Mitantara Ireo Mpitory Ilay Fanjakana

Fitarana Teôkratika any Namibia

TONGA voalohany tany Namibia, tamin’ny faramparan’ireo taona 1920, ny vaovao tsara momba ny Fanjakan’Andriamanitra. Hatramin’io fotoana io, dia olona tso-po an-jatony maro no nandray ny hafatr’Andriamanitra momba ny famonjena. Ireto fitantarana manaraka ireto dia mampiseho ny fomba anangonan’i Jehovah ireny olona faniry ireny ho ao amin’ny valany. — Hagay 2:7.

◻ I Paulus, izay mivelona amin’ny fambolena, any amin’ny faritra avaratra atsinanan’i Namibia, dia nifankahita voalohany tamin’ny Vavolombelon’i Jehovah, fony izy nitsidika an’i Windhoek, renivohitr’ilay tany. Niaiky avy hatrany i Paulus fa nahita ny fahamarinana. Nody tany aminy izy, nitondra ny boky Azonao Atao ny Hiaina Mandrakizay ao Amin’ny Paradisa eto An-tany. Avy eo, tamin’ny diany iray ho any Rundu, ilay tanàna nisy Efitrano Fanjakana akaiky indrindra, i Paulus dia nahita ireo Vavolombelona, ary niangavy azy ireo mba hitsidika azy.

Kanefa, lavitra loatra ny lalana hahatongavan’ireo Vavolombelona tany amin’i Paulus sy hampianaran’izy ireo Baiboly azy isan-kerinandro. Tsy kivy i Paulus, fa nanomboka nianatra samirery ny Baiboly. Fanampin’izany, dia nitory tamin’ny hafa tamin-jotom-po momba izay zavatra nianarany izy. Rehefa nandeha ny fotoana, dia nisy antokon’olona niara-nianatra Baiboly niforona. Rehefa ren’ilay antokon’olom-bitsy tamin’ny radio, fa hisy fivoriamben’ny Vavolombelon’i Jehovah hatao any Rundu, dia nanambatra ny volany kely izy ireo, mba hahazoana fitaterana ho any amin’ny fivoriambe.

Tena fisehoan-javatra nampientam-po mihitsy ny niarahan’izy ireo voalohany tamin’ny Vavolombelon’i Jehovah! Tsy ela dia nisy fandaharana natao, mba hitsidihan’ny rahalahy ampy fahaizana an’io antokon’olona io tsy tapaka. Ankehitriny, dia misy mpitory enina ao amin’ilay tanàna ipetrahan’i Paulus.

◻ Taitra ny fahalianan’i Johanna tamin’ny anaran’Andriamanitra, rehefa nahare olona nanaratsy ny Vavolombelon’i Jehovah izy. Hoy ny tsaroany: “Raha vao nahare voalohany ny anarana hoe Jehovah aho, dia nanjary niraikitra tsy azo nokosehina tao an-tsaiko izy io, ka nanomboka nanontany tena aho hoe iza moa izany Jehovah izany. Niara-nipetraka tamin’ny vadiko, teo akaikin’ny Helodranon’i Walvis, eny amoron-tsirak’i Namibia, aho. Indray mandeha izahay dia nankany an-tanàn-dehibe, ary nahita Vavolombelona sasany nizara gazety Ny Tilikambo Fiambenana teny amin’ny arabe aho. Naka iray aho, ary nangataka fampianarana Baiboly, satria nanana fanontaniana maro. Nitomany aho, rehefa nilazany fa tsy afaka ny ho tonga izy ireo, satria simba ny fiarany. Tsy ela taorian’izay, dia maty ny vadiko, ary nandeha nipetraka teto Keetmanshoop aho. Nisy mpisava lalana manokana (mpitory ny filazantsara manontolo andro) iray notendrena hiasa teto, ary naka ny boky Ny Fahamarinana Izay Mitarika ho Amin’ny Fiainana Mandrakizay, avy taminy aho. Hatrany am-piandohana mihitsy aho dia efa nahafantatra ny feon’ny fahamarinana.

Tamin’ny farany, dia nasaina handray anjara tamin’ny asa fitoriana aho, nefa nanafotra ahy ny tahotra olona. Rehefa nandeha isam-baravarana aho, dia nivavaka tamin’i Jehovah mba hamelany ahy ho faty, toy izay hitory. Rehefa nanao fitoriana voalohany teny amin’ny arabe aho, dia niafina teo amin’ny lalankely tery iray, ka nanantena fa tsy hisy olona hahita ahy. Tamin’ny farany, dia nisikina ny herim-po nilaina aho mba hanolorana gazety amin’ny mpandalo iray, ary tamin’izay aho vao nahita holazaina. Tamin’iny andro iny, noho ny fanampian’i Jehovah, dia nizara ny fanantenako miorina amin’ny Baiboly, tamin’ny olona maro aho.

Ankehitriny, 12 taona atỳ aoriana, na dia mahantra ara-nofo aza aho, dia mbola mankamamy ihany ilay tombontsoa hanao ny fanompoan’ny mpisava lalana, sy mbola manohy mandray fifaliana tsy hay tombanana ihany, avy amin’ny fizarana ny fahamarinana momba ilay Fanjakana amin’ny hafa.”