiany holazaina mazava dia hoe nisy zava-tsarobidy tsy nomen’Andriamanitra an’i Eva, dia zavatra izay hanokatra ny masony ka hahatonga azy ho tahaka ny tenan’Andriamanitra mihitsy. Tsy nampiseho fankasitrahana noho ireo fitahiana maro narotsak’i Jehovah teo aminy i Eva, fa nanomboka naniry mafy izay voarara. — Genesisy 3:5, 6.
Fantatra hatraiza hatraiza ireo vokatra mahatsiravina naterak’izany. Na dia nomena ilay anarana hoe Eva aza izy “satria izy no renin’ny olombelona rehetra”, dia nanjary renin’ny olona maty rehetra izy, amin’ny heviny hafa iray. Avy tamin’i Adama, ny olombelona rehetra dia nandova fahotana izay niteraka fahafatesana. — Genesisy 3:20; Romana 5:12.
Manahafa an’Andriamanitra sy i Kristy
Diniho ny fifanoherana misy eo amin’i Satana sy i Jesosy. I Satana dia lazalazaina ho “ilay mpiampanga ny rahalahintsika, dia ilay miampanga azy eo anatrehan’Andriamanitsika andro aman-alina”. (Apokalypsy 12:10). I Jesosy dia ‘mahavonjy tokoa izay manatona an’Andriamanitra amin’ny alalany, satria velona mandrakizay hanao fifonana ho azy izy’. — Hebreo 7:25.
Miampanga ireo mpanompon’Andriamanitra i Satana. Mankasitraka azy ireo sy manao fifonana ho azy i Jesosy. Amin’ny maha mpanahaka an’i Kristy azy ireo, ny Kristianina dia tokony hiezaka samy hijery izay tsara ao amin’ny andaniny avy, ka hifaneho fankasitrahana sy hifanisy vidiny. Amin’ny fanaovana izany, dia asehon’izy ireo fa velom-pankasitrahana an’ilay namela ohatra fara tampony eo amin’ny fahaiza-mankasitraka, dia i Jehovah Andriamanitra, izy ireo. — 1 Korintiana 11:1.
[Sary, pejy 17]
Naneho fankasitrahana ny asa tsara nataon’i Maria i Jesosy