Mitantara Ireo Mpitory Ilay Fanjakana
Inde—“Firaisan-tsaina eo Anivon’ny Tsy Fitoviana”
TENY faneva fampiasan’ny olona mba hilazalazana ny fampiraisana ny firenen’i Inde ny hoe “Firaisan-tsaina eo Anivon’ny Tsy Fitoviana”. Tsy mora akory ny manantanteraka firaisan-tsaina any amin’io tany midadasika io, satria mantsy misy tsy fitoviana lehibe na amin’ny kolontsaina, na amin’ny fiteny, na amin’ny fivavahana, na amin’ny fiaviana ara-pirazanana, na amin’ny fitafiana, na amin’ny sakafo. Ahitana firaisan-tsaina toy izany anefa ao amin’ny birao fitantanan-draharahan’ny Vavolombelon’i Jehovah any Inde. Eny, misy izy io, na dia avy amin’ny fanjakana sy faritany maro, ary miteny amin’ny fiteny maro samy hafa, aza ireo mpiasa an-tsitrapo mipetraka sy miasa ao.
• Andeha hofantarintsika ny amin’i Rajrani, vehivavy iray avy any Pendjab, any amin’ny farany avaratra amin’i Inde. Fony nianatra tany an-tsekoly i Rajrani, dia nanomboka nianatra ny Baiboly niaraka tamin’ny Vavolombelon’i Jehovah ny iray tamin’ireo mpiray kilasy taminy. Niezaka nanao izay hahaliana an’i Rajrani tamin’ny Baiboly io tovovavy io. Koa satria voafetra ny fahaizan’ilay mpiara-mianatra taminy ny teny anglisy, ary mbola tsy nisy Ny Tilikambo Fiambenana tamin’ny fiteny pendjabi tamin’izay fotoana izay, dia nangataka ny fanampian’i Rajrani izy mba handika ho azy ny votoatin’ilay gazety. Nanomboka nanan-kery lehibe teo amin’i Rajrani izay novakiny tao amin’Ny Tilikambo Fiambenana, hany ka nandroso sy nanolotra ny fiainany ho an’i Jehovah Andriamanitra izy, na dia teo aza ny fanoheran’ny ray aman-dreniny. Manompo ao amin’ny Betela any Inde izy ankehitriny, ka izay nampahiratra ny masony hahita ny fahamarinana mihitsy no ataony. Mandika zavatra vita an-tsoratra amin’ny fiteny pendjabi izy!
• Mba diniho koa i Bijoe avy amin’ny faritra iray hafa any Inde, dia ny fanjakan’i Kerala any atsimoandrefana. Voaroaka tany amin’ny lise izy noho izy nitana toeram-pialanalanana tamin’ireo fombafomba mampiseho fanindrahindram-pirenena. Nifarana tamin’ny fandresena nitondra fiovana lehibe ny raharaha ara-pitsarana naharitraritra ihany. Niverina nianatra indray i Bijoe, taorian’ilay fandresena ho an’ny fanompoam-pivavahana marina.a Afa-tsy izany koa, dia nanohy nianatra tany amin’ny oniversite izy. Nanelingelina ny feon’ny fieritreretany anefa ny rivo-piainana ratsy ara-pitondran-tena nanjaka tany. Koa nijanona tsy nianatra intsony àry izy teo amin’ny tapany voalohany tamin’ny taom-pianarana. Mihevitra izy izao, aorian’ny folo taona nanompoany tao amin’ny Betela, fa ny soa noraisiny amin’ny maha mpianakavin’ny Betela azy dia betsaka kokoa noho izay nety ho azony raha nandranto fianarana ambony izy. Misy tsy fitoviana, nefa misy firaisan-tsaina mantsy ao.
• Samy 70 taona mahery sady vehivavy maty vady i Norma sy i Lily. Nahafeno 40 taona mahery avy tao amin’ny fanompoana manontolo andro izy ireo. Mandika teny amin’ny fiteny tamoul efa hatramin’ny 20 taona eo ho eo no asan’i Lily ao amin’ny sampana. I Norma dia tonga tao amin’ny Betela, 13 taona lasa izay, taorian’ny namoizany ny vadiny. Ankoatra ny fanomezana ohatra tsara dia tsara amin’ny maha mpiasa mazoto sy tsy manao tsirambina azy ireo, dia fitaomana mampiray ho an’ny fianakavian’ny Betela manontolo koa izy ireo. Tia mampiantrano vahiny izy ireo, ary mankafy ny fifaneraserana amin’ireo mpianakavin’ny Betela tanora kokoa sy ny fizarana amin’izy ireny ny fifaliana nentin’ny fiainana kristianina hatramin’ny taona maro. Ho setrin’izany, dia manasa an’i Lily sy i Norma mba hiaraka amin’izy ireo ao amin’ny efitranony ireo tanora, ary mitondra fanampiana rehefa ilaina izany. Tena ohatra tsara dia tsara izany!
Noho izy ireo nandresy ireo fahasamihafana miteraka fifandirana sy ady hita any amin’ny toerana maro, ireo mpiasa an-tsitrapo ireo, amin’ny maha mpianakavin’ny Betela tafaray any Inde azy, dia miara-miasa amim-pifaliana mba hanampy ny hafa.—Salamo 133:1.
[Fanamarihana ambany pejy]
[Sary nahazoan-dalana, pejy 8]
Eo andamosina: Mountain High Maps® Copyright © 1997 Digital Wisdom, Inc.